Read cisena ATONGI 20 Bible Online

ATONGI 20 - cisena bible

ATONGI 20

¹Anthu onsene a Israele a m'dzinza ya Dani mpakana ku Beeresheba pontho a kunthemba ya Gileadi adadza ninga munthu mbodzi mbagumanyikana pamaso pa MBUYA pa Mizipa.

²Akadamu onsene a anthu a madzinza a Israele akhalimbo penepo pamgumano wa anthu a Mulungu. Penepo pakhali pontho anyankhondo pikwi madzana manayi akuphatira matalasada.

³Pandzidzi wenewo anthu anango a dzinza ya Benjemani adapiva kuti Aisraele onsene agumanyikana pa Mizipa. Aisraele adavunza mbati, “Ngatipangeni, upandu wenewu wachitika tani?”

⁴Mlevi ule mkazache akhadachitirwa pyaupandu ule adatawira mbati, “Mkazangayi na ine tidenda ku Gibea m'nthemba ya Benjemani kagona kweneko.

⁵Amuna a kweneko adadza mbazungulira nyumba ile na mosiku. Iwo akhafuna pyakundipha m'mbuto mwache iwo adaphatirira mkazanga wachibitchu, tenepo iye adafa.

⁶Ine ndidakwata manungo ache mbandiagwanda-gwanda m'mapindi mbanditumiza kada dzinza phindi yache kuna madzinza onsene khumi na awiri a Israele, thangwi anthu enewa achita chinthu chakuipa pontho chakuchitisa manyadzo pakati pa Aisraele.

⁷Monsene muli pano ndimwe Aisraele, apo tinachitanji na penepi.”

⁸Anthu onsene adalamuka pabodzi pene mbalonga mbati, “Nkhabe munthu na mbodzi ene wa ife, penu akhale pyache m'khumbi penu m'nyumba anaenda kumusa kwache tayu.

⁹Ife tinachita tenepa: tinagwa ntsango mbatisankhula amuna anango kuti akasose Gibea.[30]

¹⁰Khundu ibodzi ya makhundu khumi ya amuna a Israele anapereka pyakudya kuna anyankhondo, anango akusalirawo anati aende katchunyusa Gibea,[31] thangwi ya chinthu chakuipa pyakwanga chachita iwo kuna Israele.”

¹¹Natenepo amuna onsene a ku Israele adagumanyikana na manyerezero abodzi ene kufuna kusosa luwani ile.

¹²Madzinza a Israele adatuma anyamphangwa kunthemba zonsene za dzinza ya Benjemani kulonga kuti, “Upandu wakugoswa ninga wenewo ngwanji wachita imwewu?

¹³Chinchino dzani nawo kuna ife anthu akuchita pyakuzuda, towera tiaphe mbatibulusa chakuipachi mu Israele.” Mbwenye anthu a dzinza ya Benjemani hadapiikhe konta tayu pikhalonga Aisraele anzawo pile.

¹⁴Kubulukira kumizinda yonsene ya Benjemani iwo adadza dzamenya nkhondo ku Gibea na anthu anango a Israele.

¹⁵Anthu a dzinza ya Benjemani adagumanyisa anyankhondo pikwi makumawiri na pitanthatu kubulukira kumizinda yawo. Kuthimizira papenepi mbalwa za mu Gibea zidagumanyisa amuna madzana manomwe

¹⁶aluso pakuponyera mabzere. Munthu onsene wa iwo akhaponya mwala na mbemba mbakhonda kukhwitcha kwene na pang'ono pene.

¹⁷Madzinza anango a Israele adagumanyisambo amuna pikwi madzana manayi anyankhondo akuphatira talasada, onsenewa akhali aluso pankhondo.

¹⁸Aisraele adenda kumbuto yakupembedzerapo ku Betele mbavunza Mulungu mbati, “Dzinzache njipi yathema kutoma kwenda kamenyana na dzinza ya Benjemani?” MBUYA adatawira mbati, “Dzinza ya Yuda.”

¹⁹Natenepo mangwana mwache na machibese Aisraele adautoma ulendo wa kunkhondo mbamanga msasa chifupi na mzinda wa Gibea.

²⁰Iwo adenda kasosa anyankhondo a dzinza ya Benjemani mbaikha anyankhondo m'mbuto zawo kuyang'anisana na mzindawo.

²¹Anyankhondo a dzinza ya Benjemani adabuluka mumzindamo, tenepo dzuwa mbidzati thobila iwo adapha anyankhondo pikwi makumawiri na piwiri a ku Israele.

²²Kubuluka penepo Aisraele adenda kumbuto yakupembedzerako mbasintili pamaso pa MBUYA mpakana mawulo. Iwo adavunza mbati, “Ayi ife tathema kwenda pontho kachita nkhondo na abale athu a dzinza ya Benjemani?” MBUYA adatawira mbati, “Ande.” Natenepo anyankhondo Aisraele adawangiswa mtima. Iwo adaikha anyankhondo awo sasawa ninga adaikha iwo pakutoma pale.

²³

²⁴Iwo adenda kuna anyankhondo a dzinza ya Benjemani kachiwiri.

²⁵Ndzidzi wenewu anthu a dzinza ya Benjemani adabuluka mumzindamo mbapha anyankhondo pikwi khumi na pisere pya anyankhondo aluso a ku Israele.

²⁶Kubuluka penepo Aisraele onsene adenda kasintili ku Betele. Iwo adakhala kweneko pamaso pa MBUYA, pontho hadadye tayu kufikirana mawulo. Iwo adapereka nsembe zachiphatizano mbapyereza nsembe yamumphu. Iwo adachita pyonsenepi pamaso pa MBUYA.

