Read cisena YAKOBO 4 Bible Online

YAKOBO 4 - cisena bible

YAKOBO 4

¹Makangano na nthonga pakati panupa pimbabulukira kupi? Ipyo pikubulukira kuna pikhumbo pya manungo anu, pimbachita nkhondo muna imwe pile.

²Imwe mumbafuna pinthu, kwache nkhabe kwanisa khala napyo tayu, tenepo mwasasanyika kupha; imwe mumbasirira pikulu kukhala na pinthu, kwache nkhabe kwanisa kupigumana tayu, natenepo mumbakangana na kumenyana. Imwe nkhabe khala na pinthu pimbafuna imwe, thangwi imwe nkhabe kupipempha kuna Mulungu tayu.

³Pontho mungapipempha, nkhabe kupitambira tayu, thangwi mumbapipempha na manyerezero akuipa. Pinthu pimbapempha imwe mumbapivunga kwene kufuna kuchitisa manungo anu kukomerwa.

⁴Anthu okhonda khulupirika imwe! Kadi nkhabe kudziwa tayu kuti kukhala shamwali wa dziko yapansi nkhukhala nyamalwa wa Mulungu? Munthu onsene anasankhula kukhala shamwali wa dziko yapansi akupichitisa yekha ene kukhala nyamalwa wa Mulungu.

⁵Lekani nyerezera kuti nkhabe pyakuonadi m'Malemba ale ambalonga kuti, “Mzimu Wakuchena udaikha Mulungu muna ife ngwakutifuna mwantchanje.”[2]

⁶Mbwenye kukoma mtima kule kumbapereka Mulungu nkhwamphamvu pyakwanga pene. Ninga mumbalongera Malemba kuti, “Mulungu ambakhonda kudungudza, mbwenye ambapereka kukoma mtima kuna anthu akupichepesa.”

⁷Natenepo verani Mulungu. Khondani Satana, penepo iye anakuthawani.

⁸Fedzani chifupi na Mulungu, iyembo anafedza chifupi na imwe. Sambani m'manja mwanu, anthu akudawikamwe! Chenesani mitimanu, mfaka-fakamwe!

⁹Tsukwalani, lirani na kusintili; kuseka kwanu kusanduke kulira, kukomerwa kwanu kusanduke kutsukwala!

¹⁰Pichepeseni mwekha ene pamaso pa Mbuya, tenepo iye anakukuzani.

¹¹Abale anga, lekani kulongera pyakuipa mwanzanu. Munthu onsene analongera pyakuipa mkhristu mwanzacheyo, penu kumtonga mseru, iye akulongera pyakuipa na kutonga mwambo wa Mose. Imwe mungatonga mwambo, penepo si imweve ambavera mwambo ule tayu, mbwenye ndimwe anyakuutonga.

¹²Mulungu ene basi ndiye nyakupereka mwambo, pontho nyakutonga mseru. Iye ndiye ene basi anakwanisa kupulumusa na kuvunga kwene. Ndimwe animbo imwe kuti mutonge mseru anzanu.

¹³Chinchino ndivesereni, imwe ale mumbalonga kuti, “Lero, penu mangwana tinati tiende kumzimda ufu na uwo, kule kunafuna ife kakhala chaka chamumphu kuchita malonda mbatigumana kobiri zizinji.”

¹⁴Imwe nkhabe na kudziwa kwene tayu kuti moyo wanu mangwana unakhala tani. Imwe mwakhala ninga utsi ule umbaoneka ndzidzi pang'ono, kubuluka penepo mbaubisika.

¹⁵Pyathema imwe kulonga mphipi: “Ngakhala Mbuya anapifuna, tinakhala na moyo mbatichita pyangana-pyangana.”

¹⁶Mbwenye chinchino mukutumbama na kugaya; kutumbama konsene ninga kweneku nkhudawa.

¹⁷Tenepo munthu anadziwa pyadidi pyathema iye kuchitapyo mbakhonda kupichita, penepo iye adawa.