Read cisena 2 PETURO 3 Bible Online

2 PETURO 3 - cisena bible

2 PETURO 3

¹Ashamwali anga apamtima, kalata yeneyi njachiwiri kukulemberani. M'makalata onsene awiriwa ndayesa-yesa kulamusa pyakunyerezera pyangwiro mumtima mwanu pakukukumbusani pya pinthu penepi.

²Pinafuna ine mphyakuti imwe mukumbuke mafala adalongwa kale ene na maprofeti akuchena ale, pontho na matongero a Mbuya pontho Nyankhombo, adakupasani anyakutumwanu ale.

³Chakutoma pa pyonsenepi, imwe mwathema kuvesa kuti nsiku zakumalisazi anthu anango ale ambatongwa na pikhumbo pyawo pyakuipa anaoneka. Iwo anakuselusani

⁴mbati, “Ayi Khristu hadadumbire tayu kuti anabwera pontho? Apo lero ali kupi? Makolo athu afa kale, mbwenye pinthu pyonsene pili monthomo kubulukira pa ndzidzi udalengwa dziko yapansi!”

⁵Iwo akuduwalira chadala kuti kale kene Mulungu adalenga kudzulu na dziko yapansi na mafalache. Dziko yapansi idalengwa kubulukira kumadzi, pontho na madzi.

⁶Tenepo iye adaphatisa basa madzi onthowo, madzi makulu kuvunga nawo dziko yapansi yakale ile.

⁷Mbwenye kudzulu na dziko yapansi pili chinchinopi Mulungu akupikoya na mafalache onthowo, towera pivungwe na moto. Iye akupikoya kudikhira nsiku inafuna iye dzatonga na kuvunga anthu okhonda tsalakana pya Mulungu ale.

⁸Ashamwali anga apamtima, lekani duwalira chinthu chibodzi chakuti nkhabe kusiyana pamaso pa Mulungu tayu: kuna iye nsiku ibodzi yakhala ninga pyaka pikwi, pontho pyaka pikwi pyakhala ninga nsiku ibodzi.

⁹Mbuya nkhabe dembuka kuchita pinthu pidadumbira iye pile tayu, ninga mumbapinyerezera anthu anango mule. M'mbuto mwache iye ambapirira namwe, thangwi iye nkhabe ambafuna kuti munthu na mbodzi ene avungike tayu, mbwenye pimbafuna iye mphyakuti anthu onsene aleke pyakudawa pyawo.

¹⁰Mbwenye Nsiku ya kubwera pontho kwa Mbuya inakhala ninga kudza kwa mbava. Pansiku yeneyo pinthu pyakudzulu pinamala na dungu ikulu, tenepo pinthu pyonsene pya kudzulu pinagaka na kuvungika, pontho dziko yapansi na pyonsene pili mwenemo pinamala.[3]

¹¹Podi pinthu pyonsenepi pinavungwa tenepo, apo imwembo mwathema kukhala anthu akutani? Imwe mwathema kukhala na moyo wakuchena, pontho wakupipereka kuna Mulungu,

¹²ndzidzi unadikhira imwe Nsiku ya Mulungu, pontho chitani pyakukwanisika pyonsene kuti idze chinchino pano, Nsiku inafuna dzagaka na kuvungwa kudzulu, pontho inafuna dzanyunguluka pinthu pyonsene pyakudzulu thangwi ya kupisa.

¹³Mbwenye ife tikudikhira kuona pinthu pidadumbira Mulungu pile; penepi nkhudzulu kwachinchino, pontho dziko yapansi yachinchino, kule kunafuna dzakhazikika chilungamo.

¹⁴Tenepo, ashamwali anga, yesa-yesani kukhala anthu angwiro, pontho akusowa chinthu chakukupokanyisani pamaso pa Mulungu, pontho kukhala mwamtendere ndzidzi unadikhira imwe Nsiku ya kubwera pontho kwa Mbuya.

¹⁵Kumbukani kuti kupirira kwa Mbuya nkhupasa danga anthu kuti apulumuke ninga montho mudakulemberani mbaleathu Paulo kuphatisa basa nzeru zidampasa Mulungu zile.

¹⁶Iye ambalonga pinthu pibodzi-bodzi pya penepi angalemba makalatache. M'makalatamu muna pinango pyakunensa kupivesa. Anthu okhonda dziwa pinthu, pontho okhonda khazikika mumtima mwawo ambapipotoza mwawo-mwawombo ninga mumbapotozera iwo Malemba anango. Tenepo iwo akupichemerera okha ene kuvungika.

¹⁷Mbwenye imwe, ashamwali anga, mukupidziwa kale penepi. Chitani mphole-mphole mphapo, towera muleke dzakwatika na pyakudawika pya anthu okhonda tsalakana pya mwambo ale, gopesera munagwa kubuluka pakhazikika imwe pale.

¹⁸M'mbuto mwache thimizani kukula mukukoma mtima, pontho na udziwisi wa Mbuyathu, pontho Nyankhombo wathu Yesu Khristu. Demelero mbikhale kuna iye chinchino, pontho kwenda na kwenda! Ameni.