Read cisena AHEBERI 11 Bible Online

AHEBERI 11 - cisena bible

AHEBERI 11

¹Kukhala na chikhulupiro nkhukhala okhonda penuka na pinthu pinadikhira ife dzatambira, pontho kutsikimiza kuti pinthu pyokhonda oneka pilipo.

²Na thangwi ya chikhulupiro chawo makolo akale adachitirwa umboni na Mulungu.

³Ntchikhulupiro chimbatichitisa kuvesa kuti dziko yonsene idalengwa na mafala a Mulungu, pontho kuti pinthu pyakuoneka pidasasanywa kubulukira kupinthu pyokhonda oneka.

⁴Ntchikhulupiro chidachitisa Abele kupereka kuna Mulungu nsembe yadidi kupiringana ya Kaini. Na thangwi ya chikhulupiro chache Mulungu adamchitira umboni kuti iye ngwakulungama, pontho adakomerwa na pyakupereka pyache. Pidachita Abele kudzera muna chikhulupiro chache, pikuthimiza kulonga basi na lero, podi kwene kuti iye afa.

⁵Ntchikhulupiro chidachitisa Enoki kukwatwa kwenda kudzulu kuna Mulungu mwakuti iye hadafe tayu. Tenepo nee mbodzi adakwanisa kumgumana tayu, thangwi Mulungu akhadamkwata. Malemba akulonga kuti Enoki mbadzati kwatwa kwenda kudzulu, Mulungu adakomerwa naye pyakwanga.

⁶Kusowa chikhulupiro nkhabe munthu anakwanisa kuchitisa Mulungu kukomerwa tayu, thangwi munthu onsene wakudza kuna Mulungu, athema kukhulupira kuti Mulungu alipodi, pontho kuti ambafupa anthu ambamsaka-saka ale.

⁷Ntchikhulupiro chidachitisa Nowa kuvera kumcheuza kudachita Mulungu papinthu pikhafuna kudza m'tsogolo pile, pinthu pyakuti pidadzati oneka tayu. Iye adavera Mulungu mbasasanya chimwadiya mule mudapulumukira iye na banjache. Pakuchita tenepo iye adachitisa anthu a padziko yapansi kukonwa, tenepo Nowa adayeswa munthu wakulungama na Mulungu ninga mumbayesera iye akulungama anthu anango akhali na chikhulupiro ale.

⁸Ntchikhulupiro chidachitisa Abrahamu kuvera kumchemera kudachita Mulungu kuti abuluke m'dziko mwache kwenda kudziko ikhadadumbira Mulungu kuti anampasa ile. Tenepo iye adabuluka m'dziko mwache mule mwakukhonda dziwa kukhaenda iye.

⁹Ntchikhulupiro chidamchitisa kuti iye akwanise kukhala ninga mlendo m'dziko idadumbira Mulungu kumpasa ile. Iye adakhala m'makumbi ninga mudachitira Isake na Yakobo m'nduli mwache, ale adatambira pinthu pyonthopyo pidadumbira Mulungu kuna Abrahamu.

¹⁰Thangwi Abrahamu akhadikhira mzinda udatandwa na kumangwa na Mulungu, mzinda una maziko akukhazikika ule.

¹¹Ntchikhulupiro chidachitisa Abrahamu kukhala baba, podi kwene kuti iye akhali wakukalamba pyakwanga, pontho Sara akhali wakuuma nthumbo. Iye[5] adanyindira Mulungu kuchita pidadumbira iye pile.

¹²Ndi thangwi yache muna munthu mbodziyu, ule akhali ninga munthu wakufa, mudabuluka pidzukulu pyakuinjipa ninga nyenyezi, pontho pyokhonda lengeseka ninga tchetcha ya pagombe.

¹³Tenepo onsenewa adathimiza kukhala na chikhulupiro chawo ndzidzi udafa iwo. Iwo hadatambire pinthu pikhadadumbira Mulungu pile tayu, mbwenye adapiona na pakansinzo mbakomerwa napyo. Iwo adatawira pakwecha kuti akhalidi alendo, pontho okhonda khazikika padziko yapansi pano.

¹⁴Anthu ale ambalonga tenepa, ambaoneseratu kuti akusaka dziko inango ene kuti ikhale yawo ene.

¹⁵Iwo nkhabe nyerezerave pya dziko ikhadasiya iwo ile tayu; iwo mbadachita tenepo, mbadagumana mwayi wakubwererako.

¹⁶M'mbuto mwache iwo akhadatchuwa dziko yadidi, dziko ya kudzulu. Tenepo Mulungu nkhabe chita manyadzo tayu kuti iwo amchemere Mulungu wawo, thangwi iye aasasanyira mzinda.

¹⁷Ntchikhulupiro chidachitisa Abrahamu kupereka mwanache Isake ninga nsembe pandzidzi ukhamyesa Mulungu ule. Abrahamu akhali munthu ule Mulungu akhadadumbira kuna iye, kwache iye adasasanyika kupereka mwanache mbodzi ene ule ninga nsembe.

