Read cisena ATONGI 19 Bible Online

ATONGI 19 - cisena bible

ATONGI 19

¹Nsiku zenezo mwenemo Israele mbadzati khala na mfumu, pakhali Mlevi unango wakukhala kutali kumidzi m'nthemba ya mapiri a Eferemu, ule adakwata bitchu wa ku Betelehemu m'nthemba ya Yuda kukhala mkazache.

²Kwache mkazi ule adapinda mbabuluka kwenda pyache kuna babache ku Betelehemu mbakakhala kweneko miyezi minayi.

³Tenepo mamuna ule adenda kweneko kamnyengerera mkazi ule kuti abwerezane naye. Iye adakwata nyabasa na mabulu mawiri kwenda naye pabodzi. Mkazi ule adapitisa Mlevi m'nyumba, tenepo pidamuona babache adamtambira mwadidi.

⁴Babache mkazi ule adakhakhamiza Mlevi ule kuti akhale, tenepo adakhaladi kweneko nsiku zitatu kudya, kumwa na kugona kweneko.

⁵Machibese a nsiku yachinayi iwo adalamuka mbasasanyika kwenda. Mbwenye tebzalache Mlevi ule adalonga kuna iye mbati, “Mutome kudya mungamala munaenda mphole.”

⁶Tenepo awiri ale adakhala pansi mbadya na kumwa pabodzi. Kubuluka penepo tebzalache ule adalonga kuna iye mbati, “Ndaphata miyendo gonani pontho kuno kuti mukomerwe.”

⁷Mlevi ule adasasanyika kuti aende, mbwenye tebzalache adamkhakhamiza kuti akhale, natenepo iye adagona mosiku unango kweneko.

⁸Mangwana mwache na machibese a nsiku yachishanu adautoma ulendo, mbwenye tebzalache adalonga mbati, “Idyani pontho dikhirani muende mawulo ano.” Tenepo amuna awiri ale adadya pabodzi.

⁹Pikhadatekenyeka mamuna, mkazache wachibitchu ule na nyabasache ule kwenda, tebzalache ule adalonga mbati, “Yang'anani, kunja kwadoka kale munakwanisa kugona pontho kuno kuti mukomerwe. Kunja kunati kuswipe chinchino pano; mangwana munakwanisa kubesera pyakwanga kuti muende ulendo wanu.”

¹⁰Mbwenye munthu ule hadafune pyakugona pontho kweneko tayu, tenepo iye na mkazache wachibitchu ule adalamuka kwenda pabodzi pene na nyabasawo pontho mabulu awo mawiri uku apakiza mitolo pamsana pawo. Kunja kukhadadoka pyakwanga pidafika iwo kumzinda wa Yebusi (wenewu ndi Yerusalemu), tenepo nyabasa ule adalonga kuna mbuyache ule mbati, “Tatani tinakhonda imira kuti tigone pyathu mosiku uno mumzinda wa Ayebusiwu?”

¹²Mbwenye mbuyache ule adalonga mbati, “Ife nkhabe imira kwene mumzinda mule anthu ache si Aisraele tayu. Tinati tigwande pang'ono mbatikagona ku Gibea penu Rama.”

¹⁴Tenepo iwo adagwanda kwene pyawo na mu Yebusi mbathimiza kwenda pyawo. Dzuwa ikhadathobila pikhafika iwo ku Gibea m'nthemba ya dzinza ya Benjemani.

¹⁵Iwo adabauka kuti akagone kweneko. Iwo adapita mumzinda mbakhala pachintalo cha mumzinda, kwache nkhabe na mbodzi ene adapipereka kuakwata kwenda nawo kumusa kwawo kuti akagone mosiku wenewo tayu.

¹⁶M'chidodo nkhalamba inango yachimuna idadza kubulukira kubasache kumunda. Kwawo kukhali kunthemba ya mapiri a Eferemu, mbwenye akhakhala ku Gibea. Anthu a muluwani mwenemo akhali a dzinza ya Benjemani.

¹⁷Nkhalamba ule adaona mlendo ule pachintalo cha mumzinda, mbamvunza mbati, “Mukubulukira kupi? Apo mukwenda kupi?”

¹⁸Mlevi ule adatawira mbati, “Ife tikubulukira ku Betelehemu m'nthemba ya Yuda, tenepo ife tikwenda kumudzi kwathu kutsanga kwa nthemba ya mapiri a Eferemu. Nkhabe na mbodzi ene aenda nafe kumusa kwache,[29]

¹⁹podi kwene kuti ife tina maudzu na pyakudya pya mabulu athu, pontho mkate na vinyu pya mkazanga wachibitchu, ine na nyabasangayi. Tina pyonsene pinafuna ife.”

²⁰Nkhalamba ule adalonga mbati, “Tendeni kumusa kwanga. Ndinati ndikakuyang'anireni mwadidi. Imwe si kuti muchite kugona pachintalo pano tayu.”

²¹Natenepo iye adenda nawo kumusa kwache mbadyesa mabulu ache. Alendo ache ale adaasambisa manyalo awo mbadya na kumwa.

²²Iwo akhakomerwa pyakwanga, tenepo vumbu-vumbu amuna anango anyakuchita pyakuzuda m'mzinda mule adazungulira nyumba ile mbatoma kumenya msuwo. Iwo adalonga kuna nkhalamba ule mbati, “Bulusa panja pano mamuna adza na iwe kumusa kwako kuno! Tinafuna kuchita naye pyakuzuda.”

²³Mbwenye nkhalamba ule adabuluka panja mbalonga mbati, “Tayu, ashamwali, lekani chita pinthu pyakuzuda ninga penepi. Iye ndi mlendo wanga; lekani kumchitira pyakuipa.

²⁴Yang'anani mkazache wachibitchu pontho mwananga okhonda dziwa mamuna alipo. Ndinati ndiabuluse panja pano chinchino. Imwe munakwanisa kuchita nawo pyonsene pinafuna imwe. Mbwenye lekani chita chinthu chakuchitisa manyadzo kuna mamuna weneyu!”

²⁵Kwache anthu ale hadamvesere tayu. Tenepo Mlevi ule adabulusa panja mkazi wachibitchu ule. Iwo adamphatirira mbachita naye pyauputa mosiku onsene mpakana machibese.

²⁶M'makalakwecha mkazi ule adadza mbagwa pansi pa msuwo wa nyumba ya nkhalamba mukhali mamunache mule. Iye adakhala pyache penepo basi mpakana kunja ngwiro.

²⁷Mamunache adalamuka machibese enewo, tenepo pidafungula iye msuwo kuti aende ulendo wache adagumana mkazache wachibitchu ule ali tambzala kumsuwo wa nyumba ile uku mkono wache adathambidzira kumsuwoko.

²⁸Iye adalonga mbati, “Ngalamuka, tiende.” Mbwenye mkazi ule hadatawire tayu. Tenepo adakwata manungo a mkazi ule mbaagwangwanyisa pabulu pache pale mbautoma ulendo wache kwenda kwawo.

²⁹Pidafika iye, adapita m'nyumba mwache mbakwata mpeni mbagwanda-gwanda m'mapindi khumi na mawiri manungo a mkazache ule. Tenepo iye adatumiza phindi ibodzi ibodzi kuna madzinza khumi na awiri a Israele.

³⁰Munthu onsene adapivayo adalonga mbati, “Chipo ife tidzati kuva pinthu ninga penepi tayu. Chipo pinthu ninga penepi pidzati chitika tayu, kutomera ndzidzi udabuluka Aisraele ku Iguputo! Ife tathema kuchitapo pinthu! Apo tinachitanji?”