Read cisena 2 TIMOTI 3 Bible Online

2 TIMOTI 3 - cisena bible

2 TIMOTI 3

¹Kumbuka kuti pansiku zakumalisa kunakhala ndzidzi wakugoswa.

²Anthu anakhala akupifuna okha ene, akuikha mtima pakobiri, akugaya, akudungudza, akutikana, okhonda vera anyakuabala, okhonda pereka takhuta, pontho okhonda pembedza;

³iwo anakhala okhonda funa anzawo, okhonda kuva nsisi, atsweda, okhonda kuuphata mtima, aukali, pontho okhonda funa pyadidi;

⁴iwo anakhala anyakupereka anzawo kuna anyamalwawo, okhonda khala na mantha na pyakugoswa, akunyada pyakwanga, akufuna pinthu pyakuatsanzayisa okha ene m'mbuto mwa kufuna Mulungu;

⁵podi kwene kuti iwo ambaoneka ninga anthu akupembedza, iwo ambakhonda mphamvu zache. Kuna anthu enewa ufunduke.

⁶Anango a iwo ambapita mwaufaka-faka m'nyumba za anthu mbakwesha akazi akufewa, ale alemerwa na mtolo wa pyakudawa mbazunguzika na pikhumbo pyakuipa pya mtundu na mtundu,

⁷akazi ale ndzidzi onsene ambayesa-yesa kuti afunze, mbwenye hanakwanisa kudziwa pyakuonadi tayu.

⁸Ninga montho mudachitira Yane na Yambere kupokanyisa Mose, ntchibodzi-bodzi anthu enewa akupokanyisa pyakuonadi, anthu akuti manyerezero awo ngakupotoka pontho chikhulupiro chawo ntchakuchimwanika.

⁹Kwache penepi iwo nkhabe kwenda napyo kutali tayu, thangwi anthu onsene anaona kupupwa kwachita iwo ninga montho mudachitikira Yane na Yambere.

¹⁰Mbwenye iwe wateweza chifunziso changa, makhaliro anga, na chikhafuna ine m'moyo mwanga; waona chikhulupiro changa, kufulika kwanga, kuafuna kwanga anango, kupirira kwanga,

¹¹kubonereswa kwanga na nyatwa zanga. Iwe ukupidziwa pyonsene pidachitika kuna ine pile m'mizinda ya Antiokea, Ikonio na Listara, kubonera kukulu kudapirira ine kule. Mbwenye Mbuya adandipulumusa mupyonsenepi.

¹²Munthu onsene, ule anafuna kukhala na moyo wakulemedza Mulungu mukuphatanizana na Khristu Yesu, anati abonereswe;

¹³mwenemo anthu akuipa na akunyengeza anango ananyanyiratu kuipa, kunyengeza anthu anango, pontho na iwo enembo kunyengezwa.

¹⁴Mbwenye iwe thimiza kuphatisa pyakuonadi pidafunziswa iwe pile mbupikhulupira na chipapu. Thangwi iwe ukuadziwa adakufunzisa penepi ale,

¹⁵pontho ukukumbuka kuti kutomera uwanako ukudziwa Malemba akuchena, ale anakwanisa kukupasa nzeru zakuti upulumuke nazo kudzera muna chikhulupiro muna Khristu Yesu.

¹⁶Malemba onsene ngakupepeserwa na Mulungu, tenepo iwo ngakufunika[2] kufunzisa nawo chakuonadi, kusumulula chakuipa, kusasanya chakudawika na kupereka matongero a makhaliro akulungama,

¹⁷towera munthu wakuphatira basa Mulungu akhale wakukwana-kwana pontho wakuthema kuphata basa yadidi yamtundu onsene.