Read cisena ATONGI 11 Bible Online

ATONGI 11 - cisena bible

ATONGI 11

¹Yefita nyankhondo wakuwanga mtima wakubulukira ku Gileadi akhali mwana puta. Babache, ule dzinache ndi Gileadi,

²akhali na ana anango achimuna adabala iye na mkazache, tenepo pidakula iwo adakhakhamiza Yefita kubuluka pamsuwopo. Iwo adalonga kuna iye mbati, “Iwe nkhabe dzakwata khundu tayu pamfuma inafuna dzatisiyira babathu, thangwi iwe ndiwe mwana wa bere inango.”

³Yefita adathawa kubuluka kuna abale ache mbakakhala m'dziko ya Tobu. Kweneko iye adagumanyisa gulu ya malova tenepo iwo adamtewera.

⁴M'nduli mwache Aamoni adenda kamenya nkhondo na Aisraele.

⁵Pidachitika penepi akadamu a ku Gileadi adenda kakwata Yefita ku Tobu.

⁶Iwo adalonga mbati, “Idza utitsogolere towera tikwanise kumenyana na Aamoni.”

⁷Mbwenye Yefita adatawira mbati, “Imwe mudandizonda pikulu pene mwakuti mudandikhakhamiza kubuluka m'nyumba mwa babanga. Mphapo mwatani munadza kuna ine? Ayi ndi thangwi yakuti lero muli pa nyatwa?”

⁸Iwo adalonga kuna Yefita mbati, “Ife tikudza kuna iwe chinchino thangwi tinafuna kuti uende nafe kamenyana na Aamoni mbukhala mkadamu wa anthu onsene a ku Gileadi.”

⁹Penepo Yefita adalonga kuna iwo mbati, “Ngakhala munandibwezera kwathu, pontho MBUYA mbandichitisa kukunda Aamoni ndinati ndikhale mkadamu wanu.”

¹⁰Iwo adatawira mbati, “Ande, tatawirizana napyo. MBUYA ndi mboni yathu.”

¹¹Natenepo Yefita adenda na akadamu a ku Gileadi, tenepo anthu adamuikha kukhala mtongi pontho mkadamu. Yefita adalonga pontho mafalache onsene ale pamaso pa MBUYA pa Mizipa.

¹²Kubuluka penepo Yefita adatuma anyamphangwa kuna mfumu wa ku Amoni kulonga mbati, “Chakusosani ife ninji? Thangwi yache ninji imwe mwazungulira dziko yathu kufuna kumenyana nafe?”

¹³Mfumu wa Aamoni adatawira anyamphangwa a Yefita mbati, “Pidabuluka Aisraele m'dziko ya Iguputo, adakwata dziko yanga kubulukira kumkulo wa Arinoni mpakana ku Mkulo wa Yaboki na Yorodani. Tenepo imwe chinchino mwathema kuibwezera mwamtendere.”

¹⁴Yefita adatuma pontho anyamphangwa ale kuna mfumu wa ku Amoni

¹⁵na kutawira kwakuti: “Si pyakuona tayu kuti Aisraele adakwata dziko ya Moabu penu dziko ya Amoni.

¹⁶Pidachitika mphipi: ndzidzi udabuluka Aisraele m'dziko ya Iguputo, iwo adagwanda na m'thando yatchetcha kwenda ku Nyanza Yakufira mbafika ku Kadeshi.

¹⁷Penepo iwo adatuma anyamphangwa kuna mfumu wa ku Edomu kumpempha kuti aatawirise kugwanda na m'dziko mwache, mbwenye iye hadaatawirise tayu. Iwo adapempha pontho mfumu wa ku Moabu, mbwenye mfumu wa ku Moabu hadaatawirise tayu kugwanda na m'dziko mwachemo. Natenepo Aisraele adakhala pa Kadeshi.

¹⁸Kubuluka penepo iwo adenda na m'thando yatchetcha kuzungulira dziko ya Edomu na ya Moabu mbafika kumabulukiro dzuwa a dziko ya Moabu, kukhundu inango ya mkulo wa Arinoni. Iwo adamanga msasa penepo, kwache iwo hadawambuke mkulo wa Arinoni tayu, thangwi udachita madire na Moabu.

¹⁹Tenepo Aisraele adatuma anyamphangwa kuna Sihoni mfumu wa Aamori wa ku Heshiboni kumpempha kuti aatawirise kugwanda na m'dziko mwache kwenda kudziko yawo ene.

²⁰Kwache Sihoni hadaatawirise tayu. M'mbuto mwache iye adagumanyisa anyankhondo ache onsene mbamanga msasa pa Yahazi mbamenyana na Aisraele.

