Read cisena ATONGI 13 Bible Online

ATONGI 13 - cisena bible

ATONGI 13

¹Aisraele adachita pontho pyakuipa pamaso pa MBUYA, tenepo MBUYA adachitisa Afilisti kuatonga pyaka makumanayi.

²Pandzidzi wenewo pakhali munthu unango dzinache Manoa wa kuluwani ya Zora. Iye akhali wa dzinza ya Dani. Mkazache akhali wakuuma nthumbo.

³Mngelo wa MBUYA adaonekera kuna iye mbalonga mbati, “Iwe ndiwe wakuuma nthumbo, mbwenye chinchino unati ukwate mimba mbubala mwana wamamuna.

⁴Chita mphole-mphole kuti uleke kumwa vinyu penu pyakuledzeresa pinango, penu kudya pyakudya pyokhonda chena pamaso pa Mulungu.

⁵Mwanayo angabalwa leka dzachinga tsisi yache, thangwi kubulukira nsiku inabalwa iye athema dzakhala Mnaziri wakupambulika kuna Mulungu. Iye anatoma basa yakupulumusa Aisraele kuna Afilisti.”

⁶Tenepo mkazi ule adenda mbakapipangambo mamunache mbati, “Munthu wa Mulungu adadza kuna ine, iye akhaoneka wakugoswa pyakwanga ninga mngelo wa Mulungu. Ine sidamvunze tayu kudabulukira iye, pontho iye hadandipange tayu dzinache.

⁷Mbwenye iye andipanga kuti ndinakwata mimba mbandibala mwana wamamuna. Iye andikhondesa kumwa vinyu penu pyakuledzeresa pinango; penu kudya pyakudya pyakukhonda chena pamaso pa Mulungu, thangwi mwanayo anakhala Mnaziri wakupambulika kuna Mulungu kubulukira nsiku ya kubalwa kwache.”

⁸Penepo Manoa adapemphera kuna MBUYA mbati, “Ndaphata miyendo MBUYA, tawirisani munthu wa Mulungu adatuma imwe ule, kudza pontho kuna ife dzatipanga pyathema ife kupichita na mwanayo angabalwa.”

⁹Mulungu adachita pidampempha Manoa pile tenepo mngelo wache ule adadza pontho kuna mkazache ule mwenemo iye mbali kumunda. Mamunache Manoa hakhali naye pabodzi kweneko tayu,

¹⁰tenepo iye adathamanga kabodzi kene mbakalonga kuna mamunacheyo mbati, “Ngayang'ana munthu adadza kuna ine pakutoma ule aonekera pontho kuna ine.”

¹¹Manoa adalamuka mbatewera mkazache ule. Iye adenda kuna munthu ule mbakamvunza mbati, “Ayi munthu wache ndiwe akhalonga kuna mkazanga ule?” Iye adatawira mbati, “Ande, ndine pano.”

¹²Tenepo Manoa adavunza mbati, “Pyalonga imwepi pingakwana-kwana, apo mphaleyu athema dzachitanji? Apo moyo unafuna iye dzakhala nawo wathema dzakhala wakutani?”

¹³Mngelo wa MBUYA ule adatawira mbati, “Mkazi athema kuchita pyonsene pyampanga ine.

¹⁴Iye aleke kudya pyonsene pyakubulukira mfesa; aleke kumwa vinyu penu pyakuledzeresa pinango; penu kudya pyakudya pyokhonda chena pamaso pa Mulungu. Iye athema kuchita pyonsene pyampanga inepi.”

¹⁵Manoa hadapidziwe tayu kuti munthu ule akhali mngelo wa MBUYA, tenepo iye adalonga kuna iye mbati, “Ndaphata miyendo lekani kwendaletu. Tawirisani kuti ndikuphereni mwanambuzi.” Mbwenye mngelo adatawira mbati, podi ndileke kwenda ine sinadya tayu basi pyakudya pyakopyo. Mbwenye ngakhala unapifuna sasanya pyakudyapyo mbupipereke kuna MBUYA ninga nsembe yakupyerera.

¹⁷Tenepo Manoa adatawira mbati, “Ngatipangeni dzinanu, towera tikulemedzeni pyalonga imwepi pingakwana-kwana.”

¹⁸Mngelo ule adavunza mbati, “Thangwi yache ninji munafuna kudziwa dzinanga? Dzinanga ndi dzina yakudodomesa.”

¹⁹Tenepo Manoa adakwata mwanambuzi na mapira pang'ono mbapipereka nsembe paguwa yamwala kuna MBUYA ule ambachita pyakudodomesa.[21]

²⁰Pikhayerima malulume a moto kwenda kudzulu kubulukira pa guwa pale, Manoa na mkazache adaona mngelo ule akwenda kudzulu na m'malulume a moto ale. Penepo Manoa adadzindikira kuti munthu ule akhali mngelo wa MBUYA, tenepo iye na mkazache adagwa na fufumimba. Iwo hadamuoneve pontho mngelo ule tayu.

²²Manoa adalonga kuna mkazache mbati, “Ife tinati tife thangwi taona Mulungu!”

²³Mbwenye mkazache adatawira mbati, “MBUYA mbadafuna pyakutipha, iye nee mbadatambira nsembe yathu tayu; iye nee mbadationesa pinthu pyonsenepi penu kutipanga pinthu ninga penepi chinchino pano tayu.”

²⁴Mkazi ule adabala mwana wamamuna mbamthula Samisoni. Mwana ule adakula pontho MBUYA adamtsanzayisa.

²⁵Tenepo Mzimu wa MBUYA adatoma kumpasa mphamvu pikhali iye pamsasa wa Dani pakati pa Zora na Eshitaoli.