Read cisena 2 PETURO 2 Bible Online

2 PETURO 2 - cisena bible

2 PETURO 2

¹Maprofeti akunama adaoneka kale ene pakati pa anthu, sasawambo afunzisi akunama anaoneka pakati panu. Iwo anadzesa chibiso-biso pifunziso pyakunama pyakuvunga mbakhonda Mbuya adaaombola ule. Tenepo iwo anapichemerera okha ene kuvungika kwakututumusa.

²Anthu azinji anateweza makhaliro awo akuzuda; anango analonga tsweda Njira Yakuonadi, thangwi ya pinthu pimbachita iwo.

³Na thangwi ya kufuna mfuma afunzisiwa anakudyerani nkope-kope na pithankano pidapeka iwo pile. Kwache kutchunyuswa kwawo kwasasanywa kale, pontho Nyakuavunga ali m'maso kuadikhira.

⁴Mulungu hadaleke kutchunyusa angelo adadawa ale tayu, iye adaaponya kugehena, kumdima kule kunakoyiwa iwo uku amangwa na njema[2] kudikhira Nsiku inafuna dzatonga Mulungu anthu mseru.

⁵Mulungu hadaleke kutchunyusa anthu akale ale tayu, iye adadzesa madzi makulu padziko yonsene yapansi kuna anthu okhonda tsalakana pya Mulungu, mbwenye adapulumusa Nowa, ule adalalika pya chilungamo, pabodzi pene na anthu anango anomwe basi.

⁶Mulungu adatchunyusa mizinda ya Sodomu na Gomora, adaivungiratu na moto mbachitisa kuti ikhale upangizi kuna pinafuna dzachitikira anthu okhonda tsalakana pya Mulungu.

⁷Iye adapulumusa Loti, munthu wakulungama, ule akhanensiwa na makhaliro akuzuda a anthu okhonda tsalakana pya mwambo ale.

⁸Munthu wakulungamayu akhakhala pakati pawo, tenepo nsiku na nsiku iye adasanyika pyakwanga na kuona, pontho na kuva makhaliro akudawika akhachita anthu ale.

⁹Mbuya ambadziwa kupulumusa pamayesero anthu ambatsalakana pya iye ale, pontho na kukoya anthu akudawa kudikhira kuatchunyusa Nsiku inafuna iye dzatonga mseru anthu a padziko yapansi,

¹⁰maka-maka anthu ambateweza pikhumbo pyakunyansa pya manungo ale mbalulupisa utongi wa Mulungu. Afunzisi akunama ngakuwanga mtima, pontho akudungudza, pontho nkhabe chita mantha kutikana pyakulengwa pyademelero pyakudzulu tayu.

¹¹Podi na angelo ene, ale ngamphamvu pikulu kupiringana afunzisi akunamawa, nkhabe kuasumira na mafala akutikana pamaso pa Mbuya tayu.

¹²Mbwenye anthu enewa akhala ninga nyama zam'tsanga, pirombo pyakusowa nzeru, pile pidabalwa kwene kuti piphatwe na kuphiwa basi, pimbatikana iwo pinthu pyonsene pinakhonda iwo kuvesa. Iwo anavungwa ninga nyama zam'tsanga,

¹³tenepo iwo anabwezerwa nyatwa thangwi ya nyatwa zidaonesa iwo anthu anango. Chinthu chimbaakomera nkhuchita pakwecha na masikati pinthu pyakukhutisa pikhumbo pya manungo awo; iwo ngakunyansa, pontho ngakuchitisa manyadzo angadya namwe pabodzi, thangwi ambakomerwa na kukunyengezani.

¹⁴Iwo nkhabe yang'ana chinango tayu, mbwenye akazi akuti achite nawo uputa; pikhumbo pyawo kufuna kuchita pyakudawika nkhabe khuta tayu. Iwo ambachitisa anthu akusowa mphamvu kukweshwa na misampha. Iwo ngaluso pakuchita mtima, pontho Mulungu aatemberera!

¹⁵Iwo asiya njira yakulungama, pontho abauka kubuluka kuna njirawo; iwo atewera njira ya Balamu, mwana Beori, ule adakhumba mfuma idakwanisa iye kuigumana, thangwi ya kuchita kwache pyakudawa ile,

¹⁶tenepo iye adasumululwa thangwi ya pyakudawa pyache. Bulu wache, nyama yakukhonda longa, adalonga na fala ya munthu mbamkhondesa kuchita pyakuseluka pikhafuna chita mprofetiyo.

¹⁷Anthu enewa akhala ninga mphuno zakuuma za madzi, pontho akhala ninga nkhungu yakugwinywa na mphepo; Mulungu aakoyera mbuto yawo kumdima wakugoswa pyakwanga.

¹⁸Iwo ambalonga mafala akudungudza, pontho akupupwa, pontho ambaphatisa basa pikhumbo pyakuipa pyakusirira pya manungo kukwesha napyo ale atoma kwene chinchino kupulumuswa pakati pa anzawo akale akudawika.

¹⁹Iwo ambadumbira pya utumbe, mwenemo iwo ndi mabitchu a pinthu pyakuipa pimbavunga pile, thangwi munthu ambasanduka bitchu wa pinthu pimbamkunda pile.

²⁰Ngakhala anthu anapulumuka kuna pyakuipa pya pansi pano pimbaavunga pile pakudziwa Mbuyathu pontho Nyankhombo wathu Yesu Khristu, m'nduli mwache mbakweshwa pontho kukundwa na pinthu pyonthopyo, pakumalisira pache anakhala wakunyanya kuipa kupiringana mukhali iye pakutoma pale.

²¹Iwo mbadakhonda dziwa njira yakulungama, mbapidakhala pyadidi kuna iwo, kusiyana na kuidziwa mbabauka kubuluka kuna matongero akuchena adapaswa iwo ale.

²²Pinthu pyaachitikirapi pikuonesa kuona kwa mwambi wakuti, “Mwanambwa ambabwerera kadya pontho matapiko ache,” pontho “Nkhumba imbabwerera pontho kabulumunda m'matope ingamala sambiswa.”