Read cisena AHEBERI 12 Bible Online

AHEBERI 12 - cisena bible

AHEBERI 12

¹Podi tazungulirwa na mwinji ukulu wa umboni, natenepo tendeni titaye pinthu pyonsene pyakutitchinga, pontho pyakudawa pimbatiphatirira msanga-msanga pile, pontho tendeni tithamange na chipapu bitcha-bitcha atoma ifeyu.

²Tendeni tiikhe maso athu pana Yesu, ule ndi nyakutomesa chikhulupiro chathu, pontho nyakuchichitisa kukhala chakuthema monsene mwene. Iye adapirira nyatwa zidaona iye pamtanda, thangwi ya kukomerwa kukhadikhira iye kule; iye hadaikhe konta kufa pamtanda, podi kwene kuti chikhali chinthu chakuchitisa manyadzo, pontho chinchino iye akhala kumadyo kwa mpando wachifumu wa Mulungu.

³Nyerezerani pya iye ule adapirira umalwa ukulu kubulukira kuna anyakudawa! Tenepo imwe lekani kutopa, pontho kutaya mtima.

⁴Mukumenyana kwanu na pyakudawa, si kuti mwapitchinjiriza kale mpakana kubulusa chiropa chanu tayu.

⁵Kadi imwe mwaduwalira mafala akuwangisa mtima, ambakupangani Mulungu ninga anache ale? “Mwananga, vesera Mulungu angakusumulula, pontho leka taya mtima iye angakulongera.

⁶Thangwi Mbuya ambasumulula munthu onsene ambafuna iye, mbatchunyusa munthu onsene ambatambira iye ninga mwanache.”

⁷Pirirani kusanyika kwanu ninga mumbachitira mwana angatchunyuswa na baba; kusanyika kwanu kumbaonesa kuti Mulungu ambakuyesani anache. Mbani mwana ule chipo hadzati tchunyuswa na babache tayu?

⁸Ngakhala imwe nkhabe tchunyuswa ninga mumbachitira anache onsene, penepo si imwe anache chadi-chadi tayu, mbwenye ana auputa.

⁹Nanji-nanji, ababathu a pansi pano akhatitchunyusa, tenepo ife tikhaalemedza. Apo ndi tani kuvera kwathema ife kuchita kuna Babathu wa kudzulu kuti tikhale na moyo!

¹⁰Ababathu a pansi pano adatitchunyusa ndzidzi pang'ono ninga pikhali ipyo pyakuthema kuna iwo, mbwenye Mulungu ambapichita kuti pitiganyalise, towera ife tikhalembo akuchena ninga iye.

¹¹Tingatchunyuswa ndzidzi wenewo pimbaoneka ninga mphinthu pyakutitsukwalisa, nee pyakutichitisa kukomerwa tayu. M'nduli mwache pimbabala kulungama na mtendere kuna anthu ale adafunziswa na kutchunyuswaku.

¹²Natenepo wangisani mikono yanu yakusowa mphamvu na mabondo anu akutetemerawo!

¹³Thimizani kufamba m'njira zakulungama kuti miyendo ya anyakulamala ileke bumbunyuka, mbwenye iwange.

¹⁴Yesani kukhala mwamtendere na anthu onsene, pontho kukhala na moyo wakuchena, thangwi nkhabe munthu anaona Mbuya okhonda khala na moyo wenewu tayu.

¹⁵Khalani m'maso kuti paleke khala unango wakubauka kubuluka kuna kukoma mtima kwa Mulungu. Paleke khala munthu na mbodzi ene wakukhala ninga mmera wakuwawa, ule ungakula umbanensa anthu na kuwawa kwacheko.

¹⁶Khalani m'maso kuti paleke khala munthu na mbodzi ene wakuzuda, penu munthu wakukhonda lemedza Mulungu ninga Esau, ule adagulisa chidzo cha utombo wache na chakudya chibodzi basi.

¹⁷Kubuluka penepo mukupidziwa kuti iye akhafuna kutsanzayiswa na babache, kwache iye adakhonderwa, thangwi hadakwanise kusanduza pikhadachita iye pile tayu; podi kwene kuti iye adapipempha[6] na misozi.

¹⁸Imwe hamudadza ninga mule mudadzera Aisraele kuna pinthu pyakuphatika tayu, kuphiri ya Sinai yakugaka moto na mdima wakugoswa, pontho na chonzi ile,

¹⁹kulira kwa ngoma, pontho na kuveka kwa fala mwakuti pidava anthu falayi, iwo adapempha kuti fala ileke longa pontho,

²⁰thangwi iwo hadakwanise kupirira tayu matongero akuti, “Ngakhala nyama ene yakukhuya phiriyo, yathema kuponyerwa miyala.”

²¹Pinthu pyonsene pikhaoneka pyakugoswa pyakwanga mwakuti Mose adalonga mbati, “Ndikutetemera na mantha!”

²²Mbwenye imwe mwadza kuphiri ya Zioni, pontho kumzinda wa Mulungu Wamoyo, Yerusalemu wa kudzulu, pabodzi na angelo ache pikwi-pikwi.

²³Mwafika kumbuto yakukomerwa kule kumbagumanyana ana autombo a Mulungu, ale madzinawo alembwa kudzulu. Imwe mwadza kuna Mulungu, nyakutonga anthu onsene mseru, pontho mwadza kuna mizimu ya anthu akuchena adachitiswa kukhala akuthema monsene mwene ale.

²⁴Imwe mwadza kuna Yesu, nyakusasanya chiverano chachinchino, pontho kuna chiropa chakuwazwa, chile chimbalonga pya pinthu pyadidiletu kupiringana chiropa cha Abele.

²⁵Onesesani kuti muleke khonda kuvesera iye ambalonga ule. Ale adakhonda kuvesera ule adaapasa mphangwa za Mulungu padziko pano, hadapulumuke tayu. Apo ife tinapulumuka tani ngakhala tinakhonda kuvera nyakulonga kubulukira kudzulu ule?

²⁶Pandzidzi wenewo falache idatekenya dziko yapansi, mbwenye chinchino iye adumbira kuti, “Ndinatekenya pontho nee dziko yapansi yokha tayu, mbwenye na kudzulu kwene.”

²⁷Mafala akuti “pontho” akuonesa pakwecha kuti pyakulengwa pyonsene pinatekenywa na kubuluswa m'mbuto mwapyo, towera pinthu pyakukhonda tekenyeka pikhale kwenda na kwenda.

²⁸Podi ife tatambira ufumu okhonda tekenyeka, tendeni tipereke takhuta na kupembedza Mulungu mwakumkomera, mwakumgopa pontho mwamantha;

²⁹thangwi Mulungu wathu ndi moto wakuvunga.