Read cisena 1 YOHANI 3 Bible Online

1 YOHANI 3 - cisena bible

1 YOHANI 3

¹Ngayang'anani kutifuna kukulu kumbachita Baba. Kutifuna kwache nkhukulu pyakwanga pene mwakuti timbachemerwa ana a Mulungu; ande ndifedi anache! Yeneyi ndi thangwi yache anthu a padziko yapansi ambakhonda kutidziwa, podi iwo nkhabe dziwa Mulungu tayu.

²Ashamwali anga apamtima, chinchino ndife ana a Mulungu, kwache pidzati dziwika mwadidi mwene tayu kuti tinakhalanji. Mbwenye tikupidziwa kuti Khristu angabwera pontho, tinakhala ninga iye ene thangwi tinamuona ninga muna iyemo.

³Munthu onsene wakukhala na chidikhiro chenechi muna Khristu ambapichenesa yekha ene sasawa ninga kuchena kwachita Khristu.

⁴Munthu anadawayo, aswa mwambo wa Mulungu, thangwi kudawa nkhuswa mwambo.

⁵Mumbapidziwa kuti Khristu adadza towera dzabulusa pyakudawa, pontho muna iye nkhabemo chakudawa.

⁶Tenepo munthu onsene wakukhala mukuphatanizana na Khristu nkhabe thimiza kudawa tayu. Mbwenye munthu anathimiza kudawa, chipo nee hadamuone, penu kumdziwa tayu.

⁷Ananga, munthu mbaleke kukunyengezani! Munthu wakuphata pyakulungama ngwakulungama sasawambo ninga Khristu ngwakulungama.

⁸Munthu anathimiza kudawayo ngwa Satana, thangwi Satana ngwakudawa kutomera pakutoma pene. Mwana Mulungu adadza na thangwi ya kufuna kuvunga pidachita Satana pile.

⁹Mwana onsene wa Mulungu nkhabe thimiza kudawa tayu, thangwi umulungu umbakhala muna iye, pontho iye nkhabe kwanisa kuthimiza kudawa thangwi Mulungu ndi Babache.

¹⁰Kweneku ndiye kusiyana pakati pa ana a Mulungu na ana a Satana. Munthu onsene anakhonda chita pinthu pyakulungama, penu anakhonda funa mbaleache, weneyo si mwana Mulungu tayu.

¹¹Mphangwa zidava imwe kutomera pakutoma pene nsakuti ife tathema kufunana unango na mwanzache.

¹²Mbatilekeni kukhala ninga Kaini. Iye akhali wache wa Satana, nyakuipa ule mbapha Abele mbaleache. Chidaphera iye mbaleacheyu ninji? Thangwi pidachita Kaini makayo pikhali pinthu pyakudawika, mbwenye pinthu pidachita mbaleache pikhali pyakulungama.

¹³Tenepo, abale anga, lekani dodoma anthu a dziko yapansi pano angakuzondani.

¹⁴Timbapidziwa kuti tabuluka kuimfa mbatidza kumoyo. Penepi timbapidziwa thangwi abale athu timbaafuna. Munthu onsene anakhonda funa mwanzache akuthimiza kukhala pansi pa mphamvu za imfa.

¹⁵Munthu anazonda mbaleache ndi mphandu, pontho mumbapidziwa kuti mphandu nkhabe moyo okhonda mala muna iye tayu.

¹⁶Umu ndi mule mumbadziwira ife kuti kufunana ninji: Khristu adapereka moyo wache thangwi ya ife pano. Ifembo tathema kupereka moyo wathu thangwi ya akhristu anzathu.

¹⁷Ngakhala munthu wakufuma ambaona mbaleache wakusowa pinthu, kwache iye mbaumisa mtimache, angalonge tani kuti ambafuna Mulungu?

¹⁸Ananga, kufunana kwathu mbakuleke khala kwa m'kanwa kokha; kwathema kukhala kufunana kwakuonadi, kule kumbaoneka kokha na pyakuchita pyathu.

¹⁹Mwenemu ndi mule munafuna dzadziwira ife kuti ndifedi ache a pyakuonadi, pontho na mule munafuna ife dzakhala akulikha mtima pamaso pa Mulungu,

²⁰podi na ndzidzi unatichitisa chikumbu mtima chathu kukonwa, thangwi Mulungu ngwamkulu kupiringana chikumbu mtima chathu, pontho ambadziwa pyonsene pene.

²¹Natenepo, ashamwali anga apamtima, tinakhala nako kulikha mtima pamaso pa Mulungu, ngakhala chikumbu mtima chathu nkhabe kutichitisa kukonwa tayu.

²²Timbatambira kubulukira kuna iye pyonsene pimbampempha ife, thangwi timbavera matongero ache mbatichita pyakumkomera.

²³Matongero ache ngakuti tikhulupire Mwanache Yesu Khristu na kufunana unango na mwanzache ninga mudatipangira Khristu.

²⁴Munthu wakuvera matongero a Mulungu ambakhala mukuphatanizana na Mulungu, pontho Mulungu ambakhala mukuphatanizana naye. Timbapidziwa kuti Mulungu ambakhala mukuphatanizana na ife kudzera muna Mzimu Wakuchena adatipasa iye ule.