Read cisena AHEBERI 4 Bible Online

AHEBERI 4 - cisena bible

AHEBERI 4

¹Chinchino Mulungu adumbira kuti tinatambira kupuma kudalonga iye kule. Tendeni tichite mphole-mphole kuti paleke gumanwa na mbodzi ene wa imwe wakuchimwana kutambira kupumaku.

²Thangwi ife tava Mphangwa Zadidi ninga mudachitira iwombo. Iwo adava mphangwa za Mulungu, kwache nee zidaaganyalira tayu, thangwi pidaziva iwo hadazitambire na chikhulupiro tayu.

³Ife anyakuzikhulupira, timbatambira kupuma kudalonga Mulungu kule. Pili ninga montho mudalongera iye kuti, “Ndidazhangali mbandidumbira kuti: ‘Iwo nkhabe dzapita tayu m'dziko ikhafuna ine dzaapumisa ile!’ ” Iye adalonga penepi pikhadamalisa iye kulenga dziko yapansi.

⁴Panango m'Malemba penepi pyalongwa pya Nsiku Yakupuma kuti: “Mulungu adapuma pabasache yonsene pansiku yachinomwe.”

⁵Pyonthopi pyalongwa pontho kuti, “Iwo nkhabe dzapita tayu m'dziko ikhafuna ine dzaapumisa ile.”

⁶Ale adatoma kuva Mphangwa Zadidi hadatambire kupuma kule, thangwi iwo hadakhulupire tayu. Mbwenye pana anango ale atawiriswa kutambira kupumako.

⁷Ndi thangwi yache Mulungu adaikha nsiku inango ile imbachemerwa kuti “Lero,” pidalonga iye pyaka pizinji pene pidagwanda pile kudzera muna Davite m'Malemba akuti, “Ngakhala imwe munava fala ya Mulungu lero, lekani kuumisa mtimanu.”

⁸Ngakhala Yoswa akhadapasa anthu kupuma kukhadadumbira Mulungu kule, m'nduli mwache Mulungu nee mbadalonga pya nsiku inango tayu.

⁹Tenepo ninga muna ipyo, kupuma kwa anthu a Mulungu kwathimiza kukhalapo ninga kupuma kudachita Mulungu pansiku yachinomwe ile.

¹⁰Munthu anatambira kupuma kudadumbira Mulungu kule, anapuma pabasache, sasawa ninga mudapumira Mulungu pabasache.

¹¹Apo, tendeni tichite phinga kuti titambire kupumaku, towera paleke khala mbodzi pakati pathu wakupichimwana ninga mudachitira iwo, thangwi ya kusowa kwawo chikhulupiro.

¹²Mafala a Mulungu ngamoyo, pontho akuphata basa mwamphamvu, akutwa kupiringana talasada yakutwa uku na uku. Iyo imbalasa m'bwaloletu kufikirana kule kudagumana moyo na mzimu, pontho na kule kudagumana mfundo na mnongo-nongo wa m'magogodo. Imbatonga pikhumbo na pyakunyerezera pya mtima wa munthu.

¹³Nkhabe chinthu chingabisike kuna Mulungu tayu; pyakulengwa pyonsene mphyakufununkhulwa, pontho mphyakuoneka pamaso pache. Iye ndiye anatitonga mseru papyonsene pyachita ife.

¹⁴Apo, tendeni tiphatise chikhulupiro chimbatawira ife. Thangwi tina Nyansembe Wamkululetu, ule afikiratu pamaso pa Mulungu, Yesu Mwana Mulungu.

¹⁵Nyansembe wathu Wamkulu ngwakuva nsisi na kusowa kwathu mphamvu. Nyansembe wathu Wamkulu adayeswa monsene mwene ninga mumbayeserwa ifembo, kwache iye hadadawe tayu.

¹⁶Apo, tendeni tikhale akuwanga mtima mbatifendedzeni kuna mpando wachifumu wa Mulungu, kule kuna kukoma mtima. Kweneko tinaverwa nsisi, pontho tinagumana kukoma mtima kule kunafuna dzatiphedza pandzidzi onthowo unakufuna ife.