Read cisena ATONGI 1 Bible Online

ATONGI 1 - cisena bible

ATONGI 1

¹Pidafa Yoswa Aisraele adavunza MBUYA mbati, “Njipi dzinza pakati pa madzinzathu yathema kutoma kwenda kasosa Akanani.”

²MBUYA adatawira mbati, “Dzinza ya Yuda ndiye inafuna dzatoma kwenda, ine ndinaapasa utongi onsene pana dzikoyo.”

³Anthu a dzinza ya Yuda adalonga kuna anthu a dzinza ya Simioni mbati, “Tendeni pabodzi nafe kunthemba idapaswa ife ile, towera pabodzi pene tikamenye nkhondo na Akanani. Tenepo tinaenda namwe pabodzi kunthemba idapaswa imwe ile.” Natenepo madzinza a Simioni

⁴na Yuda adenda kamenya nkhondo pabodzi pene. MBUYA adaachitisa kukunda Akanani na Aperizi mbapha amuna pikwi khumi pa bizeke.

⁵Kweneko iwo adagumana Adonibizeke mbamenyana naye.

⁶Iye adathawa, kwache iwo adamthamangisa, tenepo adamphata mbamgwanda pyala pikulu pya m'manja na pyala pikulu pya kumanyalo.

⁷Adonibizeke adalonga mbati, “Mafumu makumanomwe akugwandika pyala pikulu pya m'manja na pyala pikulu pya kumanyalo alokota mambwera-mbwera pansi pa thebulu yanga. Chinchino Mulungu achitambo kuna ine pidachita ine kuna iwo.” Iye adendeswa kumzinda wa Yerusalemu kudafera iye kule.

⁸Amuna a dzinza ya Yuda adasosa Yerusalemu mbaukunda. Iwo adapha anthu ache mbapisa mzindawo na moto.

⁹Pidamala penepi, iwo adathimiza kumenyana na Akanani akhakhala m'nthemba ya mapiri, m'tchinde mwa mapiri na m'thando yatchetcha ya Negebu ile.

¹⁰Iwo adenda kachita nkhondo na Akanani akhakhala mumzinda wa Hebroni, kale ukhadziwika na dzina yakuti Kiriati-Ariba ule. Kweneko iwo adakunda nkhonda Sheshai, Ahimani na Talimai.

¹¹Kubuluka penepo amuna a dzinza ya Yuda adenda kachita nkhondo na mzinda wa Debiri, ule ndzidzi wenewo ukhadziwika na dzina yakuti Kiriati-Seferi.

¹²Mbodzi mwa iwo dzinache Kalebu adalonga mbati, “Ndinapereka mwananga wamkazi Akisa kuna munthu anapikwanisa kusosa na kukunda Kiriati-Seferi kuti akhale mkazache.”

¹³Tenepo Oteniele mwana wamamuna wa Kenazi, mphwache Kalebu, adakunda mzindawo, natenepo Kalebu adampasa mwanache wamkazi Akisa kuti akhale mkazache.

¹⁴Pansiku yakukazhali Oteniele adadembetera mkazache[1] kuti apemphe babache munda. Akisa adatchitha pabulu pache, tenepo Kalebu babache adamvunza pikhafuna iye pile.

¹⁵Mwana wamkazi ule adatawira mbati, “Ndinafuna mathawale a madzi, thangwi mbuto yandipasa imweyi ili m'thando yatchetcha ya Negebu.” Natenepo Kalebu adampasa mphuno za madzi zakumtunda na zakuphedi zene.

