Read cisena 2 ATESALONIKA 2 Bible Online

2 ATESALONIKA 2 - cisena bible

2 ATESALONIKA 2

¹Kulonga pya kubwera pontho kwa Mbuyathu Yesu Khristu, pontho na pya kugumanyikana kwathu pabodzi kagumanikana naye: Abale anga, ndikukupemphani kuti

²muleke kudzudzumika m'manyerezero anu, penu kututumuka na pinalonga anthu kuti Nsiku ya Mbuya yafika kale. Penu iwo alonge pyawo kuti penepi tidapilonga ndife kudzera muna mphangwa zakubulukira kuna Mulungu, penu kulalika kudachita ife, penu kalata idalemba ife ile.

³Paleke khala munthu na mbodzi ene wakukunyengezani na pang'ono pene tayu, thangwi nsikuyo mbidzati fika, panachitika Kugalukira Kwakumalisira, pontho Munthu Wakuipa anaoneka, ule athema kwenda kugehena.

⁴Iye anapokanya pinthu pyonsene pimbapembedza anthu, pontho pimbalonga iwo kuti ndi Mulungu. Iye anapiikha yekha ene padzulu papinthu pyonsenepi. Pontho anapita m'Nyumba ya Mulungu mbakakhala pansi mbapithula yekha ene kuti ndi Mulungu.

⁵Ayi imwe nkhabe kukumbuka tayu? Pikhali ine namwe kweneko ndidakupangani pyonsenepi.

⁶Kwache pana chinthu chinakhondesa kuti penepi pichitike chinchino, chinthu chenechi imwe ene mukuchidziwa. Mbwenye pandzidzi wache wakuthema ungakwana Munthu Wakuipayi anaoneka.

⁷Mphamvu zakubisika zakuipa zatoma kale kuphata basa, mbwenye pinthu pinafuna kudzachitikapyo nee pinati pichitike tayu kufikirana anapikhondesa kuti pichitike ule abuluswa.

⁸Tenepo Munthu Wakuipa ule anatchululwa, mbwenye Mbuya Yesu angabwera anampha na muya wakubulukira m'kanwa mwache, pontho anamvunga na kuonekera kwache kwakung'azimira.

⁹Munthu Wakuipa ule anabwera na mphamvu za Satana mbachita pilengo-lengo na pyakudodomesa pyakunama pya mtundu na mtundu,

¹⁰pontho anaphatisa basa unthawatawa onsene kunyengeza nawo anthu anafuna tayika ale. Iwo anatayika thangwi hadatambire pontho kufuna pyakuonadi tayu kuti apulumuke napyo.

¹¹Natenepo Mulungu anatumiza mphamvu zakuanyengeza, towera iwo akhulupire pinthu pyakunama.

¹²Na thangwi yeneyi anthu, ale adakhonda kukhulupira pyakuonadi mbakomerwa pyawo na kuchita pyakudawika, anakonwa.

¹³Ife tathema kupereka takhuta kuna Mulungu ndzidzi onsene thangwi ya imwepo, abale, ale ambafunwa na Mbuya. Thangwi Mulungu adakusankhulani kukhala akutoma[2] kupulumuswa kudzera muna mphamvu za Mzimu Wakuchena kukuchitisani kukhala anthu akuchena kudzera muna chikhulupiro chanu pana pyakuonadi.

¹⁴Mulungu adakuchemererani penepi kudzera muna Mphangwa Zadidi zidakulalikirani ife; towera mutambirembo khundu yanu pa demelero ya Mbuyathu Yesu Khristu.

¹⁵Natenepo, abale athu, imirani dzololo, pontho phatisani pyakuonadi pidakufunzisani ife, pakulalika na kupilemba kwene m'kalata pile.

¹⁶Mbuyathu Yesu Khristu mwenechiro, pontho Mulungu Babathu ule adatifuna, pontho ule na kukoma mtima kwache adatipasa kuwanga mtima kokhonda mala, pontho na chidikhiro chakukhazikika,

¹⁷akuwangiseni mtima pontho akupaseni mphamvu kuti ndzidzi onsene muchite na kulonga kwene pinthu pyadidi.