Read cisena AHEBERI 2 Bible Online

AHEBERI 2 - cisena bible

AHEBERI 2

¹Ndi thangwi yache tathema kukakamira pyonsene pimbava ife, towera tileke kutaya njira.

²Mphangwa zidapaswa makolo athu na angelo zile zikhali na mphamvu zikulu mwakuti munthu adakhonda teweza, penu kuvera mphangwazo ule, adatchunyuswa mwakuthemerana naye.

³Ife nkhabe kwanisa na pang'ono pene tayu kuthawa kutchunyuswa, ngakhala tinakhonda tsalakana chipulumuso chikulu ninga chenechi. Mbuya chakutoma adalonga pya chipulumuso chenechi, tenepo ale adamvesera adatsikimizira kuna ife kuti mphyakuonadi.

⁴Pandzidzi onthowo, Mulungu adathimiza umboni wache kuna umboni wawo pakuchita pidzindikiro na pyakudodomesa pyamtundu onsene, pontho kugawa mitukwa ya Mzimu Wakuchena malingana na kufuna kwache.

⁵Mulungu hadaikhe angelo kuti akhale atongi padziko yachinchino inafuna kudza ile tayu, dziko inalonga ifeyi.

⁶Mbwenye ninga mwalemberwa ipyo panango m'Malemba kuti, “Mulungu, munthu mbani wakuti mumbamnyerezera; munthu wakubalwa na munthu pyache wakuti imwe mumbamtsalakana?

⁷Ndzidzi pang'ono imwe mudamsandusa kukhala wamng'ono kuna angelo; imwe mudamdzoza ufumu na demelero pontho chilemedzo,

⁸mbamuikha pinthu pyonsene pansi pa manyalo ache.” Ipyo pikulonga kuti Mulungu adasasanya munthu kukhala mtongi wa pinthu pyonsene; penepa pikulonga pakwecha kuti mphinthu pyonsene, kwache ife nkhabe ona chinchino munthu kutonga pinthu pyonsene tayu.

⁹Mbwenye timbaona Yesu, ule ndzidzi pang'ono adaikhwa kukhala wang'ono kuna angelo, towera kudzera muna kukoma mtima kwa Mulungu, iye afere anthu onsene. Tikuona chinchino pano kuti adzozwa ufumu na demelero pontho chilemedzo, thangwi ya nyatwa za imfa zidaona iye zile.

¹⁰Pikhali pyakuthema kuti Mulungu, nyakulenga pinthu pyonsene, pontho nyakuchitisa pinthu pyonsene kuthimiza kukhalapo, achitise Yesu kukhala wakuthema monsene mwene kudzera muna nyatwa zidaona iye zile, towera atsogolere ana azinji kuti agawane demelero yache. Thangwi Yesu ndiye nyakuatsogolera kwenda kudemelero.

¹¹Iye ambachenesa anthu kuna pyakudawa pyawo, tenepo iye pabodzi na anthu adacheneswa ale ana Baba mbodzi basi. Ndi thangwi yache Yesu nkhabe manyadzo tayu na kulonga kuti iwo mbabale ache.

¹²Iye akulonga kuna Mulungu mbati, “Ndinati ndipange abale anga pya ukulu wanu; ndinati ndikukuzeni pandzidzi unagumanyikana iwo kukupembedzani.”

¹³Iye akulonga pontho mbati, “Ndinanyindira Mulungu.” Akulonga pontho mbati, “Pano ndina ana andipasa Mulungu ale.”

¹⁴Apo podi ana enewa mbanthu akukhala na manungo na chiropa, Yesuyo adasandukambo munthu ninga iwo. Iye adachita penepi, towera kudzera muna imfache avunge Satana, ule ana utongi pa imfa,

¹⁵pontho kuti asudzule onsene, ale akhali mabitchu moyo wawo onsene thangwi ya kugopa kwawo imfa.

¹⁶Mphyakuveka mwadidi kuti ale ambaphedza iye si angelo tayu, mbwenye ninga mwalembera m'Malemba kuti, “Iye ambaphedza pidzukulu pya Abrahamu.”

¹⁷Na thangwi ya penepi iye akhadathema kukhala ninga abale ache monsene mwene kuti akhale Nyansembe Wamkulu wakukhulupirika, pontho wansisi pakutumikira kwache Mulungu, towera pyakudawa pyonsene pya anthu pilekererwe.

¹⁸Tenepo chinchino iye anakwanisa kuphedza anthu ali pakati pa mayesero ale, thangwi iye makayo akhalimbo pakati pa mayesero na kubonera kwene.