Read cisena 1 YOHANI 5 Bible Online

1 YOHANI 5 - cisena bible

1 YOHANI 5

¹Munthu anakhulupira kuti Yesu ndiye Khristu, weneyo ndi mwana Mulungu; pontho munthu weneyo anamfuna Baba, ambamfuna pontho na Mwanache ene.

²Mwenemu ndi mule mumbadziwira ife kuti timbaafuna ana a Mulungu: timbamfuna Mulungu na kukoya matongero ache.

³Thangwi kumfuna Mulungu nkhukoya matongero ache, pontho kuna ife matongero ache si akunensa tayu.

⁴Thangwi mwana onsene wa Mulungu anakwanisa kukunda dziko yapansi. Dziko yapansi timbaikunda kudzera muna chikhulupiro chathu.

⁵Anakwanisa kukunda dziko yapansi mbani? Weneyu ngule ene basi ambakhulupira kuti Yesu ndi Mwana Mulungu.

⁶Yesu Khristu ngule adadza kudzera muna madzi pakubatizwa kwache, pontho na chiropa pakufa kwache. Hadadze kudzera muna madzi okha tayu, mbwenye kudzera muna madzi pabodzi na chiropa. Na Mzimu Wakuchena enembo ambachitira umboni kuti mphyakuonadi thangwi Mzimuyo ngwakuonadi.

⁷Mboni zilipo zitatu:

⁸Mzimu Wakuchena, madzi na chiropa. Onsene utatu wawo umbapereka umboni ubodzi ene.

⁹Timbakhulupira umboni wa munthu; mbwenye umboni wa Mulungu ngwamphamvu pikulu, pontho iye apereka umboni wenewu wakulonga pya Mwanache.

¹⁰Tenepo munthu anakhulupira mwana Mulungu ule, ana umboni wenewu mumtima mwache; mbwenye ule anakhonda kukhulupira Mulungu, ambamsanduza kukhala wakunama, thangwi hadakhulupire umboni wa Mulungu wakulonga pya Mwanache ule tayu.

¹¹Umboni wache ngufu: Mulungu atipasa moyo okhonda mala. Moyo wenewu phatache ili muna Mwanache.

¹²Nyakukhala na Mwanayo ana moyo wenewu; nyakusowa Mwana Mulungu nkhabe moyo.

¹³Ndikukulemberani penepi towera imwe anyakukhulupira Mwana Mulungu mupidziwe kuti muna moyo okhonda mala.

¹⁴Timbalikha mtima pamaso pa Mulungu thangwi timbapidziwa kuti ambativa tingampempha chinthu malingana na kufuna kwache.

¹⁵Ngakhala timbapidziwa kuti ambativa tingapempha chinthu timbapidziwa pontho kuti tatambira chinthu chonsene champempha ifecho.

¹⁶Ngakhala unaona mbaleako akuchita chakudawa chokhonda kudzesa imfa, umpempherere kuna Mulungu, tenepo Mulungu anampasa moyo mbaleakoyo. Penepa ndikulonga kuna ale pyakudawa pyawo nkhabe dzesa imfa. Mbwenye kulipo kudawa kwinango kwakudzesa imfa, penepa ndikulonga kuti uleke kupipempherera.

¹⁷Kuchita pinthu pyonsene pyokhonda lungama nkhudawa, mbwenye kulipo kudawa kwinango kokhonda dzesa imfa.

¹⁸Timbapidziwa kuti ana a Mulungu nkhabe thimiza kudawa tayu, thangwi Mwana Mulungu ambaakoya mwadidi, pontho Satana, nyakuipayo nkhabe kwanisa kuakuwaza tayu.

¹⁹Timbapidziwa kuti ndife ache a Mulungu, podi kwene dziko yonsene yapansi ikhale pyayo pansi pa utongi wa Satana, nyakuipa ule.

²⁰Timbapidziwa kuti Mwana Mulungu adza mbatichitisa kuvesa, towera tidziwe Mulungu wakuonadi. Ife timbakhala mukuphatanizana na Mulungu wakuona, mukuphatanizana na Mwanache Yesu Khristu. Weneyu ndi Mulungu wakuona, pontho moyo okhonda mala.

²¹Ananga, chalirani kupembedza mifanikizo.