²⁷Bokosi ya Chiverano cha Mulungu ikhali ku Beteleko ndzidzi wenewo, pontho Finiasi mwana wa Eleazara chidzukulu cha Aroni ndiye akhayang'anira Bokosi ya Chiveranoyo. Anthu adavunza mbati, “Ayi tathema kwenda pontho kamenyana na abale athu a dzinza ya Benjemani, penu tileke pyathu?” MBUYA adatawira mbati, “Kamenyeni mangwana ndinati ndikuchitiseni kuakunda.”

²⁸

²⁹Tenepo Aisraele adenda kaikha amuna anango pakubisika kuzungulira Gibea.

³⁰Kachitatu kache nsiku zakutsagazana adenda kuna anthu a dzinza ya Benjemani mbaikha anyankhondo awo m'mbuto zawo kuyang'anisana na Gibea ninga mukhadachitira iwo pakutoma pale.

³¹Anthu a dzinza ya Benjemani adabuluka dzamenya nkhondo mbachitiswa kwenda kutali kwene kubulukira kumzinda. Ninga pakutoma iwo adatoma kupha Aisraele anango kunja kwa mzinda pamsewu wakwendera ku Betele pontho unango wakwendera ku Gibea. Iwo adapha Aisraele akukwana ninga makumatatu.

³²Anthu a dzinza ya Benjemani adalonga mbati, “Ife taapamantha ninga mukhadachitira ife pakutoma pale.” Mbwenye Aisraele akhadapisasanya kubwerera chinduli-nduli mbaachitisa kwenda kutali na mzindawo kumisewuyo.

³³Pidabuluka gulu ikulu ya Israele m'mbuto zawo mbagumanyikana pa Baala-Tamara, amuna adabisala kuzungulira mzindawo adabuluka m'mbuto za miyala zikhadabisala iwo zile.

³⁴Tenepo pakati pa amuna pikwi khumi aluso adasankhulwa pakati pa Aisraele ale, adasosa Gibea tenepo nkhondo idakaka. Anthu a dzinza ya Benjemani hadadzindikire tayu kuti iwo akhali chifupi kuvungwa.

³⁵Tenepo MBUYA adachitisa anyankhondo a ku Israele kukunda anyankhondo a dzinza ya Benjemani mbapha pikwi makumawiri na pishanu na dzana ibodzi pya iwo nsiku yeneyo.

³⁶Penepo anthu a dzinza ya Benjemani adadzindikira kuti akundwa. Gulu ikulu ya anyankhondo a ku Israele akhadakunda anthu a dzinza ya Benjemani, thangwi akhanyindira amuna akhadabisala kuzungulira Gibea ale.

³⁷Amuna enewa adachimbiza kuthamangira ku Gibea, iwo adabalalika mumzinda mule mbapha munthu onsene mwenemo.

³⁸Gulu ikulu ya anyankhondo a ku Israele pontho na amuna akhadabisala ale adasasanya chidziwiso chakuti angaona makole akulu a utsi tolo-tolo m'dzulu kubulukira mumzindamo,

³⁹gulu ikulu ile idathema kuzungunuka kumenya nkhondo. Pandzidzi wenewu anthu a dzinza ya Benjemani akhadapha kale Aisraele makumatatu. Tenepo iwo adapilonga okha ene mbati, “Tiamenye ninga montho mudachitira ife pakutoma pale.”

⁴⁰Penepo chidziwiso chile chidaoneka, makole a utsi adaoneka phwira-phwira kubulukira mumzinda mule. Anthu a dzinza ya Benjemani adazungunuka mbadodoma kuona kuti mzindawo onsene ukugaka moto.

⁴¹Tenepo Aisraele adazungunukambo, penepo anthu a ku Benjemani akhali pa mpani-pani, thangwi iwo adadzindikira kuti ali chifupi kukundwa.

⁴²Iwo adapiyesera kuthawa Aisraele kuthawira kuminda, kwache iwo hadakwanise kuthawa tayu, thangwi iwo adaphatwa pakati na kati pa gulu ikulu ya anyankhondo a ku Israele na amuna akhadabuluka mumzinda ale, tenepo iwo adamala vungwa.

⁴³Aisraele adazungulira anyamalwawo mbaathamangisa mwakukhonda leka mpakana chakumabulukiro dzuwa a Gibea uku akuapha pikhaathamangisa iwo.

⁴⁴Pikwi khumi na pisere pya anyankhondo aluso a dzinza ya Benjemani adaphiwa.

⁴⁵Pikhazungunuka amuna akusalira kuthawira kuthando yatchetcha kwenda ku Phanzwi ya Rimoni, Aisraele adapha amuna pikwi pishanu m'misewu. Aisraele adathimiza kuathamangisa amuna akusalira ale, mpakana ku Gidomu mbapha amuna pikwi piwiri.

⁴⁶Pabodzi pene onsene anthu a dzinza ya Benjemani adaphiwa nsiku yeneyo akhalipo pikwi makumawiri na pishanu, onsenewo akhali anyankhondo akuwanga mtima.

⁴⁷Kwache amuna madzana matanthatu adakwanisa kuthawira kuthando yatchetcha ku Phanzwi ya Rimoni mbakhala kweneko miyezi minayi.

⁴⁸Aisraele adabwerera pontho kudziko ya Benjemani mbapha pyonsene pene, amuna, akazi na ana ene, pontho na pifuyo pyene. Iwo adapisa moto luwani yonsene m'nthemba yeneyo.