Read cisena 1 PETURO 5 Bible Online

1 PETURO 5 - cisena bible

1 PETURO 5

¹Ine, ule ndinembo mkulu wa mpingo, mboni ya kusanyika kwa Khristu, pontho ule ndinakwatambo khundu pademelero inafuna dzaoneswa ile, ndikupempha akulu a mpingo pakati panu

²kuti mukhale amakabuswa a mkumbi udakupasani Mulungu ule, pontho kuuyang'anira mwadidi na mwakupifuna kwanu ninga mumbapifunira Mulungu kuti imwe mupichite, nee kuti mukuchita kukhakhamizwa tayu. Lekani kuphata basanu na mtima wakufuna kupiganyalisa mwekha ene na kobiri, mbwenye na mtima wakufunadi kutumikira.

³Lekani khala ninga atongi pana anthu apaswa imwe kuti muayang'anire ale, mbwenye khalani apangizi kuna mkumbiwo.

⁴Tenepo Makabuswa Wamkulu angabwera pontho, munatambira chipewu chademelero chachifumu chokhonda suluka.

⁵Sasawambo na imwe aphale, mwathema kuvera amunakulu. Monsenene mupivazike mwekha ene na kupichepesa, towera mutumikirane unango na mwanzache; thangwi Malemba alonga kuti, “Mulungu ambakhonda anyakudungudza, mbwenye ambakomera mtima anyakupichepesa.”

⁶Pichepeseni mwekha ene pansi pamkono wamphamvu wa Mulungu, towera akukuzeni pandzidzi unafuna iye.

⁷Tulani pana iye kuswipa kwanu mtima konsene, thangwi ndiye ambakutsalakanani.

⁸Khalani m'maso mbamuonesese! Nyamalwanu, Satana, akufamba-famba ninga nkhalamu yakubangula kusaka-saka munthu wakuti amkhudyule.

⁹Imirani dzololo pachikhulupiro chanu, pontho mkhondeni Satana, thangwi mukupidziwa kuti anyakukhulupira anzanu padziko yonsene yapansi akuonambo nyatwa sasawa ninga zinaona imwezi.

¹⁰Mbwenye pidaona imwe nyatwa ndzidzi pang'ono, Mulungu mwenechiro wa kukoma mtima konsene, ule adakuchemerani kuti mukwate khundu pademelero yache yokhonda mala mukuphatanizana na Khristu, anakuchitisani kukhala akuthema monsene mwene, akuwanga, pontho akuimira dzololo pamaziko akukhazikika.

¹¹Kuna iye kukhale mphamvu kwenda na kwenda! Ameni.

¹²Ndalemba kalatayi m'chigwandira kuna imwe na chiphedzo cha Silivano, ule ambayesa ine ninga mkhristu mwanzanga wakukhulupirika. Ndafuna kukuwangisani mtima, pontho kupereka umboni wanga kuti penepi ndi kukoma mtima kwakuonadi kwa Mulungu. Imirani dzololo pana pinthu penepi.

¹³Anzanu mumpingo wa kudziko ya Babiloni, ale adasankhulwa pabodzi namwe kukhala anthu a Mulungu, akukupasani mwenyikiro. Mwananga Maliko akuchita chibodzi-bodzi.

¹⁴Pasanani unango na mwanzache mwenyikiro wachikhristu kuonesa kufunana kwanu. Mtendere mbukhale namwe monsenene, imwe ale ngache a Khristu.