Read cisena AHEBERI 6 Bible Online

AHEBERI 6 - cisena bible

AHEBERI 6

¹Apo, tendeni m'tsogolo na chifunziso chakukola, pontho tisiye chifunziso chakutoma cha mphangwa za Chikhristu. Mbatileke kumanga pontho maziko akulonga pya kuleka makhaliro akudzesa imfa, pontho pya kukhulupira Mulungu;

²pya chifunziso cha pya maubatizo[2] pontho na pya kusanjika manja; pya kulamuka kwa anthu kuimfa, pontho pya kutonga miseru kwakukhala na kukhala kunafuna dzachita Mulungu.

³Tendeni m'tsogolo! Ngakhala Mulungu anatitawirisa, tinachita pinthu penepi.

⁴Pinakwanisika tani kuti anthu ale akhonda chikhulupiro chawo kubwezwa kuti aleke pontho pyakudawa pyawo. Iwo ndzidzi unango akhalimbo m'cheza cha Mulungu; iwo adalawa mtukwa wa kudzulu mbatambira pabodzi na anthu anango Mzimu Wakuchena;

⁵iwo adalawa udidi wa mafala a Mulungu, pontho adava mphamvu za ndzidzi unadza m'tsogolowo.

⁶Tenepo iwo angakhonda chikhulupiro chawo, si pyakukwanisika tayu kuti iwo abwezwe kuleka pontho pyakudawa pyawo, thangwi penepa iwo akukhomera pontho Mwana Mulungu pamtanda kupichemerera okha ene nyatwa, pontho kumchitisa kululupiswa pakwecha.

⁷Mulungu ambatsanzayisa mataka ambamwerera mvula kazinji kene ale mbameresa mbewu zimbapereka phoso kuna anyakulima zile.

⁸Mbwenye ngakhala iwo anameresa minga na tsanga, iwo nkhabeve basa tayu, pontho pana kugoswa kwakuti Mulungu anaatemberera; mamalisiro ache nkhuvungwa na moto.

⁹Abale anga apamtima, podi kwene kuti tipilonge pyathu ninga tenepo, ife timbakhulupira kuti muli napyo pinthu pyadidi pile pyatsagana na chipulumuso chanu.

¹⁰Mulungu ngwachilungamo. Iye nkhabe dzaduwalira tayu basa idaphata imwe ile, penu kumfuna kudachita imwe pakuphedza anthu ache, pontho na kuthimiza kuaphedza kunachita imwe chinchinoku.

¹¹Chinafuna ife pyakwanga ntchakuti munthu onsene wa imwe athimize kukhala na chipapu kufikirana kumamalisiro, towera pinthu pinadikhira imwepyo pidzachitikedi.

¹²Ife nkhabe funa kuti imwe mukhale anthu akupolola tayu, mbwenye mukhale ninga ale ambatambira pinthu pidadumbira Mulungu pile kudzera muna chikhulupiro pontho kupirira.

¹³Pidadumbira Mulungu kuna Abrahamu kuchita pikhadalonga iye pile, podi pakhali nkhabe mbodzi wamkulu kupiringana iye, iye adaphatisa basa dzinache ene pidadumbira iye.

¹⁴Iye adalonga mbati, “Ndikudumbira kuti ndinakutsanzayisa pikulu mbandikupasa pidzukulu pizinji.”

¹⁵Abrahamu akhali wakupirira, tenepo iye adatambira pinthu pikhadadumbira Mulungu kuna iye pile.

¹⁶Munthu angadumbira, ambaphatisa basa dzina ya munthu unango wamkulu kupiringana iyeyo, tenepo kudumbirako kumbamalisa mphoka yonsene.

¹⁷Kuna ale adathema kutambira pinthu pidadumbira Mulungu pile, iye akhafuna kuti pikhale pyakuveka mwadidi mwene kuti iye nkhabe sanduza pyakufuna pyache tayu, natenepo kudumbira kudachita iye kule, adakutsikimiza na chiverano.

¹⁸Pana pinthu piwiri, kudumbira na chiverano, pyakuti nkhabe kwanisika kusanduzika, pontho pyakuti Mulungu nkhabe nama tayu. Tenepo ife ale tidathawira kuna iye kuti tikhale pakupata, tiwange mtima kuphatisa chidikhiro china ife chile.

¹⁹Ife tina chidikhiro chenechi ninga mzati wa moyo wathu. Icho ntchokhonda tekenyeka, pontho ntchakutchinjirizwa. Chimbapita na pa chinguwo chakutchinga nacho Nyumba ya Mulungu yakudzulu na kwenderatu kumbuto yakuchenesesa ya m'bwalomu.

²⁰M'mbuto mwathu Yesu apita mwenemo ife mbatidzati, mbakhala nyansembe Wamkulu wakukhala na kukhala, munyandandanda wa unyansembe wa Melekizedeki.