Read cisena 1 PETURO 1 Bible Online

1 PETURO 1 - cisena bible

1 PETURO 1

¹Kubulukira kuna ine, Peturo, nyakutumwa wa Yesu Khristu. Kwenda kuna anthu akusankhulika a Mulungu, ale adathawa kwawo kubalalikira kunthemba za Ponto, Galatia, Kapadokia, Asia na Bitinia.

²Imwe mudasankhulwa malingana na kupidziwiratu kwa Mulungu Baba. Iye adakusanduzani anthu akuchena kudzera muna Mzimu Wakuchena, towera muvere Yesu Khristu, pontho mucheneswe kudzera muna chiropa chache. Kukoma mtima na mtendere pikhale kuna imwe mwakuinjipa.

³Tendeni tipereke takhuta kuna Mulungu, pontho Baba wa Mbuyathu Yesu Khristu! Na thangwi ya nsisi zache zikulu, iye adatipasa moyo wachinchino pakulamusa Yesu Khristu kuimfa. Penepi pimbatichitisa kuti tikhale na chidikhiro chadi-chadi,

⁴tenepo ife maso ali kunjira kudikhira kutambira mtsanzayiso ukulu umbakoyera Mulungu anthu ache ule. Iye ambakukoyerani mtsanzayiso kudzulu, kule ipyo nkhabe kwanisa kuvunda, penu kuvungika, penu kusuluka tayu.

⁵Penepi mphyanu imwepo, ale kudzera muna chikhulupiro chanu mumbakoyiwa mwadidi na mphamvu za Mulungu kuti mutambire chipulumuso chile chasasanywa kale kudzatchululwa pakumala kwa ndzidzi uno.

⁶Komerwani napyo penepi, podi kwene kuti chinchino mwathema kutsukwala ndzidzi pang'ono basi, thangwi ya nyatwa za mayesero a mtundu na mtundu anaona imwewa.

⁷Mayesero nkhufuna kutsikimiza kuti chikhulupiro chanucho ntchamaso. Golidi ene, ule anakwanisa kuvungwa, ambayeswa na moto, sasawambo na chikhulupiro chanu, chile ntchakufunika pikulu kupiringana golidi, chimbayeswa basi; mamalisiro ache nkhudzesa ukulu, demelero na chilemedzo pansiku ya kudza pontho kwa Yesu Khristu.

⁸Podi kwene imwe hamudamuone tayu, kwache mumbamfuna basi. Podi kwene imwe hamumbamuona chinchino tayu, kwache imwe mumbamkhulupira basi. Natenepo mumbatsanzaya na kukomerwa kukulu kwakukhonda longeka,

⁹thangwi imwe mukutambira mamalisiro a chikhulupiro chanu, chile ntchipulumuso cha moyo wanu.

¹⁰Maprofeti ale adalongeratu pya kukoma mtima kwa Mulungu kukhafuna imwe dzatambira adabwanyula-bwanyula, pontho kusaka mphole-mphole kufuna kudziwa pya chipulumuso chenechi.

¹¹Iwo adayesa-yesa kudziwa ndzidzi wache ukhali upi, pontho na mule mukhafuna ipyo kudzera.[1] Akhali Mzimu wa Khristu muna iwo ule akhathonya ndzidzi wenewu pakulongeratu pya nyatwa zikhafuna dzapirira Khristu, pontho na demelero ikhafuna dzatambira iye m'nduli mwache ile.

¹²Mulungu adatchulula kuna maprofeti enewa kuti basa ikhaphata iwo hikhali yakuganyalisa iwo tayu, mbwenye kuganyalisa imwepo. Iwo adalonga pya pinthu pile pyava imwe chinchinopi kubulukira kuna anyamphangwa adalalika Mphangwa Zadidi na mphamvu za Mzimu Wakuchena, ule adatumwa kubulukira kudzulu. Penepi mphinthu pile na angelo ene ambafuna kuti apivese.

¹³Natenepo manyerezero anu mbasasanyike kuchita pinthu. Khalani m'maso, pontho ikhani chidikhiro chanu monsene mwene pana kutsanzaya kunafuna dzatambira imwe Yesu Khristu angabwera pontho.

¹⁴Khalani anthu akuvera Mulungu, pontho lekani teweza pikhumbo pyakuipa pikhali na imwe pandzidzi ukhali imwe anthu okhonda dziwa Khristu.

¹⁵M'mbuto mwache khalani anthu akuchena papyonsene pinachita imwe, sasawa ninga Mulungu adakuchemerani ule ngwakuchenambo.

¹⁶Malemba akulonga kuti, “Khalani anthu akuchena, thangwi ine ndine wakuchena.”

¹⁷Imwe mungapemphera kuna Mulungu mumbamchemera Baba, ule ambatonga anthu onsene okhonda yang'ana nkhope kutewezana na pinthu pidachita iwo, tenepo khalani na moyo wakumgopa m'moyo wanu onsene pansi pano.

¹⁸Thangwi mukudziwa kuti si siliva penu golidi tayu, pinthu pyakuti pinakwanisika kuvungika, pidapagalwi kuti imwe muombolwe kuna makhaliro anu akusowa basa adatambira imwe kubulukira kuna makolo anu ale,

¹⁹mbwenye ikhali nsembe yakudula ya Khristu, ule akhali ninga mwanabira wakusowa chilema, penu damba.

²⁰Iye adasankhulwa na Mulungu mwenemo dziko yapansi mbidzati lengwa, tenepo iye adaoneswa pakwecha nsiku zakumalisazi thangwi ya imwepo.

²¹Kudzera muna iye, imwe mudakhulupira Mulungu ule adamulamusa kuimfa mbampasa demelero; tenepo chikhulupiro chanu na chidikhiro chanu pyakhazikika pana Mulungu.

²²Podi chinchino mwapichenesa mwekha ene pakuvera kwanu pyakuonadi mwakuti mumbakwanisa kuafuna anyakukhulupira anzanu na mtima wakuonadi, funanani unango na mwanzache kubulukira pansi pa mtimanu.[2]

²³Imwe mwabalwa pontho, nee na kholo ambafa ule tayu, mbwenye na Mulungu okhonda kufa, kudzera muna mafala amoyo, pontho akukhala na kukhala a Mulungu.

²⁴Ninga munalongera Malemba kuti, “Anthu onsene akhala ninga maudzu, pontho demelero yawo yonsene yakhala ninga maluwa am'tsanga. Maudzu ambaunyala, maluwambo mbapakatika,

²⁵mbwenye mafala a Mbuya ngakukhala na kukhala.” Mafala enewa ndi Mphangwa Zadidi zidalalikwa kuna imwe zile.