Read cisena 1 TIMOTI 4 Bible Online

1 TIMOTI 4 - cisena bible

1 TIMOTI 4

¹Mzimu Wakuchena akulonga mwakuveka kuti nsiku zakumalisa anthu anango anataya chikhulupiro chawo. Iwo anavera mizimu yakunama mbateweza pifunziso pya mizimu yakuipa.

²Pifunziso ninga penepi pimbavekeswa na anthu akunama, ale chikumbu mtima chawo ntchakufa, khala ninga chapya na simbi yakupisa.

³Anthu ninga enewa ambafunzisa kuti kukazhali na kudya pinango nkhudawa. Mbwenye Mulungu adasasanya phoso yeneyi kuti idyiwe na anthu akukhulupira, adzindikira pyakuonadi ale, iwo angamala pereka takhuta kuna Mulungu.

⁴Chinthu chonsene chidasasanya Mulungu ntchadidi: nkhabe chinthu chathema kukhondwa tayu, mbwenye pyonsene pyathema kutambirwa na kupereka takhuta kuna Mulungu,

⁵thangwi mafala a Mulungu na kupemphera ndiye pimbachitisa kuti pyakudyapyo pitawirwe pamaso pa Mulungu.

⁶Ngakhala unapereka matongero enewa kuna abale, unakhala nyabasa wadidi wa Khristu Yesu, wakukulira m'chikhulupiro na m'chifunziso chakuonadi, chatewera iwe chile.

⁷Mbwenye khonda pithankano pyakusowa basa, pile mphyakukhonda thema kupilonga, m'mbuto mwache thimiza masenzeka akulemedza nawo Mulungu.

⁸Masenzeka akuwangisa manungo ngakuganyalisa, mbwenye moyo wakulemedza Mulungu ngwakuganyalisa pyakwanga monsene mwene, thangwi umbachitisa kudumbira kukwane-kwane kuna moyo uno, pontho na kuna moyo unafuna kudzawo.

⁹Kulonga uku nkhwakuonadi, kule kwathema kutambirwa, pontho kukhulupirwa monsene mwene.

¹⁰Ife timbaphata basa mwakuwangisa[9] thangwi taikha chidikhiro pana Mulungu wamoyo, ule ndi Nyankhombo wa onsene maka-maka wa anthu akukhulupira.

¹¹Pereka kuna iwo matongero na pifunziso penepi.

¹²Leka tawirisa munthu unango kuti akululupise thangwi ndiwe mphale. Mbwenye khala upangizi kuna anyakukhulupira kudzera muna malongero ako, makhaliro ako, kufunana kwako, chikhulupiro chako pontho na ungwiro wako.

¹³Upipereke pa kuwerengera anthu mafala a Mulungu pakwecha, kualalikira, pontho na kuafunzisa, mpakana ndibwere kweneko.

¹⁴Onesesa kuti ukuphatisa basa mtukwa wauzimu, ule udapaswa iwe kudzera muna mphangwa zakubulukira kuna Mulungu, pontho pidasanjikwa iwe manja na akulu-akulu a mpingo.

¹⁵Piphatise basa penepi, pontho upipereke wekha ene kuna ipyo, towera anthu onsene aone kuti moyo wako wachikhristu ukuthimiza kukula.

¹⁶Yang'anira makhaliro ako, pontho na chifunziso chako. Thimiza kuchita penepi, thangwi ungachita tenepo, unapipulumusa wekha ene pabodzi na anthu, ale ambava mafalako.