Read cisena AHEBERI 3 Bible Online

AHEBERI 3 - cisena bible

AHEBERI 3

¹Abale anga akuchena, ale ambachemerwa na Mulungu! Nyerezerani pya Yesu, ule adatuma Mulungu kudzakhala Nyansembe Wamkulu wa chikhulupiro chimbatawira ife chile.

²Iye akhali wakukhulupirika kuna Mulungu, adamsankhula kuphata basa yeneyi ule, sasawambo na mudakhulupirika Mose pabasache m'Nyumba ya Mulungu.

³Munthu anamanga nyumba ambalemedzwa pikulu kupiringana nyumbayo, sasawambo Yesu athema kulemedzwa pikulu kupiringana Mose.

⁴Nyumba zonsene zimbamangwa na anthu, mbwenye Mulungu ndiye nyakumanga pinthu pyonsene.

⁵Mose akhali wakukhulupirika ninga nyabasa m'Nyumba yonsene ya Mulungu, tenepo iye adachitira umboni pya pinthu pikhafuna dzalonga Mulungu kutsogolo.

⁶Mbwenye Khristu ninga Mwana, ngwakukhulupirika kuyang'anira Nyumba ya Mulungu. Tenepo ife ndife nyumbache, ngakhala tinathimiza kuwanga mtima, pontho kudikhira pinthu pinafuna ife dzatambira.

⁷Tenepo, ninga mumbalongera Mzimu Wakuchena kuti, “Mungava fala ya Mulungu lero,

⁸lekani kuumisa mtimanu, ninga mudachitira makolo anu ndzidzi udagalukira iwo Mulungu, ninga mukhali iwo m'thando yatchetcha nsiku idayesa iwo Mulungu ile.

⁹Mulungu alonga kuti: Kweneko iwo adandiyesa na kundisosa podi kwene kuti adaona pinthu pidachita ine pyaka makumanayi.

¹⁰Tenepo ndidazhangali na anthu enewa mbandilonga kuti, ‘Ndzidzi onsene iwo nkhabe khulupirika tayu, pontho ambakhonda kuvera matongero anga.’

¹¹Ndidazhangali mbandiadumbirira kuti, ‘Iwo nkhabe dzapita tayu m'dziko ile ikhafuna ine kuapumisa.’ ”

¹²Anyakukhulupira anzanga, khalani m'maso kuti pakati panu paleke khala munthu na mbodzi ene wakukhala na mtima wakuipa, pontho okhonda khulupira mwakuti iye ambabauka kubuluka kuna Mulungu wamoyo.

¹³Mbwenye, kuti paleke khala na mbodzi ene pakati panu wakunyengezwa na pyakudawa mbaumisa mtimache, imwe mwathema kuwangisana mtima unango na mwanzache nsiku na nsiku, ndzidzi una ife na mafala m'Malemba akuti “Lero.”

¹⁴Ife tonsene ndife anzache a Khristu tingapirira kufikirana kumamalisiro na chidikhiro chikhali na imwe pakutoma chile.

¹⁵Penepi ndiye pinalonga Malemba kuti, “Mungava fala ya Mulungu lero, lekani kuumisa mtimanu ninga mudachitira makolo anu ndzidzi udagalukira iwo Mulungu.”

¹⁶Mbani anthu adava fala ya Mulungu mbamgalukira? Mbanthu adabuluswa na Mose m'dziko ya Iguputo ale.

¹⁷Mbani adazhangalirwa na Mulungu pyaka makumanayi? Mbanthu adadawa mbafera m'thando yatchetcha ale.

¹⁸Pidadumbira Mulungu mbati, “Iwo hanapita m'dziko ikhafuna ine kuapumisa ile tayu,” iye akhalonga ani? Akhalonga anthu akupandukira ale.

¹⁹Chinchino tikupiona kuti iwo hadakwanise kupita m'dziko mule, thangwi iwo hadakhulupire tayu.