Read cisena YAKOBO 3 Bible Online

YAKOBO 3 - cisena bible

YAKOBO 3

¹Abale anga, azinji a imwe aleke yesa kukhala afunzisi. Imwe mukupidziwa kuti ife afunzisi tinanyanya kutongwa mseru kupiringana anangowa.

²Tonsenefe timbachita umambala papinthu pizinji. Mbwenye ngakhala munthu anakhonda kuchita umambala papinthu pimbalonga iye, weneyo ngwakuthema monsene mwene, pontho iye anakwanisa kutonga manungo ache onsene.

³Ife timbaikha simbi kukanwa kwa kavalo kuti ativere, tenepo timbakwanisa kumpanga kwenda konsene kunafuna ife.

⁴Nyerezerani pya chimwadiya, kukula ninga kwachita icho kule, chimbagwinywa na mphepo yamphamvu, kwache chimbafambiswa na kang'ombo, tenepo chimwadiya chimbaenda konsene kumbafuna nyakuchapa ule.

⁵Tenepo penepi pili sasawa na lulume; kaphindi ka manungo ninga keneka, kambagaya pya pinthu pikulu-pikulu. Nyerezerani kukula kwachita nsitu unakwanisa kupiswa na kantchasi ka moto!

⁶Tenepo lulume yakhala ninga moto. Iyo ndi dziko yakuipa pakati pa mapindi a manungo. Lulume imbaipisa munthu onsene, pontho imbapisa moyo onsene kutomera kubalwa mpakana kufa, pontho iyo ene imbapiswa na gehena.

⁷Munthu anakwanisa kufuya, pontho afuyadi pyakulengwa pinango pyonsene ninga nyama zam'tsanga, mbalame, nyama zakukambadza na nsomba.

⁸Mbwenye chipo nkhabe munthu adatoma kufuya lulume tayu. Lulume njakuipa, pontho nkhabe sumulululika tayu, njakudzala na pinthu pyakupha.

⁹Timbaiphatisa basa kupereka takhuta kuna Mbuya pontho Babathu, pontho na kutemberera nayo anzathu, adalengwa mwakulandana na Mulungu ale.

¹⁰Mafala akupereka nawo takhuta pontho akutemberera nawo ambabuluka m'kanwa monthomo. Abale anga, penepi pileke chitika.

¹¹Ayi madzi adidi na akuipa angabuluke pamphuno ibodzi?

¹²Abale anga, ayi muti wamkuyu ungabale nsapo zaolivi, penu mtawi wamfesa kubala makuyu? Ayi mphuno ya madzi amunyu ingabuluse madzi adidi?

¹³Mbani pakati panu munthu wanzeru, penu wakuvesa pinthu? Iye athema kupitsikimiza na makhaliro ache adidi, pontho na pinthu pimbachita iye mwakupichepesa na mwanzeru.

¹⁴Mbwenye mtimanu ungakhala wabivu, wanyongo na waukundi, lekani dawira pyakuonadi pakunyadira nzeru zanu.

¹⁵Nzeru ninga zenezi nkhabe bulukira kudzulu tayu, mbwenye nsapansi pano, za anthu pyawo, pontho za mizimu yakuipa.

¹⁶Pale pana bivu na ukundi, penepo pontho pana kuvunganyika na kuipa kwa mtundu onsene.

¹⁷Mbwenye nzeru zakubulukira kudzulu papyonsene nsakutoma zangwiro; zakufuna mtendere, zakufulika, pontho zaushamwali; zakudzala na nsisi, pontho zakubulusa pyakuvuna pya mabasa adidi; nkhabe tonga mwakuyang'ana nkhope, pontho nkhabe ufaka-faka tayu.

¹⁸Anyakufuna mtendere, ale ambabzala mbewu mwamtendere, pyakuvuna pyawo mphyakulungama.