Read cisena ATONGI 21 Bible Online

ATONGI 21 - cisena bible

ATONGI 21

¹Pikhadagumanyikana Aisraele pa Mizipa, iwo adadumbira mbati, “Nee mbodzi pakati pathupa anasembesa mwanache wamkazi na munthu wa dzinza ya Benjemani tayu.”

²Natenepo anthu a ku Israele adenda ku Betele mbakhala pansi pamaso pa Mulungu mpakana mawulo mbasintili mwakugaluza fala, pontho pikulu pene. Iwo adalonga mbati,

³“MBUYA Mulungu wa Israele penepi pyachitikiranji? Thangwi yache ninji kuti dzinza ya Benjemani imale pakati pa Israele?”

⁴Mangwana mwache na machibese anthu adamanga guwa yansembe penepo, mbapereka nsembe zachiphatizano mbapyereza nsembe yonsene yamumphu.

⁵Iwo adavunza ngakhala pakhali gulu inango kunja ile hidagumanyikane nawo pabodzi na madzinza a Israele pamaso pa MBUYA tayu. Thangwi iwo akhadadumbira kuti munthu onsene anakhonda dzagumanyikana pabodzi na anzache pamaso pa MBUYA ku Mizipa, weneyo athemadi kuphiwa.

⁶Aisraele adaphatwa na nsisi pyakwanga na abale awo a dzinza ya Benjemani mbalonga mbati, “Lero dzinza ibodzi pakati pa madzinza a Israele yatayika.

⁷Tinachita tani kuti tipase akazi kuna amuna a dzinza ya Benjemani adasalira kukhonda phiwa ale? Ife tidadumbira kuna MBUYA kuti na kutani kwene ife sinaapasa anathu achikazi tayu.”

⁸Tenepo iwo adavunza ngakhala pakhali dzinza inango pakati pa Israele ile hidagumanyikane na anthu tayu pamaso pa MBUYA pa Mizipa. Tenepo iwo adapidziwa kuti nkhabe na ibodzi ene wa ku Yabeshi-Gileadi akhadadza penepo tayu;

⁹pakuchemera kufuna kuona mbani nyankhondo akhalipo penu nkhabepo, nkhabe na mbodzi ene wa ku Yabeshi-Gileadi adatawira tayu.

¹⁰Anthu adagumanyikana penepo ale adatuma amuna akuwanga mtima pikwi khumi na piwiri na utongi wakuti, “Ndokoni mukaphe amuna onsene a ku Yabeshi-Gileadi kuthimizapo akazi na ana ene.

¹¹Kapheni amuna onsene pontho akazi ale si amiyali okhonda dziwa mamuna tayu.”

¹²Pakati pa anthu a mu Yabeshi adagumana amiyali okhonda dziwa mamuna madzana manayi, tenepo adadza nawo kumsasa kwawo ku Shilo, kule nkhunthemba ya Kanani.

¹³Tenepo anthu adagumanyikana penepo ale adatuma mphangwa kuna amuna a dzinza ya Benjemani akhabisala ku Phanzwi ya Rimoni ale kuapanga pya mtendere.

¹⁴Amuna a dzinza ya Benjemani ale, adabwerera m'mudzi, tenepo adapaswa akazi a ku Yabeshi-Gileadi akhadasiyiwa okhonda phiwa ale. Kwache akazi ale hadakwane-kwane kuna onsene a iwo ale tayu.

¹⁵Anthu adaphatwa na nsisi na dzinza ya Benjemani thangwi MBUYA adabulusa dzinza ibodzi pakati pa madzinza a Israele.

¹⁶Tenepo anthu adagumanyikana mbalonga mbati, “Nkhabeve tayu akazi m'dzinza ya Benjemani. Tinachita tani kuti tipase akazi kuna amuna a dzinza ya Benjemani adasalira kukhonda phiwa ale?

¹⁷Israele hadatheme kutaya ibodzi pakati pa madzinza khumi na awiriwa tayu. Ife tathema kugumana njira yakuti dzinza ya Benjemani ithimize kukhalapo,

¹⁸Kwache ife nkhabe kuatawirisa kusemba anathu achikazi tayu, thangwi ife Aisraele tadumbira kuti, ‘Dzedze kuna munthu onsene anasembesa mwanache wamkazi kuna dzinza ya Benjemani.’

¹⁹Mbwenye yang'anani kunakhala phwando ya chaka na chaka ya MBUYA ku Shilo kumpoto kwa Betele, pontho kumabulukiro dzuwa a njira yakwendera ku Shekemu kubulukira ku Betele, pontho kumwera kwa Lebona.”

²⁰Tenepo iwo adalonga kuna anthu a dzinza ya Benjemani mbati, “Ndokoni mukabisale kuminda yamfesa

²¹mbamuone ngakhala atsikana a ku Shilo anadza penepo dzavina nawo, imwe mubuluke m'mfesa mwabisala imwemo mbamuphate kada munthu mkazi pakati pa akazi a ku Shilo mbamuende nawo kwanu kunthemba ya Benjemani.

²²Ngakhala ababawo na nkhoswe zawo anadza kuna ife mbatidungunyira kuti muleke anawo, ife tinaapanga kuti, ‘Tikomerenimbo mtima, thangwi ife nee tidaakwata kubulukira kunkhondo akazi mbatiapasa kuti akhale akazawo tayu. Tenepo imwe hamudadawe tayu, thangwi hamudatipase ananu achikazi tayu.’ ”

²³Penepi ndiye pidachita amuna a dzinza ya Benjemani. Pikhavina atsikana ale, mamuna onsene adenda mbakaphata mtsikana mbaenda naye kakhala mkazache. Kubuluka penepo iwo adabwerera kunthemba kwawo mbamanga pontho luwani yawo mbakhazikikamo.

²⁴Natenepo Aisraele adabuluka pambutopo mbaenda munthu onsene kudzinza kwache, banjache na kuna pinthu pyache.

²⁵Pandzidzi wenewo mu Israele mukhali nkhabe mfumu. Munthu onsene akhachita pyache pinamkomerapyo.