Read cisena 1 TIMOTI 5 Bible Online

1 TIMOTI 5 - cisena bible

1 TIMOTI 5

¹Leka kulongera munthu wamkulu, mbwenye umdembetere khala ninga babako. Aphale ukhale nawo ninga abale ako,

²akazikulu ninga amamako, atsikana ninga anyamaingako na mtima wangwiro monsene mwene.

³Tsalakana amamfelwa achikazi, ale nkhabeletu munthu na mbodzi ene wakuaphedza.

⁴Mbwenye ngakhala mamfelwayo ana anache, penu pidzukulu, iwo chakutoma adziwe kuchita pinthu pinalonga chipembedzo chawo pakutsalakana anthu a pabanja pawo. Pakuchita tenepo akupagali makolo awo na ambuyawo, thangwi penepi ndiye pimbakomera Mulungu.

⁵Mamfelwa, ule nkhabeletu munthu na mbodzi ene wakumphedza, ambaikha chidikhiro chache pana Mulungu, pontho ambapemphera mwakukhonda lekeza kuna Mulungu mosiku na masikati kuti amphedze.

⁶Mbwenye mamfelwa, ule ambapitsanzayisa yekha ene na pinthu pya dziko yapansi, weneyo akhala ninga afa kale, podi kwene kuti akhale pyache na moyo tani.

⁷Pereka matongero enewa kuna anthu, towera iwo aleke khala na chinthu chakuapokanyisa.

⁸Mbwenye ngakhala munthu hambatsalakana abale ache tayu, maka-maka a pabanja pache, weneyo akhonda chikhulupiro chache, pontho ngwakuipa pyakwanga kupiringana munthu okhonda khulupira.

⁹Leka kuikha mamfelwa panyandandanda wa amamfelwa angakhonda kwanisa pyaka makumatanthatu pyakubalwa. Kuthimiza penepo akhale mkazi wakuti adasembwa kwene kabodzi basi,[10]

¹⁰pontho akhale wakudziwika thangwi ya mabasache adidi ninga kukuza anache mwadidi, kutambira alendo mwadidi kumusa kwache, kutsuka manyalo a anthu a Mulungu, na kuphedza anthu panyatwa zawo, pontho wakupipereka kuchita mabasa adidi.

¹¹Mbwenye leka ikha panyandandanda amamfelwa achitsikana; thangwi pikhumbo pyawo pingaachitisa kufuna kukazhali, iwo anabauka kubuluka kuna Khristu.

¹²Natenepo ambakhala munthu wakudawa thangwi ya kuswa chiverano chawo chakutoma na Mulungu.

¹³Iwo ambafunza kuvunga ndzidzi wawo pakufamba-famba msuwo na msuwo wa anthu anango. Si pyokhapyo tayu, iwo ambafunza kulonga tsweda na kutundukira pya anthu anango, kulonga pinthu pyakukhonda thema kupilonga.

¹⁴Tenepo ndikupifuna kuti amamfelwa achitsikana asembwe, akhale na ana na kutsalakana mwadidi mabanjawo, towera tileke kuapasa mwayi anyamalwathu kutilongera pinthu pyakuipa.

¹⁵Thangwi amamfelwa anango abauka kale kutewera Satana.

¹⁶Mbwenye ngakhala mkhristu unango wachikazi ana amamfelwa panyumba pache, athema kuatsalakana mwadidi, gopesera kunensa mpingo, towera mpingowo utsalakane amamfelwa, ale nkhabeletu munthu na mbodzi ene wakuaphedza.

¹⁷Akulu-akulu a mpingo, ale ambaphata mwadidi basa yaukadamu, athema kulemedzwa pyakwanga pakupagalwi kawiri, maka-maka ale ambaphata basa yakulalika na kufunzisa.

¹⁸Thangwi Malemba akulonga kuti, “Leka manga mulomo ng'ombe uku ikububuda mapira” pontho “Nyabasa athema kupagalwi pyakumthemera.”

¹⁹Leka vera mafala akulongwa mwakupokanyisana na mkulu wa mpingo pangakhonda khala mboni ziwiri penu zitatu.

²⁰Anthu anachita pyakudawawo asumulule pakwecha, towera anangowo achite mantha.

²¹Pamaso pa Mulungu na Khristu Yesu, pontho na pa angelo ndikukupanga mwakugogomeza kuti uvere matongero onsenewa mwachilungamo pontho uchite pinthu mwakukhonda yang'ana nkhope.

²²Leka chimbiza na kusanjika manja munthu kumpambula kuti aphate basa ya Mbuya. Leka kwata khundu pa pyakudawa pya munthu unango; pikoye wekha ene wakuchena mtima.

²³Leka kumwa madzi okha, mbwenye umwe pontho vinyu pang'ono kunyungulusa pyakudya m'mimba mwako podi umbadwala-dwala.

²⁴Kudawa kwa anthu anango kwaoneka kale pakwecha, pontho kudawa kwawo kwatsogola kale katongwa mseru. Mbwenye kudawa kwa anthu anango kumbachita kuatewera m'nduli.

²⁵Montho-monthomo mabasa adidi ambaoneka pakwecha, podi na ale ene okhonda oneka, nkhabe kwanisa kubisika tayu.