Read cisena AHEBERI 10 Bible Online

AHEBERI 10 - cisena bible

AHEBERI 10

¹Mwambo wa Chiyuda si chithunzi-thunzi chamumphu cha pinthu pyadidi pinafuna kudzapyo tayu, mbwenye pikuonesa kwene pang'ono pya pinthu chadi-chadi pile. Nsembe zontho-zonthozo zimbaperekwa ndzidzi onsene, pontho chaka na chaka. Apo pinakwanisika tani kuti kudzera muna nsembe zenezi mwambo uchitise anyakudza kuna Mulungu kukhala akuthema monsene mwene?

²Anthu akupembedza Mulungu mbadacheneserwadi pyakudawa pyawo, iwo nee mbadakhala tayu na chikumbu mtima chakuti adadawa, pontho kupereka nsembe mbakudamala.

³Kwache, ninga muna ipyomu, nsembe zimbaperekwa chaka na chaka kukumbusa anthu pyakudawa pyawo.

⁴Thangwi chiropa cha ng'ombe zimuna na cha mbuzi nkhabe kwanisa na pang'ono pene kubulusa pyakudawa tayu.

⁵Thangwi ya penepi, pidadza Khristu padziko yapansi pano, adalonga kuna Mulungu mbati, “Imwe nkhabe funa nsembe, penu pyakupereka tayu, mbwenye imwe mwandisasanyira manungo.

⁶Imwe nkhabe komerwa na nsembe za nyama zakupyerera paguwa, penu nsembe zakubulusira pyakudawa tayu.

⁷Tenepo ine ndidalonga kuti, ‘Ndili pano, Mulungu, kuchita pinafuna imwe, ninga mwalemberwa ipyo pya ine m'bukhu ya mwambo.’ ”

⁸Chakutoma iye adalonga mbati, “Imwe nkhabe funa, penu kukomerwa na nsembe, pontho na pyakupereka, penu na nsembe za nyama zakupyerera, pontho nsembe zakubulusira pyakudawa tayu.” Iye adalonga penepi, podi kwene kuti mwambo ndiye umbatonga kuti pinthu penepi piperekwe.

⁹Tenepo iye adalonga mbati, “Ndili pano, Mulungu, kuchita pinafuna imwe.” Mulungu adabulusa nsembe zakutoma zile towera aikhe nsembe ya Khristu m'mbuto mwazo.

¹⁰Na thangwi yakuti Yesu Khristu adachita pyonsene pidafuna Mulungu kuti iye achite, tenepo tonsenefe tacheneswa kuna pyakudawa thangwi ya nsembe ya manungo ache idachita iye nyamphera-phera kuipereka kabodzi kene basi ile.

¹¹Anyansembe a Chiyuda ambaphata basawo nsiku na nsiku, pontho ambapereka nsembe zibodzi-bodzizo kazinji kene, kwache nsembe zenezi nkhabe kwanisa na pang'ono pene kubulusa pyakudawa tayu.

¹²Khristu adapereka nsembe ibodzi ya kubulusira pyakudawa, nsembe ya mphamvu kwenda na kwenda, tenepo iye adakhala kumadyo kwa Mulungu.

¹³Kweneko iye akudikhira kufikirana Mulungu aikha anyamalwache ninga chakusanjikirapo manyalo ache.

¹⁴Tenepo na nsembe ibodzi ile, iye achitisa anthu ambacheneserwa pyakudawa pyawo ale kukhala akuthema monsene mwene kwenda na kwenda.

¹⁵Mzimu Wakuchena akuchitirambo umboni pya pinthu penepi. Chakutoma iye akulonga mbati,

¹⁶“Chiverano chinafuna ine dzachita na iwo nsiku zinadzazo ntchichi, Mbuya alonga: Ndinaikha matongero anga mumtima mwawo, mbandialemba m'manyerezero mwawo.”

¹⁷Tenepo iye athimiza kulonga mbati, “Ine nkhabeve dzakumbuka pyakudawa pyawo, penu mabasawo akuipa tayu.”

¹⁸Mulungu pyalekerera iye pyonsenepi, penepa nkhabeve funika kupereka nsembe zakubulusira pyakudawa tayu.

¹⁹Tenepo, abale anga, ife tina utumbe onsene wakupita m'Mbuto Yakuchenesesa kudzera muna imfa ya Yesu.

