Read cisena ATONGI 16 Bible Online

ATONGI 16 - cisena bible

ATONGI 16

¹Nsiku inango Samisoni adenda ku Gaza mzinda wa Afilisti kule kudagumana iye puta mbapita naye m'bonde.

²Anthu a ku Gaza adapidziwa kuti Samisoni akhali kweneko, tenepo iwo adazungulira mbutoyo mbamdikhirira mosiku onsene pamsuwo wa mpanda wakuzungulira mzinda. Iwo adamatama mosiku onsenewo mbanyerezera okha ene mbati, “Tinati tidikhire mpakana makalakwecha, tenepo tinati timphe basi.”

³Mbwenye Samisoni adakhala kweneko mpakana chiti-chiti. Tenepo iye adalamuka mbaphata msuwo wa mpandawo, mbaukhutcha pabodzi pene na pisimbi pyakuphatisa napyo, mpiringanyo na pyonsene. Iye adapithukula paphewa pache mbaenda napyo pansonga ya phiri yakuyang'anisana na Hebroni.

⁴Pidamala penepi Samisoni adamfuna pyakwanga mkazi unango dzinache Delila ule akhakhala paphedi ya Soreki.

⁵Mafumu mashanu a Chifilisti adenda kuna iye mbalonga mbati, “Mnyengerere Samisoni kuti akupange ninji chinamchitisa kukhala wamphamvu pyakwanga, pontho kuti tinakwanisa tani kummala mphamvu, towera tikwanise kummanga mbakhala wakusowa mphamvu. Munthu onsene pakati pathu anakupasa kobiri za siliva madzana khumi na ibodzi.”

⁶Natenepo Delila adalonga kuna Samisoni mbati, “Ngandipange ninji chimbakuchitisa kukhala wamphamvu pyakwanga ninga tenepa. Ngakhala munthu unango anafuna kukumanga kuti akumalise mphamvu anachita tani?”

⁷Samisoni adatawira mbati, “Ngakhala ndinamangwa na nkhambala zinomwe ziwisi zile zidaume tayu, ndinati ndisanduke wakusowa mphamvu ninga munthu unango onsene.”

⁸Natenepo mafumu a Chifilisti adadza na nkhambala zinomwe ziwisi zile zidaume tayu kuna Delila, tenepo iye adamanga nazo Samisoni.

⁹Iye adadza pontho na amuna anango ale akhadikhirira m'subi inango, tenepo Delila adakhuwa mbati, “Samisoni Afilisti akudza.” Mbwenye iye adathumula nkhambala zile khala ninga mumbagwandikira usalu ungapiswa moto. Tenepo iwo hadadziwe tayu basi pakhabulukira mphamvu zache.

¹⁰Delila adalonga kuna Samisoni mbati, “Ngayang'ana iwe wandiphatisa fuwa ya moto mbukhonda kundipanga pyakuona. Chinchino ngandipange munakwanisira munthu kukumanga.”

¹¹Iye adatawira mbati, “Ngakhala iwo anandimanga na nkhambala zitswa zile zidzati phatiswa basa tayu, penepo ndinati ndikhale wakusowa mphamvu ninga munthu unango onsene.”

¹²Tenepo Delila adakwata nkhambala zitswa mbammanga nazo. Tenepo iye adakhuwa mbati, “Samisoni, Afilisti akudza!” Amuna akhadikhirira kusubi inango. Mbwenye iye adathumula nkhambala zile ninga usalu.

¹³Delila adalonga kuna Samisoni mbati, “Ukuthimiza basi kundiphatisa fuwa ya moto mbukhonda kundipanga pyakuona. Ngandipange munakwanisira munthu kukumanga.” Iye adatawira mbati, “Ngakhala unaluka tsisi yanga yakupotana-potana inomwe pabodzi na usalu mbuipana pamtanda wakulukirapo nguwo, penepo ndinakhala wakusowa mphamvu ninga munthu unango onsene.” Samisoni mbali m'chitulo, Delila adaluka tsisi yache yakupotana-potana inomwe pabodzi na usalu,

¹⁴mbaipana, tenepo adakhuwa mbati, “Samisoni, Afilisti akudza!” Mbwenye iye adalamuka mbakweya chakupanira tsisi yache kuibulusa kumtanda wakulukirapo nguwo.

