Read cisena ATONGI 10 Bible Online

ATONGI 10 - cisena bible

ATONGI 10

¹Pidafa Abimeleki, Tola mwana Pua, pontho chidzukulu cha Dodo adadza kupulumusa Aisraele. Iye akhali wa dzinza ya Isakara mbakhala ku Shamiri m'nthemba ya mapiri ya Eferemu.

²Iye adakhala mtongi wa Israele pyaka makumawiri na pitatu. Tenepo iye adafa mbaikhwa m'masiye a ku Shamiri.

³Pidafa Tola padadza Yairi wa ku Gileadi. Iye adakhala mtongi wa Israele pyaka makumawiri na piwiri.

⁴Iye akhali na ana achimuna makumatatu ale akhapakira mabulu makumatatumbo. Iwo akhatonga mizinda makumatatu m'nthemba ya Gileadi, ile ikuthimiza kuchemerwa midzi ya Yairi.

⁵Tenepo iye adafa mbaikhwa m'masiye a ku Kamoni.

⁶Pidachitika pontho kuti Aisraele adachita pyakuipa pamaso pa MBUYA pakupembedza milungu Baala na Asitarite, pontho na milungu ya Aaramu, Asidoni, Amoabu, Aamoni na ya Afilisti. Iwo adakhonda MBUYA mbaleka kumpembedza.

⁷Natenepo MBUYA adazhangalira Aisraele mbachitisa Afilisti na Aamoni kuakunda.

⁸Pyaka khumi na pisere iwo adaboneresa na kupondereza Aisraele onsene akhakhala m'dziko ya Aamori kumabulukiro dzuwa a mkulo wa Yorodani m'nthemba ya Gileadi ale.

⁹Aamoni adawambuka mkulo wa Yorodani kamenya nkhondo na madzinza a Yuda, Benjemani na Eferemu. Israele akhali panyatwa ikulu.

¹⁰Penepo Israele adalira kuna MBUYA mbati, “Ife takudawirani pakukukhondani, imwe MBUYA Mulungu wathu, mbatipembedza Baala.”

¹¹MBUYA adatawira mbati, “Aiguputo, Aamori, Aamoni, Afilisti,

¹²Asidoni, Aamaleki na Amaoni adakuponderezani m'nduli mule imwe mbamulira kuna ine. Ayi ine sidakupulumusani tayu m'manja mwawo.

¹³Kwache imwe mudathimiza basi kundikhonda mbamupembedza milungu inango. Tenepo ine nkhabe dzakupulumusanive tayu.

¹⁴Ndokoni mukalirire milungu yasankhula imweyo. Ilekeni ikupulumuseni mungakhala panyatwa.”

¹⁵Mbwenye Aisraele adalonga kuna MBUYA mbati, “Ife tadawa, tenepo chitani pyonsene pinafuna imwe, kwache taphata miyendo tipulumuseni lero ene pano.”

¹⁶Penepo iwo adataya milungu yachilendo ile mbapembedza MBUYA; tenepo iye adava nsisi thangwi ya nyatwa zawo.

¹⁷Anyankhondo a ku Amoni adasasanyika kumenya nkhondo mbamanga msasa m'nthemba ya Gileadi. Aisraele adadza pabodzi mbamanga msasa pa Mizipa mu Gileadi monthomo.

¹⁸Penepo anthu na akadamu a madzinza a Aisraele adavunzana unango na mwanzache mbati, “Mbani anafuna kutsogolera kamenya nkhondo na Aamoni? Munthu anapiperekayo anakhala mkadamu wa anthu onsene a m'nthemba ya Gileadi.”