¹⁸Mulungu akhadalonga kuna iye mbati, “Nkhudzera muna Isake kuti iwe unakhala na pidzukulu pidadumbira ine kuna iwe.”

¹⁹Abrahamu adakhulupira kuti Mulungu anakwanisa kulamusa Isake kuimfa; penepa tinakwanisa kulonga kuti Abrahamu adatambira pontho Isake kubulukira kuimfa.

²⁰Ntchikhulupiro chidachitisa Isake kulongeratu kuna Yakobo na Esau pya mtsanzayiso ukhafuna iwo dzatambira m'tsogolo.

²¹Ntchikhulupiro chidachitisa Yakobo kutsanzayisa ana onsene awiri achimuna a Yosefe iye mbadzati kufa. Iye adatsamira kudzulu kwa ndodo yache mbapembedza Mulungu.

²²Ntchikhulupiro chidachitisa Yosefe, pikhali iye chifupi kufa, kulonga pya kubuluka kwa Aisraele m'dziko ya Iguputo, mbaapangiratu pyakuti iwo achite na mtembo wache, iye angafa.

²³Ntchikhulupiro chidachitisa makolo a Mose kumbisa miyezi mitatu pidabalwa iye. Iwo adaona kuti iye akhali mwana wakubalika, tenepo iwo hadagope matongero a mfumu ule tayu.

²⁴Ntchikhulupiro chidachitisa Mose kukhonda kuchemerwa mwanache wa mwana wamkazi wa mfumu pikhadakula iye.

²⁵Iye adasankhula kusanyika pabodzi na anthu a Mulungu kusiyana na kukomerwa na madyerero a pyakudawa ndzidzi wakuchepa basi.

²⁶Iye adanyerezera kuti kuona nyatwa zikulu thangwi ya Khristu kukhali mfuma ikulu kupiringana mfuma yonsene ya mu Iguputo, thangwi iye adaikha mtima pana mfupo ukhafuna iye dzatambira m'tsogolo ule.

²⁷Ntchikhulupiro chidachitisa Mose kubuluka pyache mu Iguputo mwakukhonda gopa kuzhangali kwa mfumu, thangwi iye akhapirira ninga munthu adaona Mulungu okhonda oneka ule.

²⁸Ntchikhulupiro chidachitisa kuti iye akhazikise Phwando ya Paska, pontho kutonga kuti chiropa chikhwazwe m'misuwo, towera Mngelo Wakupha aleke kupha ana autombo a Aisraele.

²⁹Ntchikhulupiro chidachitisa kuti Aisraele akwanise kuwambuka Nyanza Yakufira khala ninga akhaponda pamtunda, mbwenye pidayesambo Aiguputo kuti achite chibodzi-bodzi, madzi adaabiza.

³⁰Ntchikhulupiro chidachitisa mafufu a mzinda wa Yeriko kugwa mudafamba Aisraele kuuzungulira nsiku zinomwe.

³¹Ntchikhulupiro chidachitisa puta Rahabi kuti aleke kuphiwa pabodzi na anthu adakhonda vera Mulungu ale, thangwi iye adatambira mwadidi anyakuzonda a ku Israele ale.

³²Apo ndithimize basi kulonga? Nkhabe ndzidzi wakukwana wakuti ndilonge pya Gideoni, Baraki, Samisoni, Yefita, Davite, Samuele na maprofeti tayu.

³³Kudzera muna chikhulupiro chawo adamenya nkhondo na madziko onsene mbaakunda. Iwo adachita pinthu pyakulungama mbatambira pinthu pikhadadumbira Mulungu pile. Iwo adafunga milomo ya nkhalamu,

³⁴adathimisa moto wakugoswa mbapulumuka kuphiwa na matalasada. Iwo akhali akusowa mphamvu, kwache adasanduka amphamvu; iwo akhali na mphamvu pankhondo mbakunda anyankhondo achilendo.

³⁵Kudzera muna chikhulupiro akazi adatambira pontho abale akhadalamuswa kuimfa ale. Anango adakhonda pyakusudzulwa ale, adafa pyawo mwakusanyika, towera alamuke kuimfa mbakhala na moyo wadidi.

³⁶Anango adaseluswa mbakwapulwa, anangombo adamangwa na njema mbaikhwa m'perezo.

³⁷Iwo adatemwa na miyala, adachekwa kati na kati, adaphiwa na talasada. Iwo akhafamba uku avala nthembe za mbuzi na mabira, akutcherenga, akusanyiswa, pontho akuvuyiwa.

³⁸Dziko yapansi hikhali yakuthema kukhala anthu enewa tayu. Iwo akhafamba-famba m'tsanga na m'mapiri ninga anthu akuthawa kwawo mbakhala pyawo m'mphako na m'madzimba.

³⁹Anthu enewo ambachitirwa umboni thangwi ya chikhulupiro chawo! Kwache iwo hadatambire pidadumbira Mulungu pile tayu,

⁴⁰thangwi Mulungu akhadanyerezera kudzatichitira chinthu chadidi chene. Pikhafuna iye mphyakuti iwo asanduzwe akuthema monsene mwene, kwache ife tikhalembo pabodzi nawo.