Read cisena 1 TIMOTI 3 Bible Online

1 TIMOTI 3 - cisena bible

1 TIMOTI 3

¹Kulonga uku nkhwakuonadi: Ngakhala munthu ana chipapu kukhala mkadamu wa mpingo,[3] iye akhumba basa yadidi pyakwanga.

²Mkadamu wa mpingo athema kukhala munthu wakusowa chinthu chakumpokanyisa. Akhale mamuna wa mkazi mbodzi,[4] okhonda ledzera, wakuuphata mtima, wakupilemedza, wakutambira alendo mwadidi kumusa kwache, wakukwanisa kufunzisa;

³aleke khala dombe penu wanthonga; mbwenye akhale wakufulika pontho wakufuna mtendere; aleke khala wakukhumba mfuma;

⁴iye athema kukwanisa kufambisa mwadidi banjache, pontho aone kuti anache akumvera na chilemedzo chikulu.

⁵Thangwi ngakhala munthu hanadziwa kufambisa banjache mwadidi tayu, anakwanisa tani kuyang'anira mpingo wa Mulungu?

⁶Iye athema kukhala wakukola m'chikhulupiro, gopesera ananyada mbakonwa ninga mudakonerwa Satana.

⁷Iye akhale munthu wakulemedzwa na anthu okhonda khala akhristu, towera iye aleke khala munthu wakudzesa manyadzo mbakweshwa na msampha wa Satana.

⁸Anyakuphedzera mumpingo[5] athema kukhalambo anthu a makhaliro adidi, pontho kulonga pinthu na mtima wakuonadi; aleke kumwa pyakwanga pyakuledzeresa, penu kuikha mtima pakobiri.

⁹Iwo athimize kuphatisa chikhulupiro chakuzwika chakuonadi na chikumbu mtima chadidi.

¹⁰Chakutoma iwo ayeswe, tenepo ngakhala anapikwanisa, penepo iwo athema kuphata basa.

¹¹Akazawombo[6] athema kukhala na makhaliro adidi, pontho aleke khala atsweda, penu akuledzera, mbwenye akukhulupirika papyonsene.

¹²Nyakuphedzera mumpingo athema kukhala na mkazi mbodzi ene basi,[7] pontho akhale wakukwanisa kuyang'anira mwadidi anache na banjache ene.

¹³Anyakuphedzera ale ambaphata basa mwadidi ambapichemerera okha ene mbiri yadidi. Pontho ambawanga mtima pakulonga pya chikhulupiro chawo pana Khristu Yesu.

¹⁴Pinalemba ine kalatayi kuna iwe, ndikudikhira kubwera kweneko chinchino pano kuti ndikuone.

¹⁵Mbwenye ngakhala ndinachita nthontho, kalatayi inakudziwisa makhaliro athema ife kukhala nawo m'banja ya Mulungu, ile ndi mpingo wa Mulungu wamoyo, pontho mzati wakuphatisa nawo pyakuonadi.

¹⁶Nkhabe mbodzi anakwanisa kukhonda kukula kwachita pyakubisika pya chipembedzo chathu: Iye adaonekera na manungo a umunthu, adaoneswa na Mzimu Wakuchena kuti ngwakulungama,[8] pontho adaoniwa na angelo. Iye adalalikwa pakati pa madzinza onsene, anthu onsene a padziko yapansi mbamkhulupira, pontho iye adakwatwa kwenda kudzulu.