Read cisena TITO 3 Bible Online

TITO 3 - cisena bible

TITO 3

¹Akumbuse anthu ako pyakuvera mafumu na atongi, pontho kusasanyika kuchita pinthu pyadidi monsene mwene.

²Apange kuti aleke kulonga tsweda anthu anango, mbwenye kuti akhale mwamtendere na mwaushamwali, pontho ndzidzi onsene kukhala akufulika kuna anthu onsene.

³Kale ife tikhalimbo anthu akupupwa, okhonda vera na akunyengezwa. Tikhali mabitchu a pikhumbo pyakuipa na pyakusirira pyamtundu na mtundu. Tikhavunga ndzidzi kuchita pinthu pyakuipa na bivu; anango adazondana nafe, ifembo tidazondana nawo.

⁴Mbwenye pidaoneka kukoma mtima na kutifuna kwa Mulungu Nyankhombo wathu,

⁵iye adatipulumusa, nee na thangwi ya mabasa adidi akhadaphata ife tayu, mbwenye na thangwi ya nsisi zache. Iye adatipulumusa kudzera muna Mzimu Wakuchena pakutisambisa mwakuti tabalwa mwachinchino pontho kuti tina moyo wachinchino.

⁶Mulungu adatikhuthulira mwakuinjipa Mzimu Wakuchena kudzera muna Yesu Khristu Nyankhombo wathu,

⁷towera tiyeswe anthu akulungama pamaso pa Mulungu na kukoma kwache mtima, pontho titambire moyo okhonda mala unadikhira ife ule.

⁸Mafalawa ngakunyindirika. Pinafuna ine mphyakuti iwe udimbirire papinthu penepi, towera anyakukhulupira Mulungu achite mphole-mphole kupipereka kuphata mabasa adidi. Penepi mphyadidi, pontho pyakuganyalisa kuna anthu onsene.

⁹Kwache thunda mphoka zakupupwa, kukumba nyandandanda wa makolo akale, makangano, na kuchita nthonga thangwi ya mwambo wa Mose. Penepi mphyapezi, pontho pyakusowa basa.

¹⁰Mcheuze kabodzi munthu wakulamusa magawikano, kubuluka penepo kachiwiri kache, tenepo angachimwanika leka phatizana naye.

¹¹Iwe ukupidziwa kuti munthu ninga weneyu manyerezero ache ngakupotoka, tenepo pyakudawa pyache pimbatsikimiza kuti iye ngwakukonwa.

¹²Ndingatuma Aritema, penu Tikiko kuna iwe, yesa-yesa kudza kuna ine ku Nikopoli, thangwi ndanyerezera kuti mainja andimalire kweneko.

¹³Yesa-yesa monsene mwene kuphedza Zena, mvunuliri pamiseru, pontho Apolo kuti atome ulendo wawo, pontho uonesese kuti iwo aleke sowa chinthu na chibodzi chene.

¹⁴Anthu athu afunze kupipereka kuchita pinthu pyadidi, towera aphedze panafunika chiphedzopo; iwo athema kukhala anthu akuganyalisa anango.

¹⁵Anthu onsene ali pabodzi na ine kuno akupereka mwenyikiro kuna iwe. Pereka mwenyikiro kuna ashamwali athu m'chikhulupiro. Kukoma mtima kwa Mulungu kukhale namwe monsene.