²¹Kwache MBUYA Mulungu wa Israele adachitisa Aisraele kukunda Sihoni na anyankhondo ache. Natenepo Aisraele adakwata nthemba yonsene ya Aamori, akhala mwenemo ale, kukhala yawo ene.

²²Iwo adapokosera nthemba yonsene ya Aamori kubulukira kumkulo wa Arinoni kumwera mpakana kumkulo wa Yaboki kumpoto, pontho kubulukira kuthando yatchetcha kumabulukiro dzuwa mpakana kumkulo wa Yorodani kumadokero dzuwa.

²³Tenepo MBUYA Mulungu wa Israele ndiye adathamangisa Aamori pamaso pa anthu ache Aisraele. Una mphamvu zanji iwe zakukwata nazo pontho dzikoyi.

²⁴Iwe unakwanisa kukoya chinthu chonsene chakupasa Kemoshi, milungu yako. Kwache ife tinakoya pyonsene pyatipasa MBUYA Mulungu wathu.

²⁵Ayi iwe ukupinyerezera kuti ndiwe wakufunika pyakwanga kupiringana Balaki mwana Zipora mfumu wa Moabu? Ayi iye adathimbana na Aisraele na pang'ono pene, penu kuchita nawo nkhondo?

²⁶Pyaka madzana matatu Aisraele akhakhala mu Heshiboni na Aroeri na maluwani akuazungulira, pontho na mizinda yonsene m'khundu-khundu mwa mkulo wa Arinoni. Apo ndzidzi onsenewu iwe udatani kukwata mizindako?

²⁷Nkhabe, ine sidakudawire tayu. Iwe ukudawa pakuchita nkhondo na ine. MBUYA, Mtongi ule, anati apitonge lero pakati pa Aisraele na Aamoni.”

²⁸Kwache mfumu wa ku Amoni hadaikhe konta mphangwa zakubulukira kuna Yefita zile tayu.

²⁹Tenepo Mzimu wa MBUYA adagudumira Yefita. Iye adenda nthemba zonsene za Gileadi na Manase mbabwerera ku Mizipa m'nthemba ya Gileadi mbathimiza kwenda ku Amoni.

³⁰Yefita adadumbira kuna MBUYA mbati, “Ngakhala munandichitisa kukunda Aamoni,

³¹ndinati ndipereke nsembe zakupyerera munthu wakutoma kubuluka pa msuwo wa nyumbanga dzagumanikana nane ndzidzi unabulukira ine ku nkhondo. Ine ndinampereka nsembe munthuyo kuna imwe.”

³²Natenepo Yefita adawambuka mkulo kamenya nkhondo na Aamoni, tenepo MBUYA adamchitisa kukunda.

³³Iye adaamenya kubulukira ku Aroeri kwenda ku Miniti, kupokosera mizinda makumawiri pabodzi pene mpakana ku Abele Keramimi. Kukhali kucheka kukulu, tenepo Aamoni adakundwa na Aisraele.

³⁴Pidabwerera Yefita kumusa kwache ku Mizipa, mwanache wamkazi adabuluka m'nyumba mwache kagumanikana naye, uku akuvina na kuimba chisekese. Weneyu akhali mwanache yekha ene basi.

³⁵Pidamuona Yefita adang'amba nguwo zache na kutsukwala mbalonga mbati, “Waa, mwananga. Iwe wanditsukwalisa pikulu! Pyakhala tani kuti undivese kupha? Ine ndadumbira kuna MBUYA, natenepo ine ndathema kuchita pidadumbira ine pile!”

³⁶Mwanache ule adalonga kuna iye mbati, “Ngakhala imwe mudadumbira kuna MBUYA chitani kuna ine pidadumbira imwepyo thangwi MBUYA akuchitisani kukunda anyamalwanu, Aamoni.”

³⁷Kwache iye adapempha babache mbati, “Ndichitirenimbo chinthu chibodzi ichi. Ndilekeni miyezi miwiri, towera ndikwanise kwenda na anzanga kafamba kumapiri mbandikasintili kuti ndathema kufa okhonda sembwa pontho wakusowa ana.”

³⁸Iye adampanga kuti aende pyache miyezi miwiri. Iye na ashamwali ache adenda kumapiri mbakasintili, thangwi akhadikhira kufa okhonda sembwa pontho wakusowa ana.

³⁹Pidagwanda miyezi miwiri iye adabwerera kuna babache, tenepo babache adachita pidadumbira iye kuna MBUYA, natenepo iye adafa mbali mwali okhonda dziwa mamuna. Wenewu udasanduka mtemo wa Aisraele

⁴⁰wakuti atsikana akhaenda kunja nsiku zinayi chaka na chaka kusintili mwana wamkazi wa Yefita wa ku Gileadi.