Read cisena 2 PETURO 1 Bible Online

2 PETURO 1 - cisena bible

2 PETURO 1

¹Kubulukira kuna ine, Simoni Peturo, nyabasa, pontho nyakutumwa wa Yesu Khristu, Kwenda kuna anthu, ale kudzera muna kulungama kwa Yesu Khristu, ule ndi Mulungu, pontho Nyankhombo wathu, adatambira chikhulupiro chakufunika pyakwanga sasawa ninga chidatambira ife chile.

²Kukoma mtima na mtendere pikhale pyanu mwakuinjipa kudzera muna udziwisi wanu pana Mulungu, pontho Yesu Mbuyathu.

³Mphamvu ikulu ya Mulungu yatipasa pinthu pyonsene pimbasowa ife kuti tikhale na moyo wakupembedzadi Mulungu kudzera muna udziwisi wathu pana iye, ule adatichemera kuti titambire khundu ya demelero yache ene,[1] pontho udidi wache.

⁴Na njira yeneyi iye atipasa mitukwa yadidiletu, pontho yakufunika pyakwanga idadumbira iye ile, towera kudzera muna mitukwa yeneyi tikwanise kupulumuka kuna kuvungika kule kuli pansi pano thangwi ya pikhumbo pyakuipa, pontho kuti tikwanise kukwata khundu ya umulungu wache.

⁵Na thangwi yeneyi chitani phinga kuthimiza udidi kuna chikhulupiro chanu; kuna udidi wanu thimizani udziwisi;

⁶kuna udziwisi wanu thimizani kuuphata mtima; kuna kuuphata mtima kwanu thimizani kupirira; kuna kupirira kwanu thimizani kukhala na moyo wakulemedza Mulungu;

⁷kuna moyo wanu wakulemedza Mulungu thimizani kuafuna akhristu anzanu; pontho kuna kuafuna kwanu akhristu anzanu thimizani kuafuna anthu onsene.

⁸Penepi mphinthu pyathema imwe kukhala napyo, tenepo ngakhala munakhala napyo pyakuinjipa, nee munakhala anthu akupolola, pontho okhonda ganyalisi m'moyo wanu wakudziwa Mbuyathu Yesu Khristu tayu.

⁹Mbwenye munthu anakhonda khala na penepi akhala ninga nyankhunguwisi, wakukhonda kwanisa kuona patali, pontho aduwalira kuti kale ene adacheneserwa pyakudawa pyache.

¹⁰Tenepo abale anga, chitani phinga pyakwanga pene kuti muchitise kukuchemerani, pontho kukusankhulani kudachita Mulungu kukhala kwakukhazikika; mungachita tenepo, imwe nkhabe dzagwa m'pyakudawa tayu.

¹¹Tenepo munatambirwa na manja mawiri pamsuwo wakupitira mu Ufumu okhonda mala wa Mbuyathu, pontho Nyankhombo wathu Yesu Khristu.

¹²Tenepo ndzidzi onsene ndinakukumbusani pya pinthu penepi, podi kwene kuti mukupidziwa kale, pontho kuti mwakhazikika kale pa pyakuonadi pidatambira imwe pile.

¹³Ndapinyerezera kuti mphyakuthema, ndzidzi unakhala ine m'manungo a pansi pano, kukusisimusani pakukukumbusani pya pinthu penepi.

¹⁴Ndikupidziwa kuti chinchino pano ndinati ndisiye manungo anga ninga mudapilongera Mbuyathu Yesu Khristu mwakuveka kuna ine.

¹⁵Tenepo ndinachita phinga kuti pikhale pyakukwanisika kuti mukumbuke penepi ndzidzi onsene ine ndingafa.

¹⁶Ife nee tidateweza pithankano pyakupekwa mwakuchenjera na anthu pidakudziwisani ife pya mphamvu zache, pontho na kubwera pontho kwa Mbuyathu Yesu Khristu tayu. Mbwenye tidaona ukulu wache na maso athu ene.

¹⁷Thangwi iye adatambira demelero na chilemedzo kubulukira kuna Mulungu Baba, pandzidzi udaveka fala yakubulukira kuna Mulungu wa demelero yonsene kulonga kuti, “Uyu ndi mwananga wapamtima, ndakomerwa naye pyakwanga!”

¹⁸Ife ene pano tidava fala yeneyi ikulonga kubulukira kudzulu, pandzidzi ukhali ife naye paphiri yakuchena ile.

¹⁹Natenepo ife tikukhulupira pyakwanga pene kuti mphangwa zidalongwa na maprofeti ale nsakuonadi. Tenepo mphyadidi kuti muzikoye mwadidi thangwi zakhala ninga nyale yakugaka kumbuto yamdima, kufikirana makalakwecha, pontho kumwinikira kwa nyenyezi mumtima mwanu.

²⁰Mbwenye padzulu pa pyonsenepi imwe mwathema kudzindikira kuti nkhabe mphangwa zauprofeti za m'Malemba zidathumbusulwa na munthu pa yekha tayu.

²¹Mphangwa zauprofeti nee zidadza na kufuna kwa munthu tayu, mbwenye anthu adalonga mphangwa zakubulukira kuna Mulungu na mphamvu za Mzimu Wakuchena.