Read cisena 1 YOHANI 2 Bible Online

1 YOHANI 2 - cisena bible

1 YOHANI 2

¹Penepi ndikulembera imwe, ananga, towera muleke kudawa. Mbwenye ngakhala unango anachita chakudawa, tili naye ule ambatidembeterera kuna Baba m'mbuto mwathu, weneyu ndi Yesu Khristu, nyakulungama.

²Iye ndi nsembe yakulekerera pyakudawa pyathu, pontho si pyathu pyokha tayu, mbwenye na pya anthu onsene a padziko yapansi.

³Ngakhala tinavera matongero a Mulungu, penepo tatsikimizadi kuti timbamdziwa.

⁴Ngakhala munthu analonga kuti ambamdziwa, kwache mbakhonda kuvera matongero ache, munthu weneyo ngwakunama, pontho muna iye nkhabemo pyakuonadi tayu.

⁵Mbwenye munthu ambavera Mafala a Mulungu ngule kumfuna Mulungu kumbachita iye kwachitiswadi kukhala kwamumphu muna iye. Mwenemo ndiye munakwanisira ife kudziwadi kuti timbaphatizana na Mulungu.

⁶Munthu analonga kuti ambaphatizana na Mulungu ule, athema kukhala na makhaliro akhali na Yesu ale.

⁷Ashamwali apamtima, matongero anakulemberani ine si achinchino tayu, mbwenye ngontho akale, ale akhala na imwe kutomera pakutomaletu. Matongero akale ndi mphangwa zava imwe kale zile,

⁸kwache matongero anakulemberani inewa ngachinchino; pyakuonadi pyache pikuoneka muna Yesu, pontho muna imwe. Thangwi mdima ukugwanda, cheza chadi-chadi chatoma kale kumwinikira.

⁹Ule analonga kuti ali m'cheza mbazonda mbaleache, penepo iye ali mumdima na lero.

¹⁰Ule anamfuna mbaleache ambakhala m'cheza, natenepo muna iye nkhabemo chinango chakufuna kumdawisa[2] tayu.

¹¹Mbwenye nyakuzonda mbaleache ambakhala mumdima. Ambafamba mumdima mbakhonda dziwa kunaenda iye, thangwi mdima wampasa uboli-boli.

¹²Ndikulembera imwe, ananga, ale pyakudawa pyanu pyalekererwa thangwi ya pidachita Khristu.

¹³Ndikulembera imwe, ababa, thangwi imwe mumbamdziwa ule akhalipo kutomera pakutomaletu. Ndikulembera imwe, aphale, thangwi mwamkunda Satana, nyakuipa ule.

¹⁴Ndikulembera imwe, ananga, thangwi Baba mumbamdziwa. Ndikulembera imwe, ababa, thangwi nyakukhalapo kutomera pakutomaletu mumbamdziwa. Ndikulembera imwe, aphale, thangwi muna mphamvu; mafala a Mulungu ambakhala muna imwe, pontho mwamkunda Satana, nyakuipa ule.

¹⁵Lekani funa dziko yapansi, penu chinthu chonsene cha dziko yapansi. Mungafuna dziko yapansi, Baba nee mumbamfuna tayu.

¹⁶Thangwi chinthu chonsene cha dziko yapansi, pikhumbo pyakudawika pya manungo, kusirira kwa maso, na kudungudza na pinthu pina munthu na pimbachita iye, pyonsenepi hapimbabulukira kuna Baba tayu, mbwenye pimbabulukira kuna dziko yapansi.

¹⁷Dziko yapansi na pinthu pya m'mwenemo pimbakhumba anthu pile pinamala. Mbwenye ule anachita pimbafuna Mulungu anakhala na moyo okhonda mala.

¹⁸Ananga, mamalisiro ali chifupi kudza! Mudapangwa kuti nyamalwa wa Khristu anabwera; chinchino anyamalwa azinji a Khristu aoneka kale, natenepo tikudziwa kuti mamalisiro ali chifupi kudza.

¹⁹Anthu enewa hakhalidi a m'gulu mwathu tayu, ndi thangwi yache atisiya. Iwo mbadakhala a m'gulu mwathu, mbadakhala na ife. Mbwenye iwo atisiya, towera pionekedi pakwecha kuti nkhabe mbodzi wa iwo akhali wa m'gulu mwathu tayu.

²⁰Mbwenye Khristu adakudzozani na Mzimu Wakuchena, natenepo monsene mwadziwa pyakuonadi.

²¹Ine ndikukulemberani, si thangwi yakuti imwe nkhabe dziwa pyakuonadi tayu, mbwenye ndi thangwi yakuti mumbapidziwa. Mumbapidziwa pontho kuti kunama nkhabe bulukira muna pyakuonadi na pang'ono pene tayu.

²²Nyakunamayo mbani mphapo? Weneyu ngule analonga kuti Yesu si Khristu tayu. Munthu wakuchita tenepo ndi nyamalwa wa Khristu; iye akhonda Baba na Mwana ene.

²³Thangwi nyakukhonda Mwana akhondambo Baba; nyakutambira Mwana atambirambo Baba.

²⁴Onesesani kuti mwakoyadi mumtima mwanu mphangwa zidava imwe kutomera pakutoma. Ngakhala munakoya mphangwa zenezo, penepo munakhala ndzidzi onsene mukuphatanizana na Mwana pontho na Baba.

²⁵Penepi ndiye pidadumbira Khristu mwenechiro kutipasa, moyo okhonda mala.

²⁶Ndikulemba penepi kuna imwe kulonga pya ale akuyesa kukunyengezani.

²⁷Mbwenye kuna imwe, Khristu akudzozani na Mzimu Wakuchena, ule ambakhala muna imwe mwakuti nkhabe dzafunika pontho munthu unango kuti akufunziseni tayu. Thangwi Mzimu Wakuchena adzozwa na imwe ule, ambakufunzisani pyonsene, pontho pinakufunzisani iye mphyakuonadi, si pyakunama tayu. Verani chifunziso cha Mzimuyo mbamukhala mukuphatanizana na Khristu.

²⁸Chinchino, ananga, khalani mukuphatanizana na iye, towera angaoneka tikhale nako kuwangiswa mtima mbatikhonda bisala na manyadzo pamaso pache pansiku yakudza pontho kwache.

²⁹Mumbapidziwa kuti Khristu ngwakulungama; mupidziwetu, mphapo, kuti munthu onsene wakuphata pyakulungama weneyo ndi mwana wa Mulungu.