Read cisena AHEBERI 7 Bible Online

AHEBERI 7 - cisena bible

AHEBERI 7

¹Melekizedeki weneyu akhali mfumu wa ku Salemu, pontho nyansembe wa Mulungu Wakudzulu-dzulu. Ndzidzi ukhabwerera Abrahamu kunkhondo kule kudakunda iye mafumu anayi, Melekizedeki adagumana na Abrahamu mbamtsanzayisa,

²tenepo Abrahamu adampasa chakhumi cha pinthu pyonsene pikhadapokosera iye. Dzina ya Melekizedeki chakutoma nkhulonga kuti, “Mfumu wa Kulungama,” pontho na thangwi yakuti iye akhali mfumu wa Salemu, dzina yeneyi nkhulonga pontho kuti, “Mfumu wa Mtendere.”

³Pya babache na mache Melekizedeki, penu pya mbodzi wa makolo ache nkhabe dziwika tayu; pya kubalwa kwache, penu pya imfache nkhabe dziwika. Ninga Mwana Mulungu, iye ambakhala nyansembe kwenda na kwenda.

⁴Apo lero mwaona ukulu wache. Abrahamu, kholo wathu wakuveka, adampasa chakhumi cha pinthu pyonsene pidapokosera iye kunkhondo.

⁵Pidzukulu pya Levi, pile ndi anyansembe, atongwa na mwambo kusonkhesa chakhumi kuna Aisraele anzawo, podi kwene kuti anzawo mphidzukulumbo pya Abrahamu.

⁶Melekizedeki hakhali chidzukulu cha Levi tayu, kwache adasonkhesa chakhumi kuna Abrahamu mbamtsanzayisa, munthu ule Mulungu akhadadumbira kuna iye.

⁷Nkhabe penuka tayu kuti munthu anatsanzayisa anangoyo ngwamkulu pyakwanga kupiringana nyakutsanzayiswayo.

⁸Kulonga pya anyansembe chakhumi chawo chimbasonkheswa na anthu ambafa ale; mbwenye kulonga pya Melekizedeki chakhumi chikhasonkheswa na ule ambalongwa kuti ana moyo, ninga munalongera Malemba.

⁹Tinakwanisa kulonga kuti pidapereka Abrahamu chakhumi, Levi, ule pidzukulu pyache pidasonkhesa chakhumi, adaperekambo.

¹⁰Levi akhali adzati balwa tayu, mbwenye tinakwanisa kulonga kuti iye akhali m'manungo mwa kholo wache Abrahamu, ndzidzi udagumanikana Melekizedeki na iye.

¹¹Kuperekwa kwa mwambo kuna Aisraele udagona pa unyansembe wa Levi. Tenepo unyansembe wa Levi mbudakhala wakuthema monsene mwene, nee mbapadafunikave nyansembe wamtundu unango tayu, ule ali munyandandanda wa unyansembe wa Melekizedeki, nee wa Aroni tayu.

¹²Thangwi unyansembe ungasanduzwa, penepo mwambo wathema kusanduzwambo.

¹³Tenepo Mbuyathu ule pyache pyalongwa penepa, akhali wa dzinza inango, tenepo nee na mbodzi ene wakubulukira m'dzinza yeneyi adatumikira ninga nyansembe tayu.

¹⁴Mphyakudziwika mwadidi mwene kuti iye adabalwa dzinza ya Yuda; tenepo pidalonga Mose pya anyansembe, iye hadalonge pya dzinza yeneyi tayu.

¹⁵Penepi pikuveka mwadidi mwene thangwi ya kufika kwa nyansembe unango ninga Melekizedeki.

¹⁶Iye adaikhwa kukhala nyansembe, nee na thangwi ya kubulukira m'dzinza ya unyansembe malingana na matongero a anthu tayu, mbwenye na thangwi ya mphamvu za moyo okhonda vungika ule.

¹⁷Thangwi Malemba akulonga kuti, “Iwe unakhala nyansembe kwenda na kwenda munyandandanda wa unyansembe wa Melekizedeki.”

¹⁸Tenepo matongero akale aikhwa pakhundu thangwi akhali akusowa mphamvu na akusowa basa.

¹⁹Mwambo wa Mose hudakwanise kusanduza chinthu na chibodzi chene tayu kukhala pyakuthema monsene mwene. Tenepo chinchino chidikhiro chadidiletu chaperekwa chile chinakwanisa kutifikisa chifupi na Mulungu.

²⁰Kuthimiza penepi pana kudumbira kwa Mulungu. Anyansembe anango adapita kwene unyansembe okhonda kudumbirako.

²¹Mbwenye Yesu adakhala nyansembe thangwi ya kudumbira kudachita Mulungu kuna iye pidalonga iye mbati, “Mbuya adumbira, tenepo iye nkhabe dzasanduza manyerezero ache tayu: ‘unakhala nyansembe wakukhala na kukhala.’ ”

²²Na thangwi ya kudumbira kweneku tinakwanisa kuona kuti Yesu ntchitsikimizo cha chiverano chachinchino.

²³Anyansembe a chiverano chakale akhale azinji, thangwi iwo akhafa mbachimwana kuthimiza basawo.

²⁴Mbwenye Yesu ngwakukhala na kukhala, pontho basache ya unyansembe nkhabe dzasiyira unango tayu.

²⁵Tenepo iye anakwanisa chinchino pontho na ndzidzi onsene kupulumusa anyakudza kuna Mulungu kudzera muna iye, thangwi iye alipo ndzidzi onsene kuadembetera kuna Mulungu m'mbuto mwawo.

²⁶Tenepo Yesu ndi Nyansembe Wamkulu ule ambatipasa pinthu pimbasowa ife. Iye ngwakuchena; muna iye nkhabe chinthu chakumpokanyisa, penu chakudawa tayu; iye apambulwa pakati pa anthu akudawa, pontho akwizwa kupiringana pinthu pyonsene pya kudzulu.

²⁷Iye hakhali ninga anyansembe akulu anangowa tayu; iye nkhabe funika kupereka nsembe nsiku na nsiku tayu, chakutoma thangwi ya pyakudawa pyache, angamala penepo, thangwi ya pyakudawa pya anthu. Iye adapichita nyamphera-phera kupereka nsembe kabodzi kene basi, ndzidzi udapipereka iye yekha ene pamtanda.

²⁸Mwambo wa Mose umbasankhula anthu okhonda thema monsene mwene kukhala anyansembe akulu; mbwenye kudumbira kudachita Mulungu kule kudadza m'nduli mwa mwambo wa Mose kumbasankhula Mwana, ule achitiswa kukhala wakuthema monsene mwene kwenda na kwenda.