¹⁵Tenepo Delila adalonga kuna iye mbati, “Penepa unalonga kuti umbandifunadi mbukhonda kuonesa kundifuna kwako? Iwe wandiphatisa fuwa ya moto katatu mbuthimiza basi kukhonda kundipanga chimbakuchitisa kukhala na mphamvu pyakwanga ninga tenepa.”

¹⁶Iye adathimiza basi kumnyangula na mafala enewa nsiku na nsiku mbamkhakhamiza mwakuti adamtopesa pyakwanga.

¹⁷Pakumalisira pache adampanga pyakuona mbati, “Tsisi yangayi chipo hidachingwe tayu. Ine ndine Mnaziri wakupambulika kuna Mulungu chibalirwe changa. Ngakhala tsisi yanga inachingwa mphamvu zanga zinamala mbandikhala wakusowa mphamvu ninga unango onsene.”

¹⁸Pidadzindikira Delila kuti ndzidzi wenewu akhadampanga pyakuona adatuma mphangwa kuna mafumu a Chifilisti kuti, “Idzani pontho kabodzi basi. Iye andipanga pyakuona.” Tenepo iwo adadza na kobiri kuna iye.

¹⁹Delila adamnyengerera kugona pamiyendo pache mbachemera munthu kuchinga tsisi yache yakupotana-potana inomwe. Tenepo Delila adatoma kumboneresa, penepo mphamvu zache zidamaliratu.

²⁰Tenepo Delila adakhuwa mbati, “Samisoni, Afilisti akudza!” Iye adalamuka mbanyerezera kuti anakwanisa kuchita ninga mukhachitira iye ndzidzi onsene kupisudzula yekha ene. Iye hadapidziwe tayu kuti MBUYA adamsiya yekha.

²¹Afilisti adamphata mbamkonombola maso. Iwo adamkwata kwenda naye ku Gaza mbammanga na njema zankuwa, tenepo adamuikha kuphata basa yakupeya pa libwe.

²²Kwache tsisi yache idatoma pontho kumera.

²³Mafumu a Chifilisti adagumanyikana pabodzi kusekera pontho kupereka nsembe kuna Dagoni, milungu yawo. Iwo adaimba mbati, “Milungu yathu yatichitisa kukunda nyamalwathu Samisoni!”

²⁴Iwo akhakomerwa mbalonga mbati, “Mchemereni Samisoni atisekese pano!” Pidambulusa iwo Samisoni m'perezo, iwo adamchitisa kukhala chakusekesa chawo[27] mbamchitisa kuimira pakati pa mizati miwiri. Pidamuona anthu adaimba nyimbo zakukuza nazo milungu yawo mbati, “Milungu yathu yatichitisa kukunda nyamalwathu, ule akhavunga dziko yathu mbapha anthu azinji ule!”

²⁶Samisoni adalonga kuna mphale akhamphata nsenji ule mbati, “Ngandiphatisembo mizati ya nyumbayi; ndinafuna nditsamire.”

²⁷Panyumbapo padadzala amuna na akazi. Mafumu onsene a Chifilisti akhali penepo, pontho pakhali amuna na akazi akukwana ninga pikwi pitatu pansoyi kuyang'ana Samisoni ninga chakusekesa chawo.

²⁸Tenepo Samisoni adapemphera mbati, “MBUYA Mulungu, ndaphata miyendo ndikumbukeni. Mulungu, ndipaseni pontho mphamvu kabodzi kene basi mbamunditawirise kubwezera na shoko ibodzi ene basi Afilistiwa, thangwi ya kundikonombola maso anga mawiriwa.”

²⁹Tenepo Samisoni adaphata pamizati miwiri yapakati yakuphatisa nyumbayo. Iye adatsamira mizati ile uku aikha mkono wache pa mzati ubodzi, mkono unangombowo pa mzati unangowo,

³⁰mbakhuwa mbati, “Mbandifere kubodzi na Afilistiwa.” Iye adagwinya na mphamvu zache zonsene tenepo nyumba ile idagwera mafumu ale na munthu unango onsene akhali penepoyo. Samisoni adapha anthu azinji pakufa pache kupiringana anthu adapha iye ndzidzi ukhali iye na moyo.

³¹Abale ache pabodzi pene na banjache yonsene adadza dzakwata mtembo wache. Iwo adabwerera naye mbakamuikha m'masiye pakati pa Zora na Eshitaoli nthumbi ya babache Manoa. Iye akhali mtongi wa Israele pyaka makumawiri.