Read cisena AHEBERI 8 Bible Online

AHEBERI 8 - cisena bible

AHEBERI 8

¹Pyonsene pinalonga ifepi pyagona pakuti tina Nyansembe Wamkulu ninga weneyu, ule akhala kumadyo kwa mpando wachifumu wa Mulungu Wademelero kudzulu.

²Iye ambatumikira ninga Nyansembe Wamkulu m'Mbuto Yakuchenesesa, yeneyi ndi chikhumbi chadi-chadi chidamangwa na Mbuya chile, nee na anthu tayu.

³Nyansembe Wamkulu onsene ambasankhulwa kuti apereke pyakupereka na nsembe za nyama kuna Mulungu, tenepo Nyansembe wathu Wamkulu athema kukhala na pinthu pinango pyakuti apereke.

⁴Iye mbadakhala pansi pano, nee mbadakhala nyansembe tayu, thangwi pano pana anyansembe kale, ale ambapereka pyakupereka pakuteweza mwambo wa Chiyuda.

⁵Basa imbaphata iwo m'mbuto yakuchena ntchithunzi-thunzi cha pinthu pili kudzulu. Ndi thangwi yache Mose, pikhali iye chifupi kusasanya Chikhumbi cha Mulungu, adacheuzwa na Mulungu mbati, “Sasanya Chikhumbicho ninga montho mudaoneserwa iwe paphiri pale.”

⁶Mbwenye chinchino, Yesu apaswa basa ya unyansembe ile njikulu kupiringana yawo, thangwi chiverano chidasasanya iye pakati pa Mulungu na anthu ache ntchadidi kupiringana chakale chile, podi icho chidagona pa kudumbira papinthu pyadidiletu pile.

⁷Ngakhala chiverano chakutoma chile chikhali chakusowa chinthu chakupokanyisa, nee mbapadafunika pontho chinango tayu.

⁸Mbwenye Mulungu adagumana muna anthu chinthu chakuapokanyisa mbalonga mbati, “Mbuya alonga kuti: Nsiku zikudza zile zinafuna dzachita ine chiverano chachinchino na Aisraele, pontho na anthu a ku Yuda.

⁹Icho nee chinakhala ninga chiverano chidasasanya ine na makolo awo chile tayu, pansiku idaaphata ine pamkono kuabulusa m'dziko ya Iguputo. Iwo hadakhulupirike chiverano chidasasanya ine na iwo tayu, natenepo ine ndidaapasa nkhodolo.

¹⁰Chinchino chenechi ntchiverano chinafuna ine dzasasanya na Aisraele nsiku zinadzazo alonga Mbuya: Ndinaikha matongero anga m'manyerezero mwawo, mbandialemba mumtima mwawo. Ndinakhala Mulungu wawo, iwombo anakhala anthu anga.

¹¹Nkhabe dzafunikave munthu na mbodzi ene kufunzisa tsanthembache tayu, penu kulonga kuna mbaleache kuti: ‘Dziwa Mbuya.’ Thangwi onsene, mkulu penu mwana, anandidziwa.

¹²Ndinaalekerera pyakudawa pyawo, tenepo ine nkhabe dzakumbukave umambalawo tayu.”

¹³Kulonga pya chiverano chitswa, Mulungu asanduza chiverano chakutoma chile kukhala chakusowa basa; tenepo chinthu chingasowa basa mbachikalamba, chenecho chinchino nkhabe onekave tayu.