Read cisena 1 YOHANI 1 Bible Online

1 YOHANI 1 - cisena bible

1 YOHANI 1

¹Tikukulemberani pya mbodzi wakuchemerwa Mafala wakupasa moyo ule. Mafalayo akhalipo kutomera pakutomaletu. Tidamva, pontho tidamuonadi na maso athu. Tidamuona, pontho tidamkhuya na manjathu.

²Pidaoneka nyakupasa moyo ule, ife tidamuona. Tikumchitira umboni na kukupangani pya moyo okhonda mala, ule ukhali na Baba mbaudziwisa kuna ife.

³Pile pidaona ife na kupiva tikupilalikambo kuna imwe, towera imwe pabodzi na ife tikhale pachiphatizano, chile china ife na Baba, pontho na Mwanache, Yesu Khristu.

⁴Tikukulemberani penepi, towera kukomerwa kwathu[1] kukhale kwamumphu.

⁵Mphangwa zidava ife kubulukira kuna Mwanache mbatizilalika kuna imwe nsakuti: Mulungu ndi cheza, pontho muna iye nkhabemo mdima na pang'ono pene tayu.

⁶Ngakhala tinalonga kuti timbaphatizana na Mulungu, kwache mbatifamba mumdima, penepo tikunama, pontho ife nkhabe teweza pyakuonadi.

⁷Mbwenye tingafamba m'cheza ninga kukhala m'cheza kumbachita iye, penepo tina chiphatizano unango na mwanzache, pontho chiropa cha Yesu, Mwanache, chimbatichenesa kuna pyakudawa pyonsene.

⁸Ngakhala tinalonga kuti ife nkhabe chakudawa tikupinyengeza tekha ene, pontho muna ife nkhabemo pyakuonadi tayu.

⁹Mbwenye ngakhala tinabweka pyakudawa pyathu kuna Mulungu, iye ngwakukhulupirika pontho wakulungama mbatilekerera pyakudawa pyathu, pontho anatichenesa kuna kukhonda lungama kwathu konsene.

¹⁰Ngakhala tinalonga kuti ife hatidadawe tayu, tikumuyesa Mulungu ninga ngwakunama, pontho mafalache nkhabe mbuto muna ife tayu.