Read cisena ATONGI 17 Bible Online

ATONGI 17 - cisena bible

ATONGI 17

¹Pakhali munthu unango dzinache Mika, ule akhakhala m'nthemba ya mapiri a Eferemu.

²Iye adalonga kuna mache mbati, “Pidaba munthu unango kobiri zasiliva chikwi na dzana ibodzi kuna imwe, imwe mudamtemberera mbavayo. Ine ndidakuvani mukulonga penepi. Apo yang'anani kobirizo ndili nazo, munthu wache adachita penepyo ndine pano.” Mache ule adalonga mbati, “MBUYA mbakutsanzayise mwananga!”

³Iye adabwezera kobiri zile kuna mache, tenepo mache ule adalonga mbati, “Kuti dzedze ileke kukugwera mwananga, ine ene mako ndikuzipambulira kobiri zasilivazi kuna MBUYA. Zinati ziphatiswe basa yakusasanyira mfanikizo wakukukutizwa na siliva. Tenepo chinchino ndinakupasa kobirizo.”

⁴Tenepo iye adazibweza kuna mache. Penepo mache ule adakwata kobiri zasiliva zakukwana madzana mawiri mbazipasa nyakufula siliva ule adasasanya mfanikizo kubulukira kumuti wakukukutizwa na siliva. Tenepo udaikhwa m'nyumba mwa Mika.

⁵Mika ule akhali na mbuto yache ene yakupembedzera. Iye adasasanya mifanikizo inango pontho na efodi mbasankhula mbodzi wa anache achimuna kukhala nyansembeache.

⁶Pandzidzi wenewo mu Israele mukhali nkhabe mfumu, munthu onsene akhachita pyache pinamkomerapyo.

⁷Pandzidzi onthowo pakhali mphale unango wa Chilevi, ule akhakhala ku Betelehemu m'nthemba ya Yuda.

⁸Iye adabuluka ku Betelehemu mbaenda pyache kunango kwene kasaka mbuto kuti akakhale. Pikhaenda iye tenepo adafika kumusa kwa Mika m'nthemba ya mapiri ya Eferemu.

⁹Mika adamvunza mbati, “Ukubulukira kupi?” Iye adatawira mbati, “Ine ndine Mlevi wa ku Betelehemu m'nthemba ya Yuda. Ndikusaka-saka mbuto yakuti ndikhale.”

¹⁰Mika adalonga mbati, “Khala na ine pano. Ukhale nyakundipanga nzeru, pontho nyansembe wanga. Ine ndinati ndikupagali kobiri zasiliva khumi chaka chonsene, nguwo na phoso.”

¹¹Mphale wa Chilevi ule adatawira kukhala naye mbasanduka ninga mwanache.

¹²Mika adamsankhula kukhala nyansembeache mbakhala pamsuwo wa Mika.

¹³Mika adalonga mbati, “Chinchino podi ndikukhala na Mlevi m'nyumba mwanga ninga nyansembe wanga, ndikupidziwa kuti MBUYA anachitisa pinthu pyanga kufamba mwadidi.”