Read cisena TITO 2 Bible Online

TITO 2 - cisena bible

TITO 2

¹Mbwenye iwe wathema kufunzisa pinthu pyakutawirizana na chifunziso chakuonadi.

²Funzisa amunakulu kuti aleke kuledzera, akhale anzeru, pontho akuuphata mtima, pontho akhale akuonadi m'chikhulupiro chawo, kufunana na kupirira.

³Chita chibodzi-bodzi kuna akazikulu kuafunzisa kuti akhale na makhaliro akuthemerana na akazi akukhala na moyo wakuchena. Aleke khala atsweda, pontho mabitchu a pyakuledzeresa. Iwo athema kufunzisa pinthu pyadidi,

⁴towera afunzise akazi achitsikana kufuna amunawo na anawo,

⁵kukhala akuuphata mtima, pontho angwiro, kukhala akutsalakana mwadidi pya m'misa mwawo, kukhala akukoma mtima, na akuvera amunawo. Penepo nee mbodzi anakwanisa kulongera pyakuipa mafala a Mulungu tayu.

⁶Chita chibodzi-bodzi kuna amuna achiphale kuawangisa mtima kukhala akuuphata mtima.

⁷Papyonsene iwe ene ukhale upangizi wa makhaliro adidi. Funzisa mwakuonadi mtima, pontho leka funzisa mwadzenda.

⁸Bulusa mafala adidi m'kanwa mwako, towera anango aleke kukusumulula nawo, pontho kuti anyamalwa onsene achite manyadzo pakukhonda kulonga na chakuipa chene pya ife.

⁹Mabitchu athema kuvera ambuyawo mbachita pinthu pyakuakomera ndzidzi onsene. Aleke kutawira ambuyawo mwakuapokanya,

¹⁰penu kuabera pinthu pyawo. M'mbuto mwache aonese kuti iwo ngadidi, pontho akukhulupirika ndzidzi onsene, towera papyonsene pimbachita iwo achitise anthu kukwatika na chifunziso cha Mulungu Nyankhombo wathu.

¹¹Thangwi Mulungu aonesa kukoma kwache mtima towera anthu onsene apulumuke.

¹²Kukoma mtima kweneko kumbatifunzisa kuleka makhaliro okhonda lemedza Mulungu, pontho pikhumbo pya pansi pano. Kumbatifunzisa kuti tikhale akuuphata mtima, akulungama, pontho na moyo wakulemedza Mulungu,

¹³pandzidzi unadikhira ife Nsiku yakutsanzaya, nsiku inafuna dzaoneka demelero ya Mulungu wathu Wamkulu na Nyankhombo Yesu Khristu.

¹⁴Iye adapipereka yekha ene ninga nsembe thangwi ya ife pano, kutipulumusa kuna pyakudawika, pontho kutichitisa kuti tikhale anthu ache akuchena, pontho akuchita phinga kuchita pinthu pyadidi.

¹⁵Penepi ndiye pyathema iwe kupifunzisa, pontho phatisa basa utongi wako onsene ndzidzi unawangisa iwe mtima na kusumulula anyakukuvesera. Nee na mbodzi ene athema kukululupisa tayu.