Read cisena AHEBERI 5 Bible Online

AHEBERI 5 - cisena bible

AHEBERI 5

¹Nyansembe Wamkulu onsene ambasankhulwa kubulukira pakati pa anthu anzache mbaikhwa kutumikira Mulungu m'mbuto mwawo, kupereka mitukwa na nsembe thangwi ya pyakudawa.

²Podi iye maka ngwakusowa mphamvu papinthu pizinji, anakwanisa kupirira mwakufulika na anthu okhonda dziwa pinthu, pontho ambachita umambala ale.

³Podi iye ngwakusowa mphamvu, athema kupereka nsembe, nee na thangwi ya pyakudawa pya anthu pyokha tayu, mbwenye na thangwi ya pyakudawa pyache pene.

⁴Nkhabe munthu ambapipasa yekha ene chilemedzo kukhala Nyansembe Wamkulu tayu, mbwenye munthu athema kuchemerwa na Mulungu kuti akhale Nyansembe Wamkulu ninga mudachitira Aroni.

⁵Sasawambo na Khristu, iye hadapipase yekha ene chilemedzo chakukhala Nyansembe Wamkulu tayu. M'mbuto mwache Mulungu ndiye adapilonga kuna iye mbati, “Iwe ndiwe Mwananga, lero ndasanduka Babako.”

⁶Iye adalonga pontho panango mbati, “Iwe unakhala nyansembe wakukhala na kukhala munyandandanda wa unyansembe wa Melekizedeki.”

⁷Pandzidzi ukhali Yesu na moyo padziko yapansi adapemphera na kudembetera kuna Mulungu mwakugaluza fala, pontho na misozi, kuna nyakukwanisa kumpulumusa kuimfa ule. Mulungu adamva thangwi iye akhali wakupichepesa, pontho wakupipereka kuna Mulungu.

⁸Podi kwene kuti iye akhali Mwana Mulungu, iye adadziwa kukhala wakuvera kudzera m'nyatwa zidaona iye zile.

⁹Pikhadachitiswa iye kukhala wakuthema monsene mwene, iye adasanduka phata ya chipulumuso chokhonda mala cha anthu onsene akumvera,

¹⁰tenepo Mulungu adamuikha kukhala Nyansembe Wamkulu munyandandanda wa unyansembe wa Melekizedeki.

¹¹Pana pizinji pyakuti tilonge pya penepi, mbwenye mphyakunensa kukufuthulirani, thangwi ndimwe anthu okhonda vesa msanga.

¹²Ndzidzi wakukwana mukhali nawo wakuti imwe mbamudakwanisa kukhala afunzisi, kwache munafuna unango wakuti akufunziseni pontho basi chifunziso chakutoma cha mphangwa za Mulungu. M'mbuto mwa kudya pyakudya pyakuuma, imwe mwathema basi kuti mumwe mkaka.

¹³Munthu wakumwa mkaka okha, weneyo ndi kachiya basi wakukhonda dziwa chifunziso chakuti pyakulungama ninji.

¹⁴Pyakudya pyakuuma mphya akulu, ale pakuphatisa basa manyerezero awo ndzidzi ukulu ene anakwanisa kusiyanisa pinthu pyadidi na pyakuipa.