Read cisena 1 TIMOTI 2 Bible Online

1 TIMOTI 2 - cisena bible

1 TIMOTI 2

¹Chakutoma pa pyonsene ndikukupemphani kuti mupempherere anthu onsene kuna Mulungu, kumdembetera, kumpempha, pontho kupereka takhuta kuna iye.

²Pemphererani mafumu na atongi onsene, towera tikhale na moyo wakumatama pontho wamtendere, wakulemedza Mulungu monsene mwene, pontho na makhaliro adidi.

³Penepi mphyadidi, pontho Mulungu Nyankhombo wathu ambakomerwa napyo.

⁴Iye ambafuna kuti anthu onsene apulumuswe mbadziwa pyakuonadi.

⁵Thangwi pana Mulungu mbodzi ene basi, pontho pana nyakukhala pakati mbodzi ene basi pakati pa Mulungu na anthu, munthu weneyu ndi Khristu Yesu,

⁶ule adapereka moyo wache kuti aombole anthu onsene. Chenecho chikhali chitsikimizo ndzidzi wache wakuthema kuti Mulungu akufuna kupulumusa anthu onsene.

⁷Tenepo ndi thangwi yache ine ndidatumwa ninga nyakutumwa pontho mfunzisi wa anthu okhonda khala Ayuda kuti ndialalikire mphangwa za chikhulupiro, pontho na zakuonadi. Ine nee ndikunamabi; pinalonga inepi mphyakuonadi.

⁸Ndinafuna kuti konsene kunagumanyikana anthu kupemphera, amuna ale ngakupambulika kuna Mulungu, akwize manjawo m'dzulu kupemphera mwakukhonda zhangali penu kupokanya.

⁹Ine ndinafuna pontho kuti akazi avale mwakuthema mwakupilemedza na mwakupichepesa. Kupithemesera kwawo kuleke khala kwa kusasanya tsisi tayu, penu kuvala golidi, penu usanga wakudula, penu nguwo zakudula.

¹⁰Mbwenye apithemesere na mabasa adidi akuthemerana na akazi, ale ambalonga kuti mbanyakupembedza Mulungu.

¹¹Akazi athema kumatama, pontho kuvera monsene mwene pinafunziswa iwo.

¹²Ine nkhabe tawirisa kuti akazi afunzise penu kukhala na utongi pana amuna tayu, mbwenye athema kumatama.

¹³Thangwi Adamu ndiye adatoma kusasanywa, kubuluka penepo Hava.

¹⁴Si Adamu tayu adanyengezwa ule, mbwenye ndi mkazi adanyengezwa mbaswa mwambo wa Mulungu.

¹⁵Mbwenye mkazi anapulumuka thangwi ya kubala,[1] ngakhala iye anapirira[2] m'chikhulupiro, mukufunana, na m'mtima wakuchena, pontho na mwakupilemedza.