Read cisena 1 TIMOTI 1 Bible Online

1 TIMOTI 1 - cisena bible

1 TIMOTI 1

¹Kubulukira kuna ine Paulo, nyakutumwa wa Khristu Yesu, na kutongwa na Mulungu Nyankhombo wathu, pontho na Khristu Yesu chidikhiro chathu.

²Kwenda kuna Timoti, mwananga chadi-chadi m'chikhulupiro. Kukoma mtima, nsisi na mtendere pyakubulukira kuna Mulungu Baba, pontho Khristu Yesu Mbuyathu pikhale namwe.

³Ndikupifuna kuti iwe ukhale mumzinda wa Efeso ninga mudakupemphera ine ndzidzi ukhaenda ine ku Makedonia ule. Anthu anango kweneko akufunzisa pifunziso pyakunama, tenepo iwe uapange kuti aleke.

⁴Uapange kuti aleke kuikha konta pithankano pyakusowa basa, pontho na nyandandanda wa madzina a makolo akale. Pinthu penepi pimbalamusa mphoka, pontho ipyo nkhabe pinthu tayu na pinthu pidasasanya Mulungu kudzapichita, pile pimbadziwika kudzera muna chikhulupiro.

⁵Thangwi ya kupasira ine matongero enewa nkhufuna kuti pakhale kufunana kwakubulukira mumtima wangwiro, chikumbu mtima chadidi, na chikhulupiro chadi-chadi.

⁶Anthu anango abauka kubuluka kuna penepi mbalemwa na mphoka zakusowa basa.

⁷Iwo akufuna kukhala afunzisi a mwambo wa Mose, mbwenye iwo nkhabe vesa tayu mafala penu pinthu pimbalonga iwo mwakukhonda penuka na pang'ono pene.

⁸Tikupidziwa kuti mwambo ngwadidi ngakhala munthu anauphatisa basa mwakuthema.

⁹Ife tikupidziwa pontho kuti mwambo hudasasanyirwe anthu akulungama tayu, mbwenye anyakuswa mwambo na anyakupandukira, anyakukhonda tsalakana Mulungu, pontho na anyakudawika, anyakukhonda chena na anyakukhonda pembedza, anyakupha ababawo penu amawo, mapanga,

¹⁰anthu akuchita uputa pontho akuzuda, anyakuba ana a anzawo, anyakunama, na anyakuchitira umboni wakunama, pontho na onsene anachita pinthu pyakupokanyisana na chifunziso chakuonadi.

¹¹Chifunziso chakuonadichi chimbagumanwa mu Mphangwa Zadidi zidandipasa Mulungu kuti ndizilalike; Mphangwa Zadidi zakubulukira kuna Mulungu wa demelero pontho wa mtsanzayiso.

¹²Ndikupereka takhuta kuna Khristu Yesu Mbuyathu, ule andipasa mphamvu zakuphatira nazo basanga. Ndikupereka takhuta kuna iye thangwi ya kundiyesa munthu wakuthema na kundisankhula kuti ndimphatire basa.

¹³Podi kwene kuti ndidamshola, kumboneresa pontho kumtikana, Mulungu andivera nsisi, thangwi ndzidzi wenewu ndikhali wakukhonda khulupira, natenepo ndikhapichita mwakukhonda dziwa.

¹⁴Mbuyathu, adandikomera mtima pikulu pene mbandipasa chikhulupiro na kufunana pina ifepi thangwi ya kuphatanizana na Khristu Yesu.

¹⁵Uku nkhulonga kwakuonadi kule kwathema kutawirwa monsene mwene pontho kukhulupirwa: Khristu Yesu adadza padziko yapansi kudzapulumusa anthu akudawa. Ine ndikhali wakuipa pyakwangaletu kupiringana iwo,

¹⁶mbwenye Mulungu adandivera nsisi towera Khristu Yesu aonese kupirira kwache kokhonda mala konsene pakuphata kwache basa na ine, munthu wakudawika pyakwangaletu, towera ndikhale upangizi kuna anthu onsene, ale akhamfuna dzamkhulupira mbatambira moyo okhonda mala.

¹⁷Tenepo kuna Mfumu wakukhala na kukhala, okhonda kufa, pontho okhonda oneka, ule ndi Mulungu ene basi, kukhale chilemedzo na demelero kwenda na kwenda! Ameni.

¹⁸Mwananga Timoti ndikukupasa matongero awa mwakutewezana na mphangwa zakubulukira kuna Mulungu zidalongwa kale ene pya iwe zile. Phatisa basa matongero enewo ninga pida towera umenye nkhondo yadidi,

¹⁹pontho koya chikhulupiro chako, pontho na chikumbu mtima chadidi. Anthu anango hadavere chikumbu mtima chawo tayu, natenepo achitisa chikhulupiro chawo kuvungika.

²⁰Pakati pawo pana Himeneo na Alekezanda, atchunyusa ine ale pakuapereka m'manja mwa Satana kuti afunze kuleka kushola Mulungu kunachita iwoko.