Read cisena YAKOBO 2 Bible Online

YAKOBO 2 - cisena bible

YAKOBO 2

¹Abale anga, podi imwe mumbakhulupira Mbuyathu Yesu Khristu, Mbuya wademelero, lekani kuchitira anthu pinthu mwakuyang'ana nkhope.

²Tisangize tenepa, munthu unango wakufuma, wakuvala mphete ya golidi na nguwo zakubalika adza pamgumano panu, pontho munthu unango wakutcherenga, wakuvala masakala adzambo ponthopo.

³Mungalemedza munthu wakuvala pyadidi ule mbamulonga kuna iye kuti, “Khalani padidipa,” mbamulonga kuna nyakutcherenga ule kuti, “Imira pale,” penu “Khala pansi chifupi na manyalo anga.”

⁴Kadi imwe nkhabe kuona tayu kuti penepa mwasankhula pakusiyanisa pakati panu, pontho kuti mwatonga na manyerezero akuipa?

⁵Veserani kuno, abale anga apamtima! Mulungu adasankhula anthu akutcherenga m'maso mwa anthu a pansi pano kuti akhale akufuma m'chikhulupiro, pontho kutambira Ufumu ule udadumbira iye kupereka kuna onsene ambamfuna ale.

⁶Mbwenye imwe mumbalulupisa anthu akutcherengawo. Ayi, si anthu akufuma ale tayu ambakuboneresani na kukukwekweterani kuna anyakutonga miseru?

⁷Ayi, si onthowo ale tayu ambashola dzina yadidi ya Khristu, ile idapaswa imwe pidasanduka imwe akhristu?

⁸Mbwenye ngakhala munaveradi mwambo ukulu wa Ufumu wa Mulungu ule umbagumanwa m'Malemba akuti, “Funa mwanzako ninga mumbapifunira iwe wekha,” penepo mwachita pinthu pyadidiletu.

⁹Mbwenye ngakhala munachitira anthu pinthu mwakuyang'ana nkhope, penepo mwadawa, pontho mwakonwa thangwi ya kuswa mwambo.

¹⁰Munthu anaswa matongero abodzi, podi kwene kuti akoye anango onsene, penepo iye adawira mwambo onsene.

¹¹Thangwi ule adalonga mbati, “Leka chita uputa,” ngonthoyo adalonga pontho mbati, “Leka chita upandu.” Ngakhala munachita upandu, podi kwene kuti mukhonde chita uputa, imwe mwaswa mwambo basi.

¹²Longani na kuchita ninga anthu ale anatongwa mseru na mwambo, umbadzesa utumbe kuna anthu ule.

¹³Thangwi Mulungu angatonga anthu nkhabe dzavera nsisi tayu ale adakhonda verambo anzawo nsisi. Mbwenye anthu ansisi nkhabe dzagopa kutongwa mseru na Mulungu tayu.

¹⁴Abale anga, pana udidi wanji munthu angalonga kuti ana chikhulupiro, kwache mabasache mbakhonda tsikimizira chikhulupiro chachecho? Ayi, chikhulupiro chenechi chingakwanise kumpulumusa?

¹⁵Tisangize kuti pana abale, penu anyamainga ale akusowa pyakuvala, pontho nkhabe kudya kwakukwana tayu.

¹⁶Pana udidi wanji penepa kuapanga kuti, “Mulungu mbakutsanzayiseni! Valani pyakukhumba, pontho idyani mbamukhuta!” ngakhala hamunaapasa tayu pinthu pinasowa iwo pamoyo wawo?

¹⁷Ntchibodzi-bodzi na chikhulupiro: chikhulupiro chokha, chakusowa mabasa akuchitsikimizira, ntchakufa.

¹⁸Mbwenye munthu unango anati alonge mbati, “Mbodzi ana chikhulupiro, unango ana mabasa.” Penepa kutawira kwanga nkhuku: “Ndionese mule munakwanisira munthu kukhala na chikhulupiro chokha, chakusowa mabasa akuchitsikimizira. Ine ndinakuonesa chikhulupiro changa kudzera muna mabasanga.”

¹⁹Imwe mumbakhulupira kuti pana Mulungu mbodzi yekha basi. Mumbachita pyadidi! Na mizimu yakuipa ene imbakhulupirambo mbaitetemera na mantha.

²⁰Pupwewe! Kadi iwe ukufuna kuoneswa kuti chikhulupiro chakusowa mabasa akuchitsikimizira ntchapezi?[1]

²¹Kholo wathu Abrahamu adayeswa tani wakulungama? Ipyo pidadzera muna mabasa adaphata iye, pidapereka iye mwanache, Isake, paguwa yansembe pale.

²²Iwe unakwanisa kuona kuti chikhulupiro chache na mabasache pikhaphatizana, pontho chikhulupiro chache chidachitiswa kukhala chakuthema monsene mwene, thangwi ya mabasache.

²³Malemba adakwana-kwana ale adalonga kuti, “Abrahamu adakhulupira Mulungu, tenepo na thangwi ya chikhulupiro chache Mulungu adamuyesa wakulungama.” Natenepo Abrahamu adathulwa shamwaliache Mulungu.

²⁴Mwaona, mphapo, kuti munthu ambayeswa wakulungama pamaso pa Mulungu thangwi ya mabasache, nee na chikhulupiro chokha tayu.

²⁵Pikhali chibodzi-bodzi kuna Rahabi, puta ule. Mulungu adamuyesa wakulungama pamaso pache thangwi ya mabasache, pidatambira iye anthu a ku Israele adadza dzazonda ale, mbaaphedza kuthawa na njira inango.

²⁶Natenepo ninga manungo akusowa mzimu ngakufa, sasawambo chikhulupiro chakusowa mabasa akuchitsikimizira ntchakufa.