²⁰Iye adatifungulira njira yachinchino yakwendera kuna Mulungu, njira yamoyo kugwanda na pachinguwo chakutchinga nacho mbuto yeneyi, chinguwo chenechi ndi manungo ache.

²¹Podi tina nyansembe Wamkulu, mkadamu wa Nyumba ya Mulungu,

²²natenepo tendeni tidze chifupi na Mulungu na mtima wakuonadi, pontho na chikhulupiro chakukhazikika, na mtima wakucheneswa kuna chikumbu mtima chakutipokanyisa, pontho na manungo akusambiswa na madzi akuchena.

²³Tendeni tiimire dzololo pana chidikhiro chimbatawira ife na mulomo wathu, thangwi tinakwanisa kunyindira Mulungu kuti anachita pinthu pidadumbira iye pile.

²⁴Tendeni tinyerezere pya mule munakwanisa ife kuwangisana mtima unango na mwanzache kukhala akufunana, pontho akuchita udidi,

²⁵mbatilekeni kukhala na nsambo wakukhonda kugumanyikana pabodzi ninga mumbachitira anthu anango. Mbwenye tinyanye kuwangisana mtima unango na mwanzache, thangwi munakwanisa kuona Nsiku yakudza pontho Mbuya ili chifupi.

²⁶Thangwi nkhabeve nsembe inafuna dzabulusa pyakudawa pyathu tayu, ngakhala tinathimiza kudawa chadala mwenemo tadziwadi pyakuonadi pya Mphangwa Zadidi.

²⁷Chinthu chasala na ife ntchakuti tidikhire mwamantha kutongwa mseru, pontho moto wakugoswa unafuna dzavunga anthu ambapokanya Mulungu ale.

²⁸Munthu anakhonda vera mwambo wa Mose, ambaphiwa mwakukhonda verwa nsisi ngakhala pana mboni ziwiri, penu zitatu zakulonga kuti iye adawa.

²⁹Apo, ndi tani na munthu wakululupisa Mwana Mulungu, munthu ule ambaipisa chiropa cha chiverano cha Mulungu, chile chimbamchenesa kuna pyakudawa pyache, pontho ule ambatikana Mzimu, nyakutionesa kukoma mtima kwa Mulungu? Nyerezerani, munthu ninga weneyu athema kutchunyuswa pikulu tani!

³⁰Thangwi timbamdziwa ule adalonga kuti, “Kubwezera nkhwanga, ndinati ndibwezere”; pontho ule adalonga kuti, “Mbuya anatonga mseru anthu ache.”

³¹Ntchinthu chakugoswa kugwa m'manja mwa Mulungu wamoyo!

³²Kumbukani mukhali imwe kale mule. Ndzidzi wenewo, pidasanduka imwe kwene kukhala akhristu, mudaona nyatwa zizinji kwache imwe hamudakundwe nazo tayu.

³³Ndzidzi unango imwe mukhatikanwa, pontho mukhabonereswa pakwecha, ndzidzi unango imwe mudakhala pabodzi na ale adasanyiswa ninga mudachitirwambo imwe.

³⁴Imwe mudasanyika pabodzi na anyaperezo, pontho pidapokoserwa imwe pinthu pyanu pyonsene, mudapirira mwakukomerwa, thangwi mukhapidziwa kuti muna mfuma inango yadidi yakukhala na kukhala.

³⁵Natenepo lekani kutaya mtima, thangwi ngakhala munathimiza kuwanga mtima munatambira mfupo ukulu.

³⁶Imwe mwathema kukhala akupirira, towera muchite pinafuna Mulungu, pontho mutambire pinthu pidadumbira Mulungu pile.

³⁷Thangwi, ninga mudalongera Malemba kuti, “Ndzidzi pang'ono basi, nyakufuna kudza ule, anati adzedi; iye nkhabe dzadembuka tayu.

³⁸Kwache anthu anga akulungama, anati akhulupire mbakhala na moyo; mbwenye ngakhala mbodzi pakati pawo anabwerera m'nduli, ine nkhabe dzakomerwa naye tayu.”

³⁹Ife si ife anthu akubwerera m'nduli, penu akutayika ale tayu. M'mbuto mwache ndife anthu akukhala na chikhulupiro, pontho akupulumuka ale.