Read cisena ATONGI 18 Bible Online

ATONGI 18 - cisena bible

ATONGI 18

¹Pandzidzi wenewu mu Israele mukhali nkhabe mfumu. Nsiku zenezo dzinza ya Dani ikhasaka-saka mbuto kule kunakwanisa iwo kukhazikikako, thangwi akhadadzati tambira dziko yawo ene tayu pakati pa madzinza a Israele.

²Tenepo anthu a ku Dani adasankhula amuna ashanu aluso[28] kubulukira m'mabanja a dzinzayo mbaatuma kubulukira kumaluwani a Zora na Eshitaoli kazonda dziko. Pidafika iwo m'nthemba ya mapiri ya Eferemu, iwo adakhala kunyumba ya Mika.

³Pikhali iwo kweneko, iwo adadzindikira lulume ya mphale wa Chilevi, tenepo adenda kuna iye mbalonga mbati, “Ukuchitanji kuno? Mbani akudzesa kuno?”

⁴Iye adaapanga mbati, “Mika adaverana na ine kundipagali, thangwi ya kumphatira kwanga basa ninga nyansembeache.”

⁵Iwo adalonga kuna iye mbati, “Taphata miyendo vunza Mulungu ngakhala ulendo wathu unakwanisika.”

⁶Nyansembe ule adatawira mbati, “Ndokoni mumtendere. Lekani swipa mtima, MBUYA akutsalakana pya ulendo wanu.”

⁷Tenepo amuna ashanu ale adalamuka mbaenda kuluwani ya Laishi mbaona kuti anthu a kweneko akhali pakupata ninga anthu a ku Sidoni. Iwo akhali anthu amtendere pontho akufulika okhonda pokanyana unango na mwanzache; iwo hakhasowa pinthu tayu. Iwo adakhala kutali na Asidoni, pontho hakhafambirana na anthu anango onsene tayu.

⁸Pidabwerera amuna ashanu ale ku Zora na Eshitaoli, anzawo adaavunza pidagumana iwo.

⁹Iwo adatawira mbati, “Tendeni tikasose Laishi. Tidaona kuti dzikoyo njadidi pyakwanga. Ayi imwe nkhabe chitapo pinthu tayu? Chimbizani kwenda kweneko mbamukaipokosere.

¹⁰Mungafika kweneko munagumana kuti anthu ache nkhabe kunyingwa na chinthu chene tayu. Ndi dziko ikulu pontho ina chinthu chonsene chinafuna munthucho, tenepo Mulungu akupasani dzikoyo.”

¹¹Amuna madzana matanthatu a dzinza ya Dani adabuluka ku Zora na Eshitaoli mbasasanyikira pya nkhondo.

¹²Pikhali iwo kunjira adamanga msasa kumadokero dzuwa a Kiriati-Yearimu m'nthemba ya Yuda. Ndi thangwi yache mbutoyo na lero ikuchemerwa msasa wa Dani.

¹³Iwo adathimiza kwenda kubuluka kweneko kwenda kunyumba ya Mika m'nthemba ya mapiri ya Eferemu.

¹⁴Tenepo amuna ashanu, ale akhadenda kazonda dziko yakuzungulira Laishi, adalonga kuna anzawo mbati, “Kadi imwe mukupidziwa kuti ibodzi mwa nyumba zili panozi muna mfanikizo wa muti wakukukutizwa na siliva? Muna mifanikizo inango, pontho na efodi? Apo tathema kuchitaponji?”

¹⁵Tenepo iwo adapita m'nyumba mwa Mika mukhakhala mphale wa Chilevi ule mbamvunza mukhakhalira iye.

¹⁶Ndzidzi wenewo amuna madzana matanthatu a ku Dani, ale akhadasasanyikira pya nkhondo adaimira pamsuwo wa mpanda.

¹⁷Anyakuzonda ashanu ale adapitiratu m'nyumba mule mbakwata mfanikizo wa muti wakukukutizwa na siliva ule, mifanikizo inango pontho na efodi mwenemo nyansembe aimira pamsuwo na anyankhondo madzana matanthatu ale.

¹⁸Pidapita amuna ale m'nyumba mwa Mika mbakwata pinthu pyakupambulika pile, nyansembe ule adaavunza mbati, “Kadi chinachita imwechi ninji?”

¹⁹Iwo adalonga mbati, “Matama, leka longa chinthu na chibodzi chene. Tende ukakhale nyansembe wathu pontho nyakutipanga nzeru. Ayi iwe nkhabe komerwa kukhala nyansembe wa dzinza yonsene ya Israele tayu, kusiyana na kukhala nyansembe wa banja ya munthu mbodzi ene basi?”

²⁰Penepi pidamchitisa nyansembe ule kukomerwa pyakwanga, tenepo iye adakwata mifanikizo yakupambulika ile mbaenda nawo pabodzi.

²¹Iwo adazungunuka mbaenda pyawo pabodzi pene na anawo, pifuyo pyawo, na pinthu pyawo pyonsene patsogolo pawo.

²²Pidachemera Mika atsanthembache kuti akamenye nawo nkhondo, iwo akhadamala kale nsinzo ukulu ene kubulukira kunyumbache; tenepo iwo adaphatana nawo amuna a dzinza ya Dani ale

²³mbakhuwa kuna iwo, tenepo amuna a dzinza ya Dani ale adazungunuka mbaavunza mbati, “Ninji penepi? Mwinji ninga wenewu ngwanji nawo?”

²⁴Mika adatawira mbati, “Penepa ndiye munafuna kulonganji pinalonga imwe kuti ‘Ninji penepi?’ Imwe mudakwata nyansembeanga na mifanikizo idasasanya ine mbamuenda pyanu. Apo chasala na ine ninji pontho?”

²⁵Amuna a dzinza ya Dani ale adatawira mbati, “Mphyadidi mbudamatama pyako gopesera amuna anazhangali mbakuphata. Penepo iwe na banjako yonsene munafa.”

²⁶Tenepo Adani adathimiza kwenda pyawo. Mika adapiona kuti iwo akhali na mphamvu pyakwanga kupiringana iye, natenepo adazungunuka mbabwerera kumusa kwache.

²⁷Pikhadakwata amuna a dzinza ya Dani nyansembe ule na pinthu pya Mika pikhadasasanya iye pile, iwo adenda mbakasosa luwani ya Laishi, luwani yamtendere ya anthu akumatama, ile ikhali m'phedi ibodzi ene na Beterehobu. Iwo adapha anthu a mwenemo mbapisa luwani ile. Pakhali nkhabe munthu na mbodzi ene wakuapulumusa, thangwi Laishi akhali kutali na mzinda wa Sidoni, pontho iwo hakhafambirana na anthu anango tayu. Amuna a dzinza ya Dani adamanga pontho luwaniyo mbakhazikikamo.

²⁹Iwo adautchandula dzina kukhala Dani, dzina ya kholo wawo Dani mwana Yakobo.

³⁰Amuna a dzinza ya Dani ale adaikhamo mfanikizo kuti upembedzwe, tenepo Yonatani mwana wamamuna wa Gereshomu, ule akhali mwana wamamuna wa Mose na anache akhali anyansembe kuphatira basa dzinza ya Dani kufikirana anthu adatamiswa ku madziko akunja.

³¹Mfanikizo wa Mika udakhala kweneko ndzidzi onsene ukhali Chikhumbi cha Mulungu chile ku Shilo.