Read cisena ATONGI 2 Bible Online

ATONGI 2 - cisena bible

ATONGI 2

¹Mngelo wa MBUYA adenda ku Bokimu kubulukira ku Giligala mbalonga kuna Aisraele mbati, “Ine ndidakubulusani kudziko ya Iguputo mbandikudzesani kudziko idadumbira ine kuna makolo anu ile, mbandilonga kuti ine nkhabe dzaswa chiverano chidasasanya ine na imwe chile tayu.

²Imwe mwathema kuleka chita chiverano na anthu ambakhala m'dziko yeneyi ale. Imwe mwathema kugomola maguwawo ansembe. Kwache imwe nee mudachita pidakupangani ine pile tayu. M'mbuto mwache imwe mwachita pyakusiyana na pinthu pidakupangani ine pile.

³Natenepo ine ndikukupangani kuti ine sinathamangisa anthu enewa tayu ndzidzi unaenda imwe. Iwo anakhala anyamalwanu[6] natenepo imwe munakweshwa na kupembedza kwawo milungu yawo.”

⁴Pikhadalonga mngelo penepi anthu onsene Aisraele adatoma kulira.

⁵Ndi thangwi yache mbuto yeneyi imbachemerwa Bokimu.[7] Penepo iwo adapereka nsembe kuna MBUYA.

⁶Yoswa adagwinya Aisraele. Tenepo munthu onsene adenda kakwata khundu yache ya dzikoyo.

⁷Ndzidzi onsene ukhali Yoswa na moyo Aisraele adatumikira MBUYA, tenepo pidafa iye iwo adathimiza kuchita tenepo ndzidzi onsene udakhala akadamu awo na moyo, ale akhadaona okha ene pinthu pyonsene pikulu pikhadachitira MBUYA Aisraele.

⁸Nyabasa wa MBUYA, Yoswa mwana Nuni adafa ana pyaka dzana ibodzi na khumi.

⁹Iye adaikhwa m'masiye kukhundu yache ene ya dziko pa Timinati Sera m'nthemba ya mapiri ya Eferemu kumpoto kwa phiri ya Gaashi.

¹⁰Mfendu onsene udafambo, tenepo mfendu udadzawo udaduwalira MBUYA, pontho na pinthu pyonsene pikhadachitira iye Aisraele pile.

¹¹Tenepo Aisraele adachita pyakuipa pamaso pa MBUYA mbatoma kutumikira milungu Baala.

¹²Iwo adaleka kupembedza MBUYA, Mulungu wa makolo awo, Mulungu adaabulusa m'dziko ya Iguputo ule mbatoma kupembedza milungu inango ya anthu adaazungulira ale. Iwo adailambira mbachitisa MBUYA kuzhangali.

¹³Tenepo Aisraele adaleka kupembedza MBUYA mbatoma kutumikira milungu Baala na Asitarite.

¹⁴Natenepo MBUYA adazhangalira Aisraele mbatawirisa mapanga kuasosa na kuabera pinthu pyawo. Iye adatawirisa anyamalwache onsene akumzungulira kuakunda, tenepo Aisraele hadakwaniseve kupitchinjiriza okha ene tayu.

¹⁵Ndzidzi onsene ukhaenda Aisraele kamenya nkhondo, MBUYA hakhali kukhundu kwawo tayu, ninga montho mudapilongera iye kuti anapichita. Iwo akhali panyatwa zikulu.

¹⁶Tenepo MBUYA adapasa Aisraele atongi, ale adaapulumusa kuna anyamalwawo.

¹⁷Kwache Aisraele hadaikhe konta tayu akadamu awo ale. Aisraele akhali okhonda khulupirika kuna MBUYA mbapembedza milungu inango. Makolo awo akhadavera matongero a MBUYA, mbwenye mfendu wachinchinowu udachimbiza kuleka chitambo chibodzi-bodzi.

¹⁸Ndzidzi onsene ukhaapasa MBUYA Aisraele mtongi, MBUYA akhamphedza mbapulumusa anthu kuna anyamalwawo ndzidzi onsene ukhakhala mtongiyo na moyo. MBUYA akhaavera nsisi thangwi iwo akhabulira na kusanyiswa, pontho na kubonereswa kwawoko.

¹⁹Sindzidzi mtongiyo nkhufa, anthu akhabauka kubwerera kuna makhaliro awo akale ale, tenepo makhaliro awo akhandendeyaletu kuipa kupiringana mfendu wakale ule. Iwo akhatumikira na kupembedza milungu inango mbakhonda kuleka makhaliro awo akudawika na akuuma mtima ale.

²⁰Penepo MBUYA adazhangalira Aisraele pyakwanga mbalonga mbati, “Dzinza yeneyi yaswa chiverano chidasasanya ine na makolo awo mbandiatonga kuti achikoye chile. Na thangwi yakuti iwo hadandivere tayu

²¹ine sinathamangisave tayu dzinza na ibodzi ene, ile ikuthimiza kukhala m'dziko mwanu pidafa Yoswa.

²²Ine ndinaaphatisa basa kuona ngakhala Aisraele anavera matongero anga ninga mudachitira makolo awo.”

²³Tenepo MBUYA adatawirisa madzinza ale kuthimiza kukhala m'dzikomo; iye hadachitise Yoswa kuakunda penu kuathamangisa kabodzi kene pidafa Yoswa tayu.