Read cisena ATONGI 3 Bible Online

ATONGI 3 - cisena bible

ATONGI 3

¹MBUYA adasiya madzinza anangowo m'dzikomo kuyesera Aisraele onsene ale hadamenye nawo nkhondo m'dziko ya Kanani.

²Iye adachita tenepo maka-maka towera afunzise kumenya nkhondo mfendu onsene wa Israele maka-maka ale chipo hadaone nkhondo tayu.

³Mizinda ikhadasalira m'dzikomo ikhali mizinda mishanu ya Afilisti, Akanani, Asidoni na Ahivi onsene akhakhala m'mapiri a Lebanoni ale kubulukira pa phiri ya Baala-Herimoni mpakana pamakata a Hamati.

⁴Iwo adathema kukhala mayesero kuna Aisraele kufuna kuona ngakhala iwo anavera penu tayu matongero adapereka MBUYA kuna makolo awo kudzera muna Mose ale.

⁵Natenepo Aisraele adakhazikika pakati pa Akanani, Ahiti, Aamori, Aperizi, Ahivi na Ayebusi.

⁶Iwo adasemberana nawo mbapembedza milungu yawo.

⁷Aisraele adachita pyakuipa pamaso pa MBUYA Mulungu wawo; iwo adamduwalira mbapembedza milungu Baala na Ashera.

⁸Tenepo MBUYA adazhangalira pyakwanga Aisraele mbatawirisa Mfumu Kushani-Rishataimu wa ku Mesopotamia kuakunda mbaatonga pyaka pisere.

⁹Penepo Aisraele adalira kuna MBUYA, tenepo iye adatuma munthu kuasudzula panyatwa zawozo. Munthu weneyu akhali Oteniele mwana wamamuna wa Kenazi mphwache Kalebu.

¹⁰Mzimu wa MBUYA adamgudumira, tenepo iye adakhala mkadamu wa Israele. Oteniele adenda kunkhondo, tenepo MBUYA adamchitisa kukunda mfumu wa ku Mesopotamia.

¹¹Pyaka makumanayi m'dzikomo mukhali mtendere. Kubuluka penepo Oteniele adafa.

¹²Aisraele adachita pyakuipa pamaso pa MBUYA. Na thangwi yeneyi MBUYA adachitisa Egiloni mfumu wa Moabu kukhala wamphamvu pyakwanga kupiringana Israele.

¹³Egiloni adaphatana kukhala gulu ibodzi na Aamoni na Aamaleki; iwo adakunda Israele mbapokosera Yeriko, mzinda wa miti yamdikhwa.

¹⁴Aisraele akhali pansi pa utongi wa Egiloni pyaka khumi na pisere.

¹⁵Penepo Aisraele adalira kuna MBUYA, tenepo iye adatuma munthu kuasudzula panyatwa zawozo. Munthu weneyu akhali Ehudi nyamabzere, iye akhali mwana wamamuna wa Gera wa dzinza ya Benjemani. Aisraele adatuma Ehudi kuna Egiloni mfumu wa Moabu na mitukwa.

¹⁶Ehudi adapisasanyira yekha ene talasada yakutwa uku na uku yakulapha chifupi-fupi ninga kati ya khono. Iye adaimangirira kumadyo kwache mbaibisa na nguwo zache.

¹⁷Tenepo adakwata mitukwa ile kwenda nayo kuna Egiloni, ule akhali wakukula manungo pyakwanga.

¹⁸Pikhadapereka Ehudi mitukwa ile kuna Egiloni adapanga amunache akhadathukula mitukwa ale kubwerera kwawo.

¹⁹Mbwenye iye yekha ene adabwerera panjira pamiyala yakusemwa chifupi na Giligala kwenda kuna Egiloni mbalonga mbati, “Nyakulemedzwa Mfumu, ndina mphangwa zachibiso-biso.” Tenepo mfumu adapanga anyabasache mbati, “Tisiyeni tekha muno!” Natenepo anyabasa onsene ale adabuluka panja.

²⁰Tenepo pikhakhala mfumu yekha ene m'subi yache yapadzulu mwakutonthola, Ehudi adenda kuna iye mbalonga mbati, “Ndili namwe mphangwa zakubulukira kuna Mulungu.” Mfumu adaimira,

²¹penepo pene na mkono wache wamabzere Ehudi adacholola talasadache kubulukira kumadyo kwache mbaitchokomeza m'mimba mwa mfumu.

²²Talasada yonsene na chikumbu chene idapitiratu, tenepo talasada yonsene ikhali na mafuta okhokha. Ehudi hadaicholole tayu, thangwi idaphatirira pakati pa miyendo yache.[8]

²³Kubuluka penepo Ehudi adabuluka panja mbafunga mwadidi misuwoyo,

²⁴tenepo adenda pyache. Anyabasa adadza mbagumana misuwo yamalwa fungwa mwadidi, tenepo adanyerezera kuti mfumu akhali m'bwalomo kuchita chumbudzu.

²⁵Tenepo iwo adadikhira ninga mudafunira iwo. Kwache mfumu hadafungule msuwo tayu basi, penepo iwo adakwata mfungulo mbafungula msuwo mbaona mbuyawo ali thasa afa.

²⁶Ehudi adenda pyache ndzidzi ukhadikhira iwo ule. Pidapiringana iye pamiyala ya kusemwa adathawira ku Seira.

²⁷Pidafika iye kweneko kudziko ya m'mapiri ya Eferemu adaliza ngoma kuchemera Aisraele kamenya nkhondo, tenepo adaatsogolera kutchitha nawo mapiri.

²⁸Iye adalonga mbati, “Nditewereni, MBUYA akuchitisani kuti mukunde anyamalwanu Amoabu.” Iwo adatewera Ehudi mbapamantha Amoabu pikhali iwo chifupi kuwambuka mkulo wa Yorodani; iwo hadatawirise munthu na mbodzi ene kuwambuka mkulowo tayu.

²⁹Nsiku yeneyo adapha amuna ninga pikwi khumi pya anyankhondo amphamvu a ku Moabu. Nkhabe munthu na mbodzi ene adathawa tayu.

³⁰Nsiku yeneyo Aisraele adakunda Amoabu, tenepo pyaka makumasere m'dzikomo mukhali mtendere.

³¹Kubuluka penepo adakhala mkadamu ndi Shamagara mwana Anati. Iyembo adapulumusa Aisraele pakupha Afilisti madzana matanthatu na ndodo yakuphatiswa basa kufambisa nayo ng'ombe za pachingolo.