Read cisena ATONGI 12 Bible Online

ATONGI 12 - cisena bible

ATONGI 12

¹Amuna a ku Eferemu adasasanyikira pya nkhondo, iwo adawambuka mkulo wa Yorodani kwenda ku Zafoni mbalonga kuna Yefita mbati, “Thangwi yache njanji iwe wawambuka madire dzamenya nkhondo na Aamoni okhonda kutichemerambo kuti tiende nawe pabodzi pene? Tinati tikupisire m'nyumba mwako.”

²Mbwenye Yefita adalonga kuna iwo mbati, “Ine na anthu anga tidapokanyisana pikulu pene na Aamoni. Ine ndidakuchemerani kwache imwe nee mudandipulumusa m'manja mwawo tayu.

³Pidaona ine kuti imwe nkhabe funa pyakundiphedza, ndidapereka moyo wanga kufa mbandiwambuka madire kumenyana na Aamoni. Tenepo MBUYA adandichitisa kuakunda. Apo thangwi yache ninji munadza dzamenyana na ine pano?”

⁴Penepo Yefita adagumanyisa pabodzi amuna onsene a mu Gileadi kumenyana na amuna a ku Eferemu mbaakunda. Anthu a ku Gileadi adamenya anthu a ku Eferemu, thangwi iwo akhadalonga mbati, “Imwe Agileadi, ale mukhakhala pakati pa Eferemu na Manase, ndimwe anyakupanduka kuna Eferemu.”

⁵Agileadi adatchinga mbuto zakuwambukirapo mkulo wa Yorodani, towera Aeferemu aleke kwanisa kuthawa. Munthu onsene wa Eferemu angayesera kuthawa, akhapempha kuti atawiriswe kuwambuka, penepo amuna a ku Gileadi akhamvunza mbati, “Ayi iwe ndiwe wa Eferemu?” Ngakhala iye akhalonga kuti, “Tayu,”

⁶iwo akhampanga kuti athule fala yakuti “Shiboleti.” Kwache iye akhaithula “Siboleti,” thangwi iye nee mbadakwanisa kuithula mwadidi mwache tayu. Penepo iwo akhamphata munthuyo mbampha pambuto ibodzi ya mbuto zakuwambukirapo zile. Ndzidzi wenewo anthu pikwi makumanayi na piwiri a ku Eferemu adaphiwa.

⁷Yefita adatonga Israele pyaka pitanthatu. Iye adafa mbaikhwa m'masiye kuluwani ya kwawo[20] mu Gileadi.

⁸Pidafa Yefita, Ibizani wa ku Betelehemu adatonga Israele.

⁹Iye akhali na ana achimuna makumatatu pontho na ana achikazi makumatatu. Iye adasembesa anache achikazi kuna mbumba inango mbasembera anache achimuna atsikana makumatatu akubulukira kumbumba inango. Ibizani adatonga Israele pyaka pinomwe.

¹⁰Tenepo iye adafa mbaikhwa m'masiye ku Betelehemu.

¹¹Pidafa Ibizani, Eloni wa ku Zebuloni adatonga Israele pyaka khumi.

¹²Tenepo iye adafa mbaikhwa m'masiye ku Aialoni nthemba ya Zebuloni.

¹³Pidafa Eloni, Abidoni mwana wamamuna wa Hilele wa ku Piratoni adatonga Israele.

¹⁴Iye akhali na ana achimuna makumanayi na pidzukulu pyachimuna makumatatu, ale akhali anyakupakira mabulu makumanomwe. Abidoni adatonga Israele pyaka pisere.

¹⁵Tenepo iye adafa mbaikhwa m'masiye ku Piratoni m'nthemba ya Eferemu m'nthemba ya mapiri ya Aamaleki.