Read cisena ATONGI 15 Bible Online

ATONGI 15 - cisena bible

ATONGI 15

¹Pidagwanda ndzidzi pang'ono Samisoni adenda kachezera mkazache ndzidzi wakuvuna tirigu mbaenda kampasa mwanambuzi. Iye adalonga kuna babache mkazi ule mbati, “Ndikwenda kusubi kwa mkazanga.” Kwache babache mkazi ule hadamtawirise tayu kupitamo.

²Iye adalonga kuna Samisoni mbati, “Ine ndikhanyerezera kuti hunamfunave tayu, tenepo ndidampasa shamwaliako. Kwache mng'onoache ngwakubalika pyakwanga, tenepo iwe unakwanisa kukwata weneyo m'mbuto mwache.”

³Samisoni adalonga mbati, “Ndzidzi uno ine nkhabe pinthu na pinafuna ine chitira Afilisti; ine ndinati ndiakuwaze pyakwanga.”

⁴Natenepo iye adenda kaphata mibinzi madzana matatu mbaimangirira michira miwiri pabodzi pene, pontho mbafekereza nsakali m'mifundomo.

⁵Kubuluka penepo iye adagasa moto kunsakalizo mbaleka mibinziyo, tenepo iyo idenda kuminda ya mapira ya Afilisti. Na njira yeneyi iye hadapise mapira okha akhadavunwa kale ale tayu, mbwenye pontho na mapira ene akhadasalira m'minda ale, pontho na minda yamfesa na yaolivi ene.

⁶Pidavunza Afilisti kuti mbani akhadachita penepi, iwo adapidziwa kuti Samisoni ndiye adapichita, thangwi tebzalache wa ku Timina akhadapereka mkazi Samisoni kuna shamwaliache. Natenepo Afilisti adenda kapha mkazache na babache ene pakuapisa moto.

⁷Samisoni adalonga kuna iwo mbati, “Podi imwe mwachita tenepa, ndinadumbira kuti ine nkhabe puma tayu mpakana ndabwezera pyachita imwe!”

⁸Iye adaasosa mwakugoswa mbapha azinji a iwo. Tenepo iye adenda kakhala m'nkhwimba m'Phanzwi ya Etamu.

⁹Afilisti adadza mbamanga msasa mu Yuda mbasosa luwani ya Lehi.

¹⁰Amuna a ku Yuda adaavunza mbati, “Mwatani munatisosa?” Iwo adatawira mbati, “Ife tadza dzakwata Samisoni kuti akhale nyaperezo mbatimchitirambo pyakuthemerana na pidatichita iye pile.”

¹¹Tenepo amuna pikwi matatu a ku Yuda adenda kunkhwimba m'Phanzwi ya Etamu mbalonga kuna Samisoni mbati, “Kadi iwe nkhabe kupidziwa tayu kuti Afilisti mbatongi athu. Ninji pyachita iwe kuna ifepi?” Iye adatawira mbati, “Ine ndachita kuna iwo pinthu pyakuthemerana na pidandichitira iwombo.”

¹²Iwo adalonga mbati, “Ife tadza kuno dzakumanga towera tikupereke m'manja mwawo.” Samisoni adalonga mbati, “Dumbirani kuti imwe ene nee munandipha tayu.”

¹³Iwo adalonga mbati, “Tatawira. Ife sinakupha tayu. Tinakumanga kwene basi mbatikakupereka m'manja mwawo.” Tenepo iwo adammanga na nkhambala zitswa ziwiri mbabuluka naye m'nkhwimba mule.

¹⁴Pidafika Samisoni ku Lehi, Afilisti adadza kuna iye na kuthamanga pontho na kukhuwa. Mzimu wa MBUYA adamgudumira mbampasa mphamvu, tenepo iye adathumula nkhambala zikhali m'mikono na m'manja mwache mule khala ninga usalu wakupiswa moto.

¹⁵Tenepo iye adaona gogodo ya nsabwada za bulu ule akhadafa kwene chinchino. Iye adakotama mbalokota gogodo ile mbapha nayo amuna chikwi chibodzi.

¹⁶Natenepo Samisoni adaimba nyimbo mbati, “Na gogodo ya nsabwada za bulu, ine ndidapha nayo amuna chikwi. Na gogodo ya nsabwada za bulu, ine ndidaamuluka m'milu.”[24]

¹⁷Kubuluka penepo iye adataya pyache gogodo ile. Pambuto pakhadachitika penepi padathulwa Ramati-Lehi.[25]

¹⁸Kubuluka penepo Samisoni adava nyota pyakwanga, tenepo iye adachemera MBUYA mbati, “Imwe mwandichitisa kukunda, apo chinchino ndinati ndife na nyota pontho kuphatwa na Afilisti, anthu okhonda dziwa Mulungu ale.”

¹⁹Tenepo MBUYA adabaula benga kweneko ku Lehi madzi mbabuluka mwenemo. Samisoni adamwa mbatoma kuva pontho mwadidi. Tenepo mphuno ya madziyo idathulwa Hakore,[26] na lero ilipo ku Lehi.

²⁰Samisoni akhali mtongi wa Israele pyaka makumawiri, ndzidzi ukhali dzikoyo m'manja mwa Afilisti.