Read cisena AHEBERI 9 Bible Online

AHEBERI 9 - cisena bible

AHEBERI 9

¹Chiverano chakutoma chile chikhali na matongero akupembedzera nawo, pontho na mbuto yakupembedzera yakusasanywa na anthu.

²Chikhumbi chidamangwa. M'subi yakunja, ile ikhachemerwa Mbuto Yakuchena, mukhali chakuikhirapo nyale, thebulu na mikate yakuperekwa kuna Mulungu.

³Kunduli kwa chinguwo chachiwiri chakutchinga nacho kukhali subi yakuchemerwa Mbuto Yakuchenesesa.

⁴M'bwalo mwache mukhali guwa ya golidi yakufukizira pyakununkhira, pontho na Bokosi ya Chiverano yonsene yakukukutizwa na golidi. M'bokosimo mukhali chitomba cha golidi chakudzala na mana, ndodo ya Aroni ikhadaphwitha masamba ile, pontho na miyala miwiri yakusemwa padalembwa matongero pale.

⁵Padzulu pa Bokosi pakhali pyakulengwa pinango pyakukhala na maphaphido kuonesa demelero ya Mulungu; ipyo pidaphimbira na maphaphido awo pambuto pakhalekererwa pyakudawa pale. Mbwenye chinchino sindzidzi wakulonga pinthu pyonsene pya penepi tayu.

⁶Umu ndi mule mukhadasasanywa pinthu pyonsene pile. Nsiku na nsiku anyansembe akhapita m'subi yakunja ya Chikhumbi kaphatamo basawo,

⁷mbwenye m'subi ya m'bwalo akhapitamo ndi Nyansembe Wamkulu ene basi, kwache akhapitamo kabodzi basi pachaka. Iye akhakwata chiropa mbakachipereka kuna Mulungu ninga nsembe yakulekerera nayo pyakudawa pyache, pontho na pyakudawa pikhadachita anthu mwakukhonda kupidziwa.

⁸Mzimu Wakuchena ambafunzisa mwakuveka kubulukira pa masasanyiro enewa kuti njira yakupita m'Mbuto Yakuchenesesa nkhabe fungulirwa tayu, mwenemo subi yakunja ile ilipo basi.

⁹Penepi ntchithunzi-thunzi kwene basi cha pinthu pimbachitika nsiku zinopi. Ipyo pikulonga kuti pyakupereka na nsembe za nyama zakuperekwa kuna Mulungu nkhabe kwanisa kusanduza chikumbu mtima cha nyakupembedza kukhala chakuthema monsene mwene tayu,

¹⁰podi ipyo pikulonga kwene pya pyakudya, pyakumwa, pontho na mitemo yakusiyana-siyana ya kupichenesa nayo. Matongero onsenewa ngakulonga pinthu pyakuchitwa pa manungo. Iwo adaikhwa kwene kuti akhalepo kufikirana ndzidzi wakuti Mulungu asanduze pinthu pyonsene kukhala pyachinchino.

¹¹Mbwenye Khristu adza kale ninga Nyansembe Wamkulu wa pinthu pyadidi pili kale leropi.[3] M'chikhumbi mumbatumikira iye ntchakufunikaletu pontho ntchakuthema monsene mwene, icho ntchakusasanywa nee na anthu tayu; kweneku nkhulonga kuti si cha dziko yakuchita kulengwayi tayu.

¹²Pidapita Khristu m'Mbuto Yakuchenesesa m'chikhumbimo, iye hadapite na chiropa cha mbuzi, penu cha ng'ombe zimuna kachipereka nsembe tayu, mbwenye adapichita nyamphera-phera kupita kabodzi kene basi na chiropa chache chene mbachitisa chipulumuso kukhala chakukhazikika kwenda na kwenda.

¹³Chiropa cha mbuzi na cha ng'ombe zimuna pontho na dotha ya nyama zakupyerera pikhawazwa pana anthu akukhonda chena pamaso pa Mulungu, tenepo penepi pikhaachenesa pakubulusa kukhonda chena kwawo.

