Read cisena 1 PETURO 2 Bible Online

1 PETURO 2 - cisena bible

1 PETURO 2

¹Natenepo thundani pyakuipa pyonsene; lekani nama, penu kuchita ufaka-faka, penu kuipirwa, penu kulongera anango pyakuipa.

²Ninga akachiya, lirirani mkaka chadi-chadi wauzimu, towera mungamwa mkakawu mukule, pontho mupulumuke.

³Ninga munalongera Malemba kuti, “Mwapiona mwekha mwene kukoma mtima kwa Mbuya.”

⁴Idzani kuna Mbuya, mwala wamoyo udakhondwa na anthu ninga wakusowa basa ule, kwache udasankhulwa na Mulungu kukhala wakufunika pyakwanga kuna iye.

⁵Ninga miyala yamoyo, idzani mbamuphatiswa basa kumangira Nyumba yauzimu, mule munafuna imwe dzatumikira ninga anyansembe akupambulika kupereka nsembe yauzimu yakutambirwa na Mulungu kudzera muna Yesu Khristu.

⁶Thangwi Malemba akulonga kuti, “Ndidasankhula mwala wakufunika pyakwanga, ule unaikha ine kukhala mwala wa pankhomo mu Zioni; tenepo munthu onsene anamkhulupira, nkhabe dzachita manyadzo na pang'ono pene tayu.”

⁷Mwala wenewu kuna imwe anyakukhulupira ngwakufunika pyakwanga; mbwenye kuna anyakukhonda khulupira ale: “Mwala udakhonda anyakumanga nyumba ninga wakusowa basa ule, Mwala udakhonda anyakumanga nyumba ninga wakusowa basa lero wasanduka wakufunika kupiringana inango yonsene.”

⁸Malemba anango akulonga pontho kuti, “Wenewu ndi mwala unafuna dzagwegwedusa anthu, pontho mwala ule unafuna dzaagwisa.” Iwo adagwegweduka thangwi hadakhulupire tayu mafala a Mulungu; penepi ndiye pidaachitikira ninga mukhadapisasanya Mulungu.

⁹Mbwenye imwe ndimwe dzinza yakusankhulika, anyansembe achifumu, dzinza yakupambulika, anthu ache a Mulungu, ale asankhulwa kuti alalike pya mabasa ademelero a Mulungu, ule adakuchemerani kukubulusani kumdima mbakudzesani kucheza chache chakudodomesa.

¹⁰Kalene imwe nee mukhali anthu a Mulungu tayu, mbwenye chinchino ndimwe anthu ache; kale ene imwe nee mukhadziwa nsisi za Mulungu tayu, mbwenye chinchino mwatambira nsisi zache.

¹¹Anzanga apamtima, ndikukudembeterani ninga alendo, pontho okhonda khazikika padziko yapansi pano kuti muleke kuteweza pikhumbo pya manungo pile pimbamenyana na moyo wanu wauzimu.

¹²Makhaliro anu pakati pa anthu okhonda dziwa Mulungu akhale adidi, towera angakupambizirani kuti ndimwe anthu akudawika, adzindikire mabasa anu adidi, natenepo anakuza Mulungu pansiku ya kudza kwache pontho.

¹³Na thangwi ya Mbuya verani atongi onsene a dziko: mvereni Mfumu wamkulu wa dziko, ule ndi mtongi wamkulu;

¹⁴pontho avereni akulu a boma, podi iwo adasankhulwa na iye kuti atchunyuse anyakuchita pyakudawa, pontho na kusimba anthu akuchita pyadidi ale.

¹⁵Thangwi Mulungu anafuna kuti imwe mumatamise pyakulonga pyakupupwa pya anthu okhonda dziwa pinthu na mabasanu adidi ambachita imwepo.

¹⁶Ndimwe mtumbe, apo lekani phatisa basa utumbe wanu ninga chinthu chakuphimbira nacho pyakudawa, mbwenye khalani ninga mabitchu a Mulungu.

¹⁷Lemedzani anthu onsene, funani anyakukhulupira anzanu, gopani Mulungu, pontho lemedzani Mfumu wamkulu wa dziko.

¹⁸Imwe anyabasa mwathema kuvera ambuyanu, pontho alemedzeni mwakumalisikaletu, nee anyakukoma mtima okha penu akufulika ale tayu, mbwenye na anyakuchita vinga ene.

¹⁹Mulungu anakutsanzayisani thangwi ya penepi, ngakhala imwe munapirira nyatwa zidakhonda thema imwe kuziona thangwi imwe mwadzindikira kufuna kwa Mulungu.

²⁰Pana chinthu chanji chakuti akusimbeni nacho ngakhala munapirira na kumenywa kudathema imwe kuona kule na thangwi yakuti mwadawa? Mbwenye ngakhala munapirira nyatwa zinaona imwe podi kwene kuti mwachita pyakulungama, penepo Mulungu anakutsanzayisani.

²¹Mulungu adakuchemererani penepi, thangwi Khristu adakuonerani nyatwa mbakusiyirani upangizi, towera imwe mutewerembo manyalo ache.

²²Iye hadadawe tayu, pontho chipo nee munthu na mbodzi ene adamva akulonga pyakunama pakanwa pache tayu.

²³Pidatikanwa iye, hadabwezere kutikanwako tayu. Ndzidzi udaona iye nyatwa ule, iye hadathuswe tayu, mbwenye adatula pyonsene m'manja mwa Mulungu, ambatonga miseru mwakulungama ule.

²⁴Khristu ene adathukula pyakudawa pyathu m'manungo mwache pamtanda, towera tileke khala na moyo wakufuna kuchita pyakudawa, mbwenye tikhale na moyo wakufuna kuchita pyakulungama. Imwe mwawangiswa na pironda pyache.

²⁵Imwe mukhali ninga mabira akhadataya njira ale, mbwenye chinchino mwabwezwa kuti mutewere Makabuswa, pontho Nyakukoya moyo wanu ule.