¹⁶Pidzukulu pya tebzalache Mose, Mkeni, pidathimiza kwenda na anthu a ku Yuda kuthando yatchetcha ya Negebu chifupi na Aradi kubulukira kumzinda wa Yeriko mzinda wa miti yamdikhwa. Kweneko adakhazikika pakati pa Aamaleki.[2]

¹⁷Anthu a dzinza ya Yuda na a dzinza ya Simioni adenda pabodzi pene, tenepo adakunda Akanani akhakhala mumzinda wa Zefati ale. Iwo adatemberera mzindawo, natenepo adauvunga mbauthula na dzina yakuti Horima.[3]

¹⁸MBUYA adaphedza Yuda natenepo iwo adapokosera nthemba ya mapiri kukhala yawo ene. Kwache iwo hadapokosere[4] mzinda wa Gaza, Ashikeloni penu Ekroni na nthemba zawo zakuzungulira tayu. Anthu akhakhala m'khundu mwa nyanzawa akhali na pingolo pyawo pyasimbi, natenepo anthu a ku Yuda hadakwanise kuathamangisa tayu.

²⁰Ninga montho mudalongera Mose, Hebroni adaperekwa kuna Kalebu, ule adathamangisa mumzindamo madzinza matatu a pidzukulu pya Anaki.

²¹Mbwenye anthu a dzinza ya Benjemani hadathamangise Ayebusi akhakhala mu Yerusalemu ale tayu. Tenepo Ayebusi adathimiza kukhala kweneko na anthu a dzinza ya Benjemani na lero.

²²Madzinza a Eferemu na Manase adenda kasosa mzinda wa Betele, ule pandzidzi wenewo ukhachemerwa Luzi. MBUYA adaaphedza.

²³Iwo adatuma amuna kazonda mzindawo,

²⁴ale adaona munthu akubulukira mumzindamo mbalonga kuna iye mbati, “Tionesembo mule munakwanisira ife kupita mumzinda, tenepo ife nkhabe kukukuwaza tayu.”

²⁵Munthu ule adaaonesa, tenepo anthu a madzinza a Eferemu na Manase adapha munthu onsene mumzindamo, kupambula munthu adaaonesa njira ule na banjache ene basi.

²⁶Kubuluka penepo iye adenda kudziko ya Ahiti mbamanga mzinda kweneko mbauthula na dzina yakuti Luzi, ile ndi dzinache na lero.

²⁷Anthu a dzinza ya Manase hadathamangise anthu akhakhala mizinda ya Beti-Shani, Taanaki, Dori, Ibuleamu. Megido na maluwani anango a chifupi tayu; Akanani adathimiza kukhala kweneko.

²⁸Pidasanduka Aisraele kukhala dzinza yamphamvu adakhakhamiza Akanani kuaphatira basa, kwache hadamale kuathamangisa onsene tayu.

²⁹Anthu a dzinza ya Eferemu hadathamangise anthu Akanani akhakhala mumzinda wa Gezeri, natenepo Akanani adathimiza kukhala kweneko nawo pabodzi.

³⁰Anthu a dzinza ya Zebuloni hadathamangise tayu anthu akhakhala m'mizinda ya Kitironi na Nahalali, tenepo Akanani adathimiza kukhala kweneko, pontho iwo adakhakhamizwa kuaphatira basa.

³¹Anthu a dzinza ya Asheri hadathamangise tayu anthu akhakhala m'mizinda ya Ako, Sidoni, Ahilabu, Akizibu, Heliba, Afeki na Rehobu.

³²Dzinza ya Asheri adathimiza kukhala na Akanani, podi iwo hadaathamangise tayu.

³³Anthu a dzinza ya Nafitali hadathamangise tayu anthu akhakhala m'mizinda ya Beti-Shemeshi na Beti-Anati. Anthu adathimiza kukhala na Akanani, ale adakhakhamizwa kuaphatira basa.

³⁴Aamori adakhakhamiza anthu a dzinza ya Dani kwenda kunthemba ya mapiri mbaakhondesa kutchitha kuphedi.

³⁵Aamori adathimiza kukhala ku Aialoni, Shaalibimu na kuphiri ya Heresi. Kwache iwo akhali pansi pa utongi wa madzinza a Eferemu na Manase mbaakhakhamiza kuaphatira basa.

³⁶Madire a Edomu[5] adagwanda na pamakata a Akarabimu panthunda kubulukira ku Sela.