Read cisena 2 TIMOTI 2 Bible Online

2 TIMOTI 2 - cisena bible

2 TIMOTI 2

¹Kulonga pya iwe, mwananga, khala wakuwanga kudzera muna kukoma mtima kuna ife mukuphatanizana na Khristu Yesu.

²Kwata pifunziso pidava iwe ndikupifunzisa pamaso pa mboni zizinji pile mbupikoyese kuna anthu akuthembeka, ale anakwanisa kufunzisambo anango.

³Kwatambo khundu pabodzi na ife m'nyatwa ninga nyankhondo wakukhulupirika wa Khristu Yesu.

⁴Nyankhondo wakumenya nkhondo mwaphinga athema nee kukwata khundu papinthu pya nsiku na nsiku tayu ngakhala anafuna kuchitisa mkadamu wache kukomerwa.

⁵Ntchibodzi-bodzi munthu wakuchita bitcha-bitcha yakuthamanga nkhabe tambira tayu mfupo angakhonda vera matongero a bitcha-bitchayo.

⁶Nyakulima wakuphata basa mwakuwangisa athema kukhala wakutoma kutambira khundu yache pa pyakuvuna.

⁷Nyerezera mwadidi pinalonga inepi, thangwi Mbuya anakuchitisa kukwanisa kupivesa mwadidi pyonsenepi.

⁸Kumbuka Yesu Khristu, ule adalamuswa kuimfa, ule akhali chidzukulu cha Davite, ninga mudafunzisirwa ipyo mu Mphangwa Zadidi zimbalalika inezi.

⁹Ine pano ndikubonera, pontho ndamangwa ninga phanga thangwi ndimbalalika Mphangwa Zadidi. Mbwenye mafala a Mulungu hadamangwe tayu,

¹⁰natenepo ndimbapirira pyonsene thangwi ya anthu adasankhulwa na Mulungu ale, towera iwombo agumane chipulumuso kudzera muna Khristu Yesu mbatambira demelero yokhonda mala.

¹¹Kulonga uku nkhwakuonadi: “Ngakhala tidafa naye pabodzi, tinakhala pontho na moyo pabodzi naye.

¹²Ngakhala tinathimiza kupirira, tinatonga naye pabodzi. Ngakhala tinamkhonda, iyembo anatikhonda.

¹³Ngakhala tinakhonda khala akukhulupirika, iye anathimiza kukhala wakukhulupirika thangwi iye nkhabe kwanisa kupikhonda yekha ene tayu.”

¹⁴Kumbusa anthu ako pinthu penepi, pontho uacheuze pikulu pene pamaso pa Mulungu kuti aleke kupokanyisana na pya mafala. Penepi nkhabe ganyalisa tayu, mbwenye pimbavunga kwene anthu akupiveserawo.

¹⁵Wangisira na kuphata pinthu pyadidi kuti ukhale wakutawirwa pamaso pa Mulungu ninga nyabasa ule hambachita manyadzo na basache tayu, pontho wakufunzisa mwadidi mwene mphangwa zakuonadi za Mulungu.

¹⁶Mbwenye thunda mchezo wapezi-pezi okhonda lemedza Mulungu, pontho wakupupwa, ule umbabausa anthu kubuluka kuna Mulungu.

¹⁷Chifunziso chawo chinafala ninga kunyeka kwa chironda. Pakati pawo pana Himeneo na Fileto,

¹⁸ale adabauka kubuluka kuna pyakuonadi pakulonga kuti kulamuka kwa anyakufa kwachitika kale, tenepo akupha chikhulupiro cha anthu anango.

¹⁹Mbwenye maziko akuwanga adaikha Mulungu ale, nkhabe kwanisa kutekenyeka tayu; pontho padzulu pache palembwa mafala awa: “Mbuya ambaadziwa ale ngache,” pontho “Munthu onsene wakulonga kuti iye ngwa Mbuya, athema kuleka pyakudawa.”

²⁰M'nyumba ikulu mumbakhala pyombo pya mtundu na mtundu: pinango mphya siliva pontho golidi, pinango mphya miti pontho dongo; pinangopyo mphyakuphatisira basa yakufunika pyakwanga, pinangombo mphyakuphatisira basa nsiku na nsiku.

²¹Ngakhala munthu anapichenesa yekha ene kubuluka kuna pinthu pyonsene pyakuipa, anaphatiswa basa kupinthu pyakufunika, thangwi iye ngwakupambulika pontho wakufunika kuna Mbuyache, kusasanyika kuti aphatiswe pabasa yonsene yadidi.

²²Thunda pikhumbo pyakuipa pya chiphale, wangisira kukhala na chilungamo, chikhulupiro, kufunana na mtendere, pabodzi pene na anthu ambapembedza Mbuya na mtima wangwiro ale.

²³Mbwenye ukhonde mphoka zakupupwa pontho zakusowa nzeru. Iwe ukupidziwa kuti pinthu ninga penepi mamalisiro ache ambakhala nthonga.

²⁴Nyabasa wa Mbuya hadatheme kukhala wanthonga tayu, mbwenye athema kukhala wakukoma mtima kuna munthu onsene, mfunzisi wakupirira, pontho wadidi.

²⁵Iye athema kusumulula mwakufulika anthu ale anapokanyisana na iye na chidikhiro chakuti Mulungu anapasa mwayi wakuleka pyakudawa pyawo mbadziwa pyakuonadi.

²⁶Tenepo nzeru zawo zinabwereramo mbathawa msampha wa Satana, ule akhadaakwesha mbaachitisa kuvera kufuna kwache.