¹⁴Apo ndi tani na chiropa cha Khristu, ule kudzera muna Mzimu wakukhala na kukhala, iye adapereka moyo wache ninga nsembe yakuthema monsene mwene kuna Mulungu. Chiropa chache chinachenesa chikumbu mtima chathu kuna mitemo yakupichenesa nayo yonsene yakusowa basa, towera titumikire Mulungu wamoyo.

¹⁵Na thangwi yeneyi Khristu ndiye nyakusasanya chiverano chachinchino, towera ale adachemerwa na Mulungu atambire kutsanzaya kokhonda mala kudadumbira Mulungu kule. Penepi pinakwanisa kuchitika thangwi ya imfa ya Khristu, ile idapulumusa anthu kuna pyakudawa pikhachita iwo ndzidzi ule ukhali iwo na chiverano chakutoma chile.

¹⁶Ngakhala munthu adumbira kusiyira unango mfumache pakuchita kulemba, mphyakufunika kutsikimiza kuti nyakudumbirayo afadi,

¹⁷thangwi kudumbira kweneko nkhabe mphamvu tayu ngakhala nyakudumbira ali m'maso; mbwenye kumbaphata basa mwenechiro angafa.

¹⁸Ndi thangwi yache podi na chiverano[4] chakutoma chene chile chidatoma kuphata basa pakuphatisa basa chiropa.

¹⁹Mose chakutoma adalalika kuna anthu onsene matongero onsene adalembwa m'mwambo ale. Tenepo iye adakwata chiropa cha ng'ombe zimuna na cha mbuzi mbachivungaza na madzi mbachiwaza pana bukhu ya mwambo na pana anthu onsene pakuphatisa basa tsamvu ya hisope na ubweya wakufira wa mabira.

²⁰Iye adalonga mbati, “Ichi ntchiropa chakutsikimizira chiverano cha Mulungu chidakupangani iye kuti muchivere chile.”

²¹Montho-monthomo Mose adawazira chiropa chile pana Chikhumbi cha Mulungu, pontho na pana pinthu pyonsene pikhaphatiswa basa pakupembedza pile.

²²Ndimomwene malingana na mwambo chifupi-fupi pinthu pyonsene pimbacheneswa na chiropa, tenepo ngakhala chiropa nkhabe chuchiswa, penepo pyakudawa nkhabe dzalekererwa tayu.

²³Ngakhala pikhali pyakufunika kuti pithunzi-thunzi pya kudzulupi picheneswe na nsembe zenezi, apo ndi tani na pinthu pyakudzulu makapyo; ipyo pimbafuna nsembe zadidiletu kupiringana zenezi.

²⁴Thangwi Khristu hadapite m'Mbuto Yakuchena yakusasanywa na anthu tayu, ile ikhali kwene chithunzi-thunzi cha mbuto chadi-chadi. Iye adenda kudzulu makako, kule kunaonekera iye chinchino pamaso pa Mulungu thangwi ya ife pano.

²⁵Nyansembe Wamkulu wa Chiyuda ambapita m'Mbuto Yakuchenesesa chaka na chaka na chiropa cha nyama. Mbwenye Khristu hadende kapipereka nsembe yekha ene kazinji kene tayu,

²⁶thangwi mbapidakhala tenepo, iye mbadabonera kazinji kene kutomera pa kulengwa kwa dziko yapansi. M'mbuto mwache chinchino pili ife chifupi na kufika kumamalisiro a ndzidzi uno, iye adapichita nyamphera-phera kuoneka kabodzi kene basi kubulusa pyakudawa pyonsene kudzera muna imfache ninga nsembe.

²⁷Kudaikhwa kuna munthu kufa kabodzi basi, kubuluka penepo atongwe mseru na Mulungu.

²⁸Sasawambo na Khristu adaperekwa nsembe kabodzi basi kubulusa pyakudawa pya anthu azinji. Iye anaoneka kachiwiri, nee kuti abuluse pyakudawa tayu, mbwenye kudzapulumusa anthu anamdikhira ale.