Read cisena 1 PETURO 4 Bible Online

1 PETURO 4 - cisena bible

1 PETURO 4

¹Podi Khristu adava kupha m'manungo mwache, sasawambo imwe mwathema kukhala na manyerezero onthowo mbamusasanyike kuva kupha; thangwi munthu anava kupha m'manungo mwacheyo nkhabeve pinthu na kudawa tayu.

²Kubuluka chinchino kwenda m'tsogolo, khalani moyo wanu onsene wapansi pano wakutongwa na kufuna kwa Mulungu nee na pikhumbo pya umunthu tayu.

³Imwe mwavunga ndzidzi ukulu m'ndulimu pakuchita pinthu pimbachita anthu okhonda dziwa Mulungu. Mukhachita pyakunyansa, pikhumbo pyakuipa, kuledzera, madyaidya, maphwando akuchitira pyakuzuda, pontho kupembedza mifanikizo, pile mphyakunyansa.

⁴Tenepo chinchino anthu okhonda dziwa Mulungu adodoma thangwi akukuonani kuti imwe nkhabe kwatika kachita nawove tayu pinthu pyakunyansa pyakuzunguzika, tenepo akukutikanani.

⁵Mbwenye iwo athema dzalonga pinthu pikhachita iwo pile pamaso pa Mulungu, ule asasanyika kutonga mseru anthu amoyo na akufa ene.

⁶Ndi thangwi yache Mphangwa Zadidi zidalalikwambo na kuna anthu akufa ene, towera, podi kwene kuti akhadatongwa mseru kumanungo kuti afe ninga mumbatongerwa anthu onsene mseru, iwo akhale na moyo muuzimu ninga Mulungu ana moyo.

⁷Kumala kwa pinthu pyonsene kuli chifupi. Natenepo khalani m'maso, pontho akuuphata mtima, towera mukwanise kupemphera.

⁸Padzulu pa pyonsene, funanani unango na mwanzache na mtima onsene, thangwi kufunana kumbaphimbira pyakudawa pizinji.

⁹Tambiranani mwadidi m'misa mwanu mwakukhonda dungunya.

¹⁰Munthu onsene athema kuphatisa basa mtukwa udatambira iye kubulukira kuna Mulungu kutumikira nawo anzache. Khalani ninga akadamu adidi akudziwa kuphatisa basa mwadidi mitukwa yamtundu na mtundu yakubulukira kuna Mulungu.

¹¹Munthu onsene analalikayo athema kulalika mphangwa zakubulukira kuna Mulungu, munthu onsene anatumikira athema kutumikira na mphamvu zimbampasa Mulungu, towera papinthu pyonsene Mulungu alemedzwe kudzera muna Yesu Khristu, ule kuna iye kuna demelero na mphamvu kwenda na kwenda. Ameni.

¹²Ashamwali anga apamtima, lekani kudodoma na mayesero akupha anaona imwewa, khala ninga malengo-lengo akugwerani.

¹³Mbwenye sekerani thangwi mukukwata khundu panyatwa za Khristu, towera mukomerwe pikulu pene pandzidzi wa kubwera pontho kwache na demelero.

¹⁴Ndimwe akutsanzaya, anthu angakutikanani, thangwi ndimwe anyakutewera a Khristu; kweneku nkhulonga kuti Mzimu wakudemelera wa Mulungu ali pana imwepo.

¹⁵Ngakhala munabonera, kubonera kwanu kuleke khala thangwi ndimwe mphandu, mbava, phanga, penu nyachisuzi-suzi papinthu pya anthu anango tayu.

¹⁶Kwache ngakhala munabonera thangwi ndimwe mkhristu, lekani chita napyo manyadzo, mbwenye perekani takhuta kuna Mulungu kuti mwakwata dzina ya Khristu.

¹⁷Ndzidzi wafika wakuti kutongwa mseru kutome, tenepo anthu ache a Mulungu athema toma kutongwa mseru. Ngakhala pinatoma na ife, apo pinamala tani na anthu ambakhonda khulupira Mphangwa Zadidi zakubulukira kuna Mulungu ale?

¹⁸Ninga munalongera Malemba kuti, “Mphyakunensa kuti anthu akulungama apulumuke: apo, ndi tani na anyakudawa okhonda tsalakana pya Mulungu ale?”

¹⁹Natenepo ale ambabonera thangwi nkhufuna kwa Mulungu athema kupipereka okha ene mwakumalisikiratu kuna Mulungu, Nyakulenga wakukhulupirika, pontho athimize kuchita pinthu pyadidi.