Read cisena 2 ATESALONIKA 3 Bible Online

2 ATESALONIKA 3 - cisena bible

2 ATESALONIKA 3

¹Pakumalisira, abale, tipemphererenimbo ife, towera mphangwa za Mbuya zithimize kufalikira msanga, pontho kuti zitambirwe na chilemedzo ninga mudachitirwa izo pakati panu.

²Pempherani pontho kuti Mulungu atipulumuse m'manja mwa anthu akudawika pontho akuipa; thangwi si onsene ambakhulupira Mphangwa Zadidi tayu.

³Mbwenye Mbuya ngwakukhulupirika, tenepo iye anakupasani mphamvu, pontho anakukoyani mwadidi kugopesera Satana, nyakuipa ule.

⁴Mbuya ambatichitisa kuti tikukhulupireni kuti mukuchita, pontho munathimiza kuchita pinthu pyonsene pidakupangani ife pile.

⁵Mbuya atsogolere pyakunyerezera pyanu, towera mudziwe chadi-chadi kuafuna kumbachita Mulungu anthu pontho na kupirira kwa Khristu.

⁶Abale, na dzina ya Mbuya Yesu Khristu tikukupangani kuti muleke phatizana na akhristu, ale ana makhaliro akupolola, pontho ale ambakhonda kuteweza matongero adaapasa ife ale.

⁷Imwe ene mukupidziwa mwadidi mwene kuti imwe mwathema kuchita ninga montho mukhachitira ife. Pikhali ife pakati panu ife nee tikhali anthu akupolola tayu.

⁸Ife hatidatambire pyakudya pyakubulukira kuna munthu na mbodzi ene okhonda kukupagalira tayu, m'mbuto mwache tidaphata basa na manjathu mwakuwangisa. Tidathimiza kuphata basa mosiku na masikati kugopesera kuti tinakunensani.

⁹Si kuti ife nkhabe utongi wakukupangani kuti mutiphedze, mbwenye tidachita tenepo kuti tikupangizeni makhaliro adidi.

¹⁰Pikhali ife pabodzi namwe kwanuko, tikhakupangani kuti “Munthu onsene anakhonda phata basayo aleke kudya.”

¹¹Tikulonga tenepa, thangwi tikuva kuti kweneko pakati panupo pana anthu anango a makhaliro akupolola, ale nkhabe phata basawo tayu, mbwenye kuzunguza basa ya anthu anango.

¹²Na dzina ya Mbuya Yesu Khristu tikuapanga na kuacheuza anthu ninga enewa kuti akhale na makhaliro akuthema mbaphata basa, towera agumane kudya kwakuphata basa na manjawo.

¹³Mbwenye imwe, abale, lekani kutopa na kuchita udidi.

¹⁴Ngakhala munthu unango anakhonda kuvera mafala alemba ife m'kalatamu, munthu weneyo mumuonesese mwadidi, pontho muleke kuphatizana naye, towera achite manyadzo.

¹⁵Kwache lekani kumuyesa ninga nyamalwa, mbwenye mcheuzeni ninga mbaleanu.

¹⁶Mbuya maka, ule ndi mwenechiro mtendere, mbakupaseni mtendere ndzidzi onsene pontho m'njira zonsene. Mbuya mbakhale na imwe monsene.

¹⁷Na manjanga ndikulemba mafalawa: Mwenyikiro wakubulukira kuna ine, Paulo. Chenechi ntchidzindikiro changa m'makalatanga onsene, mwenemu ndiye mumbalembera ine.

¹⁸Kukoma mtima kwa Mbuyathu Yesu Khristu kukhale na